၂၀၁၇ ခုနှစ် ကမ္ဘာ့သတင်း မှန်ကူကွက်များ(ဇွန်)

U.S. President Donald Trump speaks during an announcement in the Rose Garden of the White House in Washington, D.C., U.S., on Thursday, June 1, 2017. Trump announced the U.S. would withdraw from the Paris climate pact and that he will seek to renegotiate the international agreement in a way that treats American workers better. Photographer: Andrew Harrer/Bloomberg via Getty Images

 

 

“၂၀၁၇ ခုနှစ် ဇွန် ၁ ရက်တွင်မူ
ကမ္ဘာ့ကာဗွန်ဒိုင်အောက်ဆိုက်ဓာတ်ငွေ့ ဒုတိယအများဆုံး ထုတ်လွှတ်နေသည့် နိုင်ငံကြီးအား ဦးဆောင်နေသော သမ္မတဒေါ်နယ်ထရန့်က ရာသီဥတုပြောင်းလဲမှုဆိုင်ရာ ပါရီသဘောတူညီချက်မှ အမေရိကန်ပြည်ထောင်စု
နုတ်ထွက်မည်ဖြစ်ကြောင်း အတည်ပြုလိုက်သည်။”


ရာသီဥတုပြောင်းလဲမှုဆိုင်ရာ ပါရီသဘော တူညီချက်နှင့် အမေရိကန်ပြည်ထောင်စု (၂၀၁၇ ဇွန် ၁ ရက်)

ရာသီဥတုပြောင်းလဲမှုပြဿနာသည် နယ် စည်းများကို ဂရုမစိုက်။ မည်သူမည်ဝါ၊ ဆင်းရဲ ချမ်းသာ၊ ကြီးသည် ငယ်သည်လည်း မရွေးတတ်။ သို့ဖြစ်ရာ ရာသီဥတုပြောင်းလဲ မှုပြဿနာသည် တစ်ကမ္ဘာလုံးသွေးစည်းနိုင်မှ ကျော်လွှား နိုင်မည့် ကမ္ဘာလုံးချီ စိန်ခေါ်မှုဖြစ်ကြောင်း ကုလသမဂ္ဂအတွင်း ရေးမှူး ချုပ်ဟောင်းဘန်ကီမွန်းကဆိုခဲ့ခြင်းဖြစ်သည်။

-Ads-
-Ads-

 

ကမ္ဘာလုံးချီစိန်ခေါ်မှုအဖြစ် ကုလသမဂ္ဂ အတွင်းရေးမှူး ချုပ်ဟောင်း ဘန်ကီမွန်းက ချုပ်ဆိုထားသည့် ရာသီဥတု ပြောင်းလဲမှုပြဿနာ၏ နောက်ဆက်တွဲအကျိုးဆက်များကို ကာကွယ်တားဆီးရေးအတွက် အမေရိကန်ပြည်ထောင်စုနှင့် တရုတ်ကဲ့သို့သော ဖန်လုံအိမ်အာနိသင်ရှိ ဓာတ်ငွေ့များ အများဆုံးထုတ်လွှတ်သည့် နိုင်ငံများအပါဝင် ကမ္ဘာ့နိုင်ငံများက ၂၀၁၅ ခုနှစ်တွင် ရာသီဥတု ပြောင်းလဲမှုဆိုင်ရာပါရီသဘော တူညီချက်ကို အတည်ပြုလက်မှတ်ရေးထိုးခဲ့ကြသည်။


ရာသီဥတုပြောင်းလဲမှုဆိုင်ရာ ပါရီသဘော တူညီချက်၏ အန္တိမရည်မှန်းချက်မှာ တစ်ကမ္ဘာလုံးဆိုင်ရာ ပျမ်းမျှ
အပူချိန်မြင့်တက်လာမှုကို ထိန်းချုပ်လျှော့ချရေးဖြစ်သည်။ အဆိုပါ ရည်မှန်းချက်အရ ကမ္ဘာ့နိုင်ငံများသည် စီးပွားရေးအရ ဖန်လုံအိမ် အာနိသင်ရှိ ဓာတ်ငွေ့များ ထုတ်လွှတ်မှုကို လျှော့ချ ပေးရမည်ဖြစ်ပြီး ရာသီဥတုပြောင်းလဲမှုပြဿနာများကို လိုက် လျောညီထွေ ရင်ဆိုင်နိုင်မည့် ဖွံ့ဖြိုးရေးလုပ်ငန်းများအတွက် ဘဏ္ဍာငွေကြေးရင်နှီးမြှုပ်နှံ ပေးရမည်ဖြစ်သည်။ စင်စစ်အား ဖြင့် ရာသီဥတု ပြောင်းလဲမှုဆိုင်ရာ ပါရီသဘောတူညီချက် သည် လူမှုပယောဂကြောင့် ဖြစ်လာမည့် ကမ္ဘာလုံးချီ စိန်ခေါ်မှုကြီးတစ်ရပ်ကို ကျော်လွှားရေးအတွက် ရည်မျှော်သော ပထမဆုံးသမိုင်းဝင်ခြေလှမ်းတစ် ရပ်ပင်ဖြစ်သည်။

သို့ရာတွင် သမ္မတဒေါ်နယ်ထရန့်ဦးဆောင်သည့် အမေရိကန် အစိုးရအဖွဲ့၏ လက်ထက်တွင်ကမ္ဘာ့ကာဗွန်ဒိုင်အောက်ဆိုက် ဓာတ်ငွေ့ထုတ်လုပ်မှုအများဆုံးနိုင်ငံကြီးတစ်နိုင်ငံဖြစ်သည့် အမေရိ ကန်ပြည်ထောင်စုသည် ရာသီဥတုပြောင်းလဲမှုဆိုင်ရာ ပါရီသဘောတူညီချက်အပေါ် သဘောထားပြောင်းလာခဲ့သည်။
“အမေရိက ပဓာန” ကြွေးကြော်သံဖြင့် အမေရိကန်သမ္မတရွေး ကောက်ပွဲ၌ အနိုင်ရရှိခဲ့သော သမ္မတဒေါ်နယ်ထရန့်သည် စီးပွားရေးအမျိုးသားရေးဝါဒရှုထောင့်ဖြင့် ၂၀၁၅ ရာသီဥတု ပြောင်းလဲမှုဆိုင်ရာ ပါရီသဘောတူညီချက်ကို ချဉ်းကပ်လာ လေသည်။ အမေရိကန်နိုင်ငံရေးလောကမှ အမျိုးသားရေးဝါဒီ များကဲ့သို့ပင် သမ္မတဒေါ်နယ် ထရန့်ကလည်းပါရီသဘောတူညီ ချက်ကြောင့် အမေရိကန်တို့၏ အလုပ်အကိုင်အခွင့်အလမ်းများ ထိခိုက်နစ်နာသွားနိုင်ကြောင်း ရှုမြင်ထားသည်။

၂၀၁၇ ခုနှစ် ဇွန် ၁ ရက်တွင်မူ ကမ္ဘာ့ကာဗွန်ဒိုင်အောက် ဆိုက်ဓာတ်ငွေ့ ဒုတိယအများဆုံး ထုတ်လွှတ်နေသည့် နိုင်ငံကြီးအား ဦးဆောင်နေသော သမ္မတဒေါ်နယ်ထရန့်က ရာသီဥတုပြောင်းလဲမှုဆိုင်ရာ ပါရီသဘောတူညီချက်မှ အမေရိကန်ပြည် ထောင်စုနုတ်ထွက်မည်ဖြစ်ကြောင်း အတည်ပြုလိုက်သည်။

ရာသီဥတုပြောင်းလဲမှုဆိုင်ရာ ပါရီသဘောတူညီချက်နှင့် ပတ်သက်သည့် သမ္မတဒေါ်နယ် ထရန့်၏ ဆုံးဖြတ်ချက်သည် ရွေးကောက်ပွဲ မဲဆွယ် ကတိက၀တ်တစ်ခုကို ဆုံးဖြတ်ချက်၊ အမေရိကန် နိုင်ငံရေးလောကမှ မော်ဒန်အမျိုးသားရေးဝါဒီများ အကြိုက် ဆုံးဖြတ်ချက်ဖြစ်သော်လည်း ရာသီဥတုပြောင်းလဲမှု ပြဿနာများကို ရင်ဆိုင်ရာတွင် ကမ္ဘာ့ နိုင်ငံများ၏ညီညွတ်မှု ကို အားလျော့စေမည့် ဆုံးဖြတ်ချက်မျိုးအဖြစ် မှတ်ယူသူများ လည်းရှိသည်။

သို့ရာတွင် ဒေါ်နယ်ထရန့်၏ ၂၀၁၇ ခုနှစ် ဇွန် ၁ ရက် အတည်ပြုကြေညာချက်ကြောင့် ရာသီဥတုပြောင်းလဲမှုဆိုင်ရာ ပါရီသဘောတူညီချက်၏ ရည်မှန်းချက်များလမ်းချော်သွား နိုင်ဖွယ်မရှိပေ။ အဘယ့်ကြောင့်ဆိုသော် ထိုသဘောတူညီ ချက်ကို တစ်ကမ္ဘာလုံးနှင့် အမေရိကန်ပြည်သူအများအပြားက ၀န်းရံပေးထားခြင်းကြောင့်ဖြစ်သည်။

ဂန္ဓမာနန်းပလ္လင်နှင့် အကီဟီတို
(၂၀၁၇ ခုနှစ် ဇွန် ၉ ရက်)

ဂျပန်နိုင်ငံ၏ ဂန္ဓမာနန်းရိုးနန်းဆက်သည် သက်တမ်းအားဖြင့် နှစ်ပေါင်း ၂၀၀၀ ကျော်ရှိသည့် ထီးနန်းဖြစ်ပြီး ကမ္ဘာ့ရှေးအကျ
ဆုံး ထီးနန်းလည်းဖြစ်သည်။ ဒဏ္ဍာရီများအရဂျပန်ဧကရာဇ်များ သည် နေနတ်သမီး အမာတီအဆုမှ တိုက်ရိုက်ဆင်းသက်လာ သူများဖြစ်သည်ဟုဆိုကြသည်။ သူရိယနတ်ဒေ၀ီမှ တိုက်ရိုက် ဆင်းသက်လာသော ဂျပန်ဧကရာဇ်များသည်ဂျပန်ပြည်သူတို့ ၏ ဂုဏ်သိက္ခာဖြစ်သည်။ စည်းလုံးညီညွတ်မှု၏ပြယုဂ်လည်း
ဖြစ်သည်။ ဒုတိယကမ္ဘာစစ်တွင် ဂျပန်စစ်သည်တော်များသည် ဧကရာဇ် မီနာလက်အောက်၌ အသက်ပေးခဲ့ကြသည်။

သို့ရာတွင် လက်ရှိနေမျိုးနွယ် ဂျပန်ဧကရာဇ်ကြီး အကီဟီတို သည် ၂၀၁၆ ခုနှစ် သြဂုတ်လအတွင်း ၎င်းအနေဖြင့် အသက် အရွယ်ကြောင့် ထီးနန်းစွန့်လွှတ်လိုက်ပြီဖြစ်ကြောင်း ကြေညာခဲ့ သည်။ သက်တော် ၈၀ အရွယ် ဧကရာဇ် အကီဟီတို၏ နှုတ်မှ ထွက်ပေါ်လာသည့် ထီးနန်းစွန့်လိုပြီဟူသော စကားသည် ဂျပန်ပြည်သူများ နှစ်ပေါင်း ၂၀၀ ကျော်ကာလအတွင်းမကြားဖူး သည့်စကားဖြစ်သည်။ ထို့နည်းတူ ဧကရာဇ်အကီဟီတို၏ ဆန္ဒ ကြောင့် ဂျပန်အစိုးရသည်လည်း ဗျာများခဲ့ရသည်။ အဘယ် ကြောင့်ဆိုသော် စစ်လွန်ခေတ် ၁၉၄၇ ခုနှစ်တွင်ရေးဆွဲပြဋ္ဌာန်း ထားသည့် ၁၉၄၇ ခုနှစ် နန်းတွင်း ဥပဒေတွင် ဧကရာဇ်တစ်ပါး ကို ထီးနန်းစွန့်ခွင့် မပေးထား။ ထို့နည်းတူ အမျိုးသမီးများကို လည်း ထီးနန်းဆက်ခံခွင့်မပေး။

သို့ဖြစ်ရာ ဂျပန်အစိုးရသည် ပြည်သူချစ်သော ဧကရာဇ်ကြီး၏ ဆန္ဒကို ဖြည့်ဆည်းပေးနိုင်ရေးအတွက် ဧကရာဇ်ကို ထီးနန်း စွန့်ခွင့်ပေးနိုင်သော ဥပဒေကြမ်းတစ်ရပ်ကိုရေးဆွဲရန် ၀န်ကြီး ချုပ်ရှင်ဇိုအဘေးကိုယ်တိုင် ဦးဆောင်ကြိုးပမ်းခဲ့ရသည်။

၂၀၁၇ ခုနှစ် ဇွန် ၉ ရက်တွင်မူ ဂျပန်လွှတ်တော်က ဧကရာဇ် အကီဟီတိုကို ထီးနန်းစွန့်ခွင့်ပေးနိုင်မည့် ဥပဒေကြမ်းတစ်ရပ် ကို ပြဋ္ဌာန်းအတည်ပြုနိုင်ခဲ့သည်။ အဆိုပါ ဥပဒေကြမ်းအရ ဂျပန်ဧကရာဇ် အကီဟီတိုအနေဖြင့် သုံးနှစ်တာကာလ အတွင်း ထီးနန်းစွန့်ခွင့်ရမည်ဖြစ်သည်။ သို့ရာတွင် ထီးနန်းစွန့်လွှတ်လို ကြောင်း ဧကရာဇ်အကီဟီတိုက ကြေညာခဲ့ပြီးချိန်မှစ၍ ပေါ်ပေါက်ခဲ့သည့် အရိုက် အရာဆက်ခံမှုဆိုင်ရာ အငြင်းပွားမှု တစ်ရပ်ကို ဂျပန် လွှတ်တော်က လက်ရှောင်ခဲ့သည်။ အဆိုပါ အငြင်း ပွားမှုမှာ နန်းလျာအမျိုးသားများအပါအ၀င် ဘုရင် မိသားစုလူဦးရေ ကျုံ့ဝင်လာမှုပြဿနာကို မည်သို့ကိုင်တွယ် မည်ဟူသော ပြဿနာဖြစ်သည်။

အချို့ကလည်း ဂျပန်ထီးနန်း၏ အနာဂတ်အတွက် အမျိုးသမီး နန်းလျာများကို ထည့်သွင်းစဉ်းစားရန် အဆိုပြုထားသည်။ သို့ရာတွင် ၁၉၄၇ ခုနှစ် ဂျပန်နန်းတွင်းဥပဒေအရ အမျိုးသမီး များ မှာ ထီးနန်းဆက်ခံခွင့်မရှိသလို သာမန်အရပ်သူ၊ အရပ် သားများနှင့် လက်ထပ်ခဲ့လျှင်ပင် ထီးဘွဲ့နန်းဘွဲ့များ စွန့်လွှတ် ပေးရမည်ဖြစ်သည်။

မည်သို့ဆိုစေ ဂျပန်လွှတ်တော်က ၂၀၁၇ ခုနှစ် ဇွန် ၉ ရက်တွင် အတည်ပြုလိုက်သည့် နန်းစွန့် ဥပဒေကြမ်းအရ ဧကရာဇ် အကီဟီတိုအနေဖြင့် နှစ် ပေါင်း ၂၀၀ ကျော်အတွင်း ပထမ ဆုံးနန်းစွန့် ဂျပန်ဧကရာဇ်အဖြစ် မှတ်တမ်းဝင်တော့မည် ဖြစ်သလို အစဉ်အလာယဉ်ကျေးမှုအရ ပုရိသနန်းလျာများသာ ဆက်ခံခွင့်ရှိသည့် ဂန္ဓမာနန်းပလ’င်ကို အိမ်ရှေ့ စံမင်းသားကြီး နာရုဟီတိုက စိုးစံပါလိမ့်မည်။

သဲကန္တာရဧကရာဇ်များ၏ ထီးရိုးနန်းရိုး အပြောင်းအလဲ (၂၀၁၇ ခုနှစ် ဇွန် ၂၁ ရက်)

၂၀၁၇ ခုနှစ် မေလကို ရွေးကောက်ပွဲများ စိုးမိုးသည့်လဟု ဆိုလျှင် ဇွန်လကို နန်းရေးနန်းရာများက စိုးမိုးသည့်လဟု ခေါ်ရပေလိမ့်မည်။

၂၀၁၇ ခုနှစ် ဇွန် ၂၁ ရက်တွင် ဆော်ဒီအာရေဗျဘုရင်ဆယ်လ် မန်က တူတော် မိုဟမ်မက်ဘင်နာယက်မ်ကိုအိမ်ရှေ့စံမင်းသား အဖြစ်မှ အရာနုတ်ပယ်၍ အသက် ၃၁ နှစ်အရွယ်သားဖြစ်သူ မင်း သားမိုဟမ်မက်ဘင်ဆယ်လ်မန်ကို အိမ်ရှေ့စံအဖြစ် အစားထိုးနေရာပေးလိုက်သည်။ အိမ်ရှေ့မင်းသား အပြောင်း အလဲနှင့် ပတ်သက်၍ ဆော်ဒီဘုရင့် နန်းတော်၏ သန်းခေါင်ယံ ကြေညာချက်ကြောင့် ဆော်ဒီအာရေဗျတစ်နိုင်ငံလုံး လှုပ်လှုပ် ရှားရှားဖြစ်ခဲ့ရသည်။ ဇွန် ၂၁ ရက်တွင်ဆော်ဒီဘုရင့်နန်းတော် က ဆက်တိုက်ထုတ်ပြန်ခဲ့သောကြေညာချက်များအရ အသက် ၃၁ နှစ်အရွယ် အိမ်ရှေ့စံသစ်မင်းသားဘင်ဘယ်လ်မန်သည် ဒုတိယ၀န်ကြီးချုပ်ရာထူးအဖြစ် လက်ရှိရယူထားသည့် ကာကွယ်ရေးဝန်ကြီး တာဝန်ကိုလည်း ဆက်လက်ထမ်းဆောင် မည်ဖြစ်သည်။

ချမ်းသာကြွယ်ဝသော၊ တစ်ဦးကိုတစ်ဦး နောက်ကျောဓားဖြင့် ထိုးနေကြသည့် မင်းညီမင်းသားဖြင့် စုဖွဲ့ထားသော ဆော်ဒီ ဘုရင့်မိသားစုသည် ဓနဥစ္စာနှင့် ရေနံကိုအားပြု၍ အရှေ့ အလယ်ပိုင်း နိုင်ငံရေးလောကကို ထိန်းချုပ်ရန် လက်ရှိတွင် ကြိုးပမ်းလျက်ရှိရာ ဆော်ဒီနန်းတွင်း အပြောင်းအလဲများသည် အဓိကမဟာမိတ် အမေရိကန်ပြည်ထောင်စုနှင့် အရှေ့အလယ် ပိုင်းဒေသတစ်ခုလုံးအတွက်ပါ စောင့်ကြည့်ရတော့မည့် အပြောင်းအလဲ ဖြစ်လာခဲ့ရသည်။

ဆော်ဒီအာရေဗျ၏ အဓိကမဟာမိတ်ဖြစ်သော အမေရိကန် ပြည်ထောင်စု၏ အရှေ့အလယ်ပိုင်းဒေသဆိုင်ရာ ဦးစားပေး မူဝါဒများမှာ ဒေသတည်ငြိမ်ရေးနှင့် ဒေသတွင်းဖြစ်စဉ်များအား ခန့် မှန်းရလွယ်ကူမည့် အခြေအနေဖန်တီးထားရေးဖြစ်သည်။ သို့ဖြစ်ရာ အမေရိကန်၏ အစဉ်အလာ မဟာမိတ်မင်းသားကြီး မိုဟမ်မက်ဘင်နာယက်ဖ် နေရာပျောက်၍ အတွေ့အကြုံ ပိုနည်းသည့် မင်း သားဘင်ဆယ်လ်မန် အိမ်ရှေ့မင်းသား ဖြစ်လာခြင်းကြောင့် အမေရိကန်အစိုးရ၏ လက်ရှိအရှေ့ အလယ်ပိုင်းဒေသဆိုင်ရာ မူဝါဒများ ပျက်စီးသွားနိုင်သည်။ သို့ဖြစ်ရာ သံတမန်လောကွတ်အရ အိမ်ရှေ့မင်းသားသစ် ဘင်ဆယ်လ်မန်ကို ၀မ်းမြောက်စကား၊ ဂုဏ်ယူစကား ပြောခဲ့ရသည့်တိုင် အမေရိကန်ပြည်ထောင်စုအနေဖြင့် အရှေ့အလယ်ပိုင်း ဒေသ၏ နိုင်ငံရေးဒီရေအတက်အကျများ ပိုမိုပြင်း ထန်လာမည့်အရေးကို မျှော်လင့်ထားရမည်သာ ဖြစ်သည်။ ဥပမာအားဖြင့် အီရန်နှင့်ဆော်ဒီ ဆက်ဆံရေး ပုံစံမျိုးဖြစ်သည်။ အိမ်ရှေ့စံသစ်မင်းသား ဘင်ဆယ်လ်မန်သည် အီရန်နိုင်ငံအပေါ် သဘောထားတင်းမာသူဖြစ်ရာ နဂိုကပင် တစ်ဖက် နှင့်တစ်ဖက် ခပ်ချဉ်ချဉ်ဖြစ်နေသည့် အီရန်နှင့် ဆော်ဒီနှစ်နိုင်ငံဆက်ဆံရေး ပိုဆိုးလာနိုင်သည်။

တစ်ဖန် အိမ်ရှေ့မင်းသားသစ် ဘင်ဆယ်လ်မန်သည် မင်းပျိုမင်းလွင်တို့၏ အားမာန်မျိုးဖြင့် အရှေ့အလယ်ပိုင်း ဒေသ၌ ဆော်ဒီအာရေဗျကို စိန်ခေါ်သူမရှိသည့် ဆွန်နီမဟာမိတ်အုပ်စုကို ချဲ့ထွင်ရန် ကြိုးစားလာခဲ့ပါက ဒေသတွင်း၌ အန္တရာယ်ကြီးမားလှသော အတွက်အချက် မှားယွင်းမှုများ ပေါ်ထွက်လာနိုင်သည်။

လက်ရှိအချိန်တွင် အိမ်ရှေ့စံသစ်ဘင်ဆယ်လ်မန်သည် အမျိုးသမီးများကို ကားမောင်းခွင့်ပေးခြင်းကဲ့သို့သော လူမှုရေးပြုပြင်ပြောင်းလဲမှုများနှင့် စီးပွားရေးပြုပြင်ပြောင်း လဲမှုများအား ဖော်ဆောင်ရန် ကြိုးပမ်းနေသည့်တိုင် ၂၀၁၇ ခုနှစ် ဇွန် ၂၁ ရက် ဆော်ဒီနန်းတွင်းအပြောင်းအလဲများ၏ အကျိုးသက်ရောက်မှုသည် ချက်ချင်းရောက်မလာ နိုင်သေးပါ။ သို့ဖြစ်ရာ ဇွန် ၂၁ ရက် ဆော်ဒီနန်းတွင်း အပြောင်းအလဲအကျိုး သက်ရောက်မှု ရုပ်လုံးပီပြင်လာချိန်ကို စောင့်ကြည့်ရပေဦး
မည်။

 

-Ads-
-Ads-