၂၀၁၇ ခုနှစ် ကမ္ဘာ့သတင်းမှန်ကူကွက်များ(အောက်တိုဘာ)

 

“သမ္မတ ရှီကျင်းပင်သည်အောက်တိုဘာ၂၅ ရက်တွင် ကွန်မြူနစ်ပါတီ ပေါ်လစ်ဗျူရိုကော်မတီဝင်များကို ရွေးချယ်ခဲ့ရာ၎င်း၏အရိုက်အရာကို ဆက်ခံနိုင်မည့်သူအား ရွေးချယ်ထည့်သွင်းထားခြင်း မရှိသောကြောင့် ရှီကျင်းပင်ခေတ်သည် ၂၀၂၂ ခုနှစ်ကို ကျော်လွန်၍ ၂၀၂၇ ခုနှစ်အထိ ရောက်သွားနိုင်ကြောင်းလေ့လာသူတို့က သုံးသပ်ထားကြသည်။”

ကြယ်တာရာဧည့်သည်ကြီးနှင့် နေစကြ၀ဠာ

(၂၀၁၇ ခုနှစ် အောက်တိုဘာ ၁၉)

-Ads-
-Ads-

၂၀၁၇ ခုနှစ် အောက်တိုဘာ ၁၉ ရက်တွင် အမေရိကန် ပြည်ထောင်စု ဟာဝိုင်ယီကျွန်းအခြေစိုက်နက္ခတ္တရူပသိပ္ပံ အင်စတီကျုကြယ်ကြည့်သူများသည် Pan-STARRS 1 အမည်ရှိ ရေဒီယို တယ်လီစကုပ်စနစ်ဖြင့် နေစကြ၀ဠာအတွင်း သို့ မမျှော်လင့်ဘဲ အလည်ရောက်လာသော ကြယ်တာရာ ဟင်းလင်းပြင်ခရီးသည်ကြီးတစ်ဦးကို တွေ့ရှိ ခဲ့ရသည်။ ဟာဝိုင်ယီကျွန်း ဌာနေတိုင်းရင်းသားများ ၏ ဘာသာစကားဖြင့် အိုမူအာမူအာဟု အမည်ပေးထားသော အဆိုပါကြယ်တာရာ ခရီးသည် ဂြိုဟ်သိမ်ကြီးသည် နိုင်ငံတကာနက္ခတ္တရူပဗေဒ ပညာရှင် များအတွက် စဉ်းစားရခက်လှသည့် ပုစ္ဆာများကိုပါ တစ်ပါတည်း သယ်ယူလာခဲ့သည်။

 

တစ်နာရီလျှင် မိုင်ပေါင်း ၈၅၀၀၀ နှုန်းဖြင့် နေစကြ၀ဠာအတွင်း ချင်းနင်းဝင်ရောက်လာသည့် အိုမူအာမူအာ ဂြိုဟ်သိမ်သည် အနံထက် အလျား ပိုရှည်သော ဆေးပြင်းလိပ်သဏ္ဌာန် အနီမှိုင်းမှိုင်း အာကာသဒြပ်တုကြီးဖြစ်သည်။ အမေရိကန် သိပ္ပံ စာရေးဆရာ အာသာစီကလပ်၏ “ရာမနှင့်တွေ့ဆုံခြင်း” အမည်ရှိ သိပ္ပံဆန်းကြယ်ဝတ္ထုမှ ရာမအာကာသယာဉ်နှင့် အလားတူသော အိုမူအာမူအာဂြိုဟ်သိမ်ကို ပထမဆုံး စတင် တွေ့ရှိပြီး ရက်ပိုင်းအတွင်းမှာပင်အခြား ကြယ်စုတစ်ခုကို နေစကြ၀ဠာအတွင်းသို့အလည် လွန်လာသော ပထမဆုံး အာကာသဒြပ်တုအဖြစ် သတ်မှတ်ခဲ့ကြသည်။

သို့ရာတွင် ဟာဝိုင်ယီဘာသာစကားအရ “ဝေးလံသည့် အတိတ်တစ်နေရာမှ ရောက်ရှိလာသည့် အထောက်တော်” ဟူ၍ အဓိပ္ပာယ်ရသော အိုမူအာမူအာ ဂြိုဟ်သိမ်ကြီးသည် နိုင်ငံတကာနက္ခတ္တရူပသိပ္ပံပညာရှင်များအကြားတွင် ကမ္ဘာခြား သက်ရှိ များဆိုင်ရာ ဒီဘိတ်တစ်ခုကိုလည်း ချန်ထားရစ်ခဲ့ သည်။ ကမ္ဘာကျော် သီအိုရီရူပဗေဒပညာရှင် စတီဖင်ဟော့ ကင်းကဲ့သို့သော သိပ္ပံပညာရှင်များအပါအ၀င် ထိပ်တန်းသိပ္ပံ ပညာရှင်အချို့က အိုမူအာမူအာဂြိုဟ်သိမ်သည် ရုပ်ဖျက်ထား သည့် ကြယ်တာရာ၊ ဟင်းလင်းပြင်ဖြတ်အာကာသယာဉ် တစ်စင်းဖြစ်နိုင်ကြောင်း အဆိုပြုခဲ့ကြသလို အချို့သောသိပ္ပံ ပညာရှင်များကလည်း အိုမူအာမူအာ ဂြိုဟ်သိမ်သည် ကြယ်များ၏ ဖြာထွက်ရောင်ခြည် ဒဏ်ကိုခံနိုင်သောဇီဝသံချပ် ကာတစ်မျိုးကို ခြုံလွှမ်းထားသည့် အာကာသဒြပ်ထုတစ်ခုသာ ဖြစ်နိုင်ကြောင်း အဆိုပြုထားသည်။

မည်သို့ဖြစ်စေ မမျှော်လင့်သည့်အချိန်တွင်အလည်ရောက်လာ သည့် ကြယ်တာရာခရီးသည် ကြီး အိုမူအာမူအာဂြိုဟ်သိမ်ကား မကြာမီကာလ အတွင်း နေစကြ၀ဠာကို ဖောက်ထွက်၍ မဆုံးတမ်းသော ကြယ်တာရာဟင်းလင်းပြင်ခရီးကို ဆက်နှင် ပါလိမ့်ဦးမည်။

ဆာမူရိုင်းတစ်ဦး၏ဓားကွက် သို့မဟုတ် ဂျပန် ရွေးကောက်ပွဲ

(၂၀၁၇ ခုနှစ် အောက်တိုဘာ ၂၂ ရက်)

လက်ရှိအာဏာရ လစ်ဘရယ် ဒီမိုကရက်တစ်ပါတီ၏ ခေါင်း ဆောင်ဝန်ကြီးချုပ်ရှင်ဇိုအဘေး သည် စက်တင်ဘာလအတွင်း ပါလီမန်လွှတ်တော် ကို ဖျက်သိမ်းခဲ့ပြီး လွှတ်တော်ရွေး ကောက်ပွဲများကို ပုံမှန်ထက်စော၍ အောက်တိုဘာ ၂၂ ရက် တွင် ကျင်းပမည် ဖြစ်ကြောင်း ကြေညာခဲ့သည်။ ဂျပန် စီးပွားရေးဖွံ့ဖြိုးမှုနှုန်း အရှိန်တန့်နေမှုကြောင့် လူထုထောက်ခံ မှု ကျဆင်းလာချိန်၊ မြောက်ကိုရီးယားနျူကလီးယားနှင့်ဒုံးကျည် ခြိမ်းခြောက်မှုကဲ့သို့သော အမျိုးသားလုံခြုံရေးအကျပ်အတည်း နှင့် ရင်ဆိုင်နေရချိန်တွင် ဂျပန်ဝန်ကြီးချုပ် ရှင်ဇိုအဘေး၏ အထက်ပါလုပ်ဆောင်ချက်သည် ဆာမူရိုင်းတစ်ဦး၏ ဓားကွက် ကဲ့သို့ပင်တိကျလှသည်။

၂၀၁၇ ခုနှစ် အောက်တိုဘာ ၂၂ ရက် ရွေးကောက်ပွဲ၌ တိုကျို အုပ်ချုပ်ရေးမှူး ယူရီကိုကို အီကီကို မဏ္ဍိုင်ပြုထားသည့် မျှော်လင့်ချက်ပါတီ၊ ယူကီအို အီဒါပီ ဦးဆောင်သော စည်းမျဉ်း ခံဂျပန် ဒီမိုကရက်တစ်ပါတီ(စီဒီပီဂျေ) တို့ကဲ့သို့သော စိန်ခေါ် သူများ ရှိနေသည့်တိုင် ၀န်ကြီးချုပ် ရှင်ဇိုအဘေး၏ လစ်ဘရယ် ဒီမိုကရက်တစ်ပါတီသည် ဂျပန်ဒိုင်းယက်လွှတ်တော် (အောက် လွှတ်တော်)၏ အမတ်နေရာ သုံးပုံနှစ်ပုံကို ရရှိခဲ့ပြီး လွှတ်တော် ဥပဒေပြုရေးလုပ်ငန်းစဉ်များကို ဆက်လက်ထိန်းချုပ်ခွင့်ရခဲ့ သည်။ သို့ဖြစ်ရာ ၀န်ကြီးချုပ် ရှင်ဇိုအဘေးနှင့် လက်ရှိအာဏာ ရလစ်ဘရယ်ဒီမိုကရက်တစ်ပါတီတို့သည် ဂျပန်စီးပွားရေး ပြဿနာနှင့် မြောက်ကိုရီးယားပြဿနာတို့ကိုတုံ့ပြန်ကျော်လွှား ရေး အတွက် လုပ်ပိုင်ခွင့်အာဏာကို ဆက်လက်ဆုပ်ကိုင်နိုင်ခဲ့ သည်။

ဂျပန်ဝန်ကြီးချုပ်ရှင်ဇိုအဘေးသည် အထက်တွင်ဖော်ပြခဲ့ပြီးဖြစ် သော စီးပွားရေးပြဿနာနှင့် လုံခြုံရေးပြဿနာနှစ်ရပ်ကို ကျော်လွှားနိုင်ရန် ၀န်ကြီးချုပ်ရာထူး တတိယသက်တမ်းကို ဆက်လက် ရယူနိုင်ရန် လိုအပ်သည်။ အောက်တိုဘာ ၂၂ ရက် လွှတ်တော် ရွေးကောက်ပွဲသည် ပုံမှန်ထက်စောခေါ်သည့် ရွေးကောက်ပွဲဖြစ်ရာ သဘာဝအားဖြင့် ရွေးကောက်ပွဲကျင်းပ ရေးအတွက် အချိန်ကာလကို ၀န်ကြီးချုပ်ကသတ်မှတ်ပိုင်ခွင့် ရှိသည်။ ထိုအချက် ကို အသုံးချ၍ ဂျပန်ဝန်ကြီးချုပ်ရှင်ဇို အာဘေးသည် ရွေးကောက်ပွဲ ကျင်းပမည့်ကာလကို ၎င်း အတွက် နိုင်ငံရေးအရ အရေးသားဆုံးအချိန်၊ လူထုထောက်ခံမှု မြင့်တက်လာချိန်တို့နှင့် အချိန်ကိုက်ရွေးချယ်သတ်မှတ်ခဲ့ခြင်း ဖြစ်သည်။

ဆာမူရိုင်းတစ်ဦး ဓားကွက်ခင်းချိန်တွင် နောက်ဆက်တွဲ အကျိုးဆက်များ ရှိလာတတ်ပါသည်။ အောက်တိုဘာ ၂၂ ရက် ရွေးကောက်ပွဲ ကြောင့် ၀န်ကြီးချုပ်ရာထူး တတိယသက်တမ်း ဆက်လက်ရယူရန် သေချာသွားပြီဖြစ်သည့် ဂျပန် ၀န်ကြီးချုပ် ရှင်ဇိုအဘေးအနေဖြင့် ၎င်း၏ အဘေးနောမစ် (Abenomic) စီးပွားရေးမူဝါဒကို အကောင်အထည်ဖော်ရန်နှင့် ဂျပန်၏ စစ်ရေးမူဝါဒအပြောင်းအလဲအတွက် စစ်လွန်ခေတ်ဖွဲ့စည်းပုံ အခြေခံဥပဒေကို ပြုပြင်ပြောင်းလဲရန် အခွင့်အရေးဖန်တီးနိုင် တော့မည်ဖြစ်သည်။

အထူးသဖြင့် စစ်လွန်ခေတ် ဖွဲ့စည်းပုံအခြေခံဥပဒေပါကာကွယ် ရေးမူဝါဒများအား ပြုပြင်ပြောင်းလဲရေးအစီအစဉ်သည် အငြင်းပွားဖွယ်ဖြစ်ရသည့်တိုင် ၂၀၁၇ ခုနှစ် အောက်တိုဘာ ၂၂ ရက် ရွေးကောက်ပွဲရလဒ်အရ ဖွဲ့စည်းပုံပြုပြင် ပြောင်းလဲ ရေးကို လိုလားသော လစ်ဘရယ်ဒီမို ကရက်တစ်ပါတီနှင့် တွဲဖက်ပါတီဖြစ်သည့် ကိုဖီအီတိုပါတီတို့က ဂျပန်အောက် လွှတ်တော်ကိုလူများစုဖြင့် ထိန်းချုပ်ထားနိုင်ပြီဖြစ်ရာ ဂျပန်နိုင်ငံ၏ လုံခြုံရေးမူဝါဒအပြောင်းအလဲသည် လက်တွေ့ အားဖြင့် နီးစပ်လာခဲ့ပြီဖြစ်သည်။

တရုတ်ဆိုရှယ်လစ်ဝါဒ ခေတ်သစ်နိဒါန်း

(၂၀၁၇ ခုနှစ် အောက်တိုဘာ ၂၄ ရက်)

လူဦးရေ ၁ ဒသမ ၃ ဘီလီယံရှိသော တရုတ်ပြည်ကြီး၏ အနာဂတ်နိုင်ငံရေးလမ်းစဉ်များကို ချမှတ်ခဲ့သည့် (၁၉) ကြိမ် မြောက် တရုတ်ကွန်မြူနစ် ပါတီ အထွေထွေညီလာခံသည် ၂၀၁၇ ခုနှစ် အောက်တိုဘာ ၂၄ ရက်တွင် အောင်မြင်စွာ အဆုံး သတ်ခဲ့ပြီဖြစ်သည်။ (၁၉) ကြိမ်မြောက် တရုတ် ကွန်မြူနစ်ပါတီညီလာခံ၏ နောက်ဆုံးနေ့ရက်များတွင် ညီလာခံကိုယ်စားလှယ်များသည် လက်ရှိသမ္မတရှီကျင်းပင်၏ ဆိုရှယ်လစ်ဝါဒ အတွေးအခေါ်နှင့် လမ်းညွှန်ချက်များကို အမည်နာမနှင့်တကွ ကွန်မြူနစ်ပါတီပဋိညာဉ်၌ ထည့်သွင်းရန် တညီတညွတ်တည်း ဆုံးဖြတ်ခဲ့ကြသည်။ တစ်နည်း အားဖြင့် သမ္မတရှီကျင်းပင်ကို ကွယ်လွန်သူ တရုတ်ခေါင်းဆောင်ကြီး များ ဖြစ်ကြသည့် မော်စီတုန်းနှင့် တိန့်ရှောင်ဖိန်တို့နည်းတူ မျက်မှောက်ခေတ် တရုတ် နိုင်ငံရေးသမိုင်းတွင်နေရာပေးလိုက် ကြခြင်းဖြစ်သည်။

သို့ရာတွင် သမ္မတရှီကျင်းပင်၏ “တရုတ် စရိုက်လက္ခဏာ သက်ဝင်သော ဆိုရှယ်လစ်ဝါဒခေတ်သစ်” အတွေးအခေါ်ကို တရုတ်၏ကွန်မြူနစ် ပါတီ၏ ပဋိညာဉ်၌ ထည့်သွင်းလိုက်ခြင်း သည် သမ္မတရှီကျင်းပင်အနေဖြင့် သမ္မတရာထူး ဒုတိယ သက်တမ်းကုန်ဆုံးချိန် ၂၀၂၂ ခုနှစ် အလွန်ကာလအထိ တရုတ်နိုင်ငံကို ဦးဆောင်ခွင့်ရရေးအတွက် လမ်းဖွင့်ပေးလိုက် ခြင်အဖြစ် လေ့လာသူအချို့က သုံးသပ်ခဲ့ကြသည်။ သမိုင်းကို ပြန်ကြည့်လျှင် တရုတ် ကွန်မြူနစ်ပါတီ စတင်ဖွဲ့စည်း တည် ထောင်ချိန် ၁၉၂၁ ခုနှစ်မှစ၍ သမ္မတရှီကျင်းပင်လက်ထက် မတိုင်မီအထိ ခေါင်းဆောင်ကြီးမော်စီတုန်းသည်သာကွန်မြူနစ် ပါတီပဋိညာဉ်တွင် မော်အတွေးအခေါ်ဟုခေါ်သည့် ဆိုရှယ်လစ် ၀ါဒအတွေးအခေါ်များ ထည့်သွင်းခြင်းဖြင့် သက်ရှိထင်ရှား ဂုဏ်ပြုခံခဲ့ရသော တစ်ဦးတည်းသော ခေါင်းဆောင်ဖြစ်သည်။ တရုတ်စီးပွားရေး ပြုပြင်ပြောင်းလဲမှုကို ဦးဆောင်ခဲ့သူ ခေါင်း ဆောင်ကြီး တိန့်ရှောင်ဖိန်သည် ကွယ်လွန်ပြီးနောက်မှသာ ၎င်းင်း၏အတွေးအခေါ် များကို ကွန်မြူနစ်ပါတီပဋိညာဉ်အတွင်း အမည်နှင့်တကွ ထည့်သွင်းဂုဏ်ပြုခံခဲ့ရခြင်း ဖြစ်သည်။

တစ်ဖန် (၁၉) ကြိမ်မြောက် ကွန်မြူနစ်ပါတီ ညီလာခံ၌ သြဇာ အာဏာကို မော်ခေတ်အလွန် နောက်ပိုင်းအခိုင်မာဆုံး စုစည်း နိုင်ခဲ့သည့် သမ္မတ ရှီကျင်းပင်သည် အောက်တိုဘာ ၂၅ ရက် တွင် ကွန်မြူနစ်ပါတီ ပေါ်လစ်ဗျူရိုကော်မတီဝင်များကို ရွေးချယ်ခဲ့ရာ ၎င်း၏အရိုက်အရာကို ဆက်ခံနိုင်မည့်သူအား ရွေးချယ်ထည့်သွင်းထားခြင်း မရှိသောကြောင့် ရှီကျင်းပင် ခေတ်သည် ၂၀၂၂ ခုနှစ်ကို ကျော်လွန်၍ ၂၀၂၇ ခုနှစ်အထိ ရောက်သွားနိုင် ကြောင်း လေ့လာသူတို့က သုံးသပ်ထားကြ သည်။

မည်သို့ဖြစ်စေ (၁၉) ကြိမ်မြောက် တရုတ်ကွန်မြူနစ်ပါတီ ညီလာခံရလဒ်များအရ သမ္မတရှီကျင်းပင်၏ နိုင်ငံရေးသက် မည်မျှအထိ သက်တမ်း ရှည်နိုင်သည်ဟူသော ထင်ကြေးများ ထက်ပို၍ အားကြီးသောအရာမှာ သူ၏ဆိုရှယ်လစ်ဝါဒသစ် ဖြစ်သည်။ (၁၉) ကြိမ်မြောက် ကွန်မြူနစ်ပါတီ ညီလာခံ ကျင်းပ ခဲ့သော မော်စီတုန်းခေတ် ပြည်သူ့မဟာခန်းဆောင်ကြီး၏ နံရံ များတွင်မူ သမ္မတရှီကျင်းပင်၏ တရုတ်စရိုက်လက္ခဏာ သက်ဝင်သော ဆိုရှယ်လစ်ဝါဒခေတ်သဘောတရားမှာ ပဲ့တင် ထပ်၍နေခဲ့လေပြီ။

စပိန်ဖွဲ့စည်းပုံ အကျပ်အတည်းနှင့် ဥရောပ၏ ဘီလူးစီး အိပ်မက်

(၂၀၁၇ ခုနှစ် အောက်တိုဘာ ၂၇ ရက်)

၂၀၁၇ ခုနှစ် အောက်တိုဘာ ၂၇ ရက်တွင် စပိန်နိုင်ငံ ကာတာ လိုနီးယားဒေသလွှတ်တော်၌ ခွဲထွက်ရေးဝါဒီ လွှတ်တော် အမတ်များက စပိန်ဗဟို အစိုးရကိုဖီဆန်၍ ကာတာလိုနီးယား ဒေသ လွတ်လပ်ရေးကို တရားဝင်ကြေညာခဲ့သည်။ လွတ်လပ် ရေးကြေညာချက် ထွက်ပေါ်အပြီး နာရီပိုင်းအကြာမှာပင် စပိန် ဗဟိုအစိုးရက ကာတာလို နီးယားဒေသလွှတ်တော်နှင့် အစိုးရ အဖွဲ့ကိုဖျက်သိမ်း၍ ယင်းဒေသကို ဗဟိုအစိုးရတိုက်ရိုက် အုပ်ချုပ်မှုအောက်တွင် ထည့်သွင်းလိုက်သည်။ ယင်းနောက် ဒေသန္တရရွေးကောက်ပွဲ ကျင်းပမည့် အချိန်ကို ကြေညာ၍ ကာတာလိုနီးယား ခွဲထွက်ရေးလှုပ်ရှားမှုကို ထိန်းချုပ်ရန် ကြိုးပမ်းခဲ့သည်။ ထိုနည်းအားဖြင့် ခွဲထွက်ရေးဝါဒီများ၏ ဒေသန္တရရွေးကောက်ပွဲ အနိုင်ရလဒ်များကြောင့် စတင်ပေါ် ထွက်လာသည့် ကာတာလိုနီးယား ခွဲထွက်ရေး လှုပ်ရှားမှုနှင့် စပိန်ဖွဲ့စည်းပုံအကျပ်အတည်းသည် ၂၀၁၇ ခုနှစ် အောက် တိုဘာ ၂၇ ရက်တွင် အခေါင် အထွတ်ရောက်ရှိခဲ့သည်။

အောက်တိုဘာ ၁ ရက် ခွဲထွက်ရေး လူထု ဆန္ဒပွဲ၌ အရှိန် တစ်စတစ်စရလာသော ကာတာလို နီးယားခွဲထွက်ရေး ပြဿနာသည် စပိန်နိုင်ငံအတွက် နှစ်ပေါင်း ၄၀ ကြာကာလ အတွင်း အကြီးကျယ်ဆုံး နိုင်ငံရေးအကျပ်အတည်းသာ ဖြစ် သည်။ ထိုနည်းတူ ဥရောပညီညွတ်ရေး ရည်မှန်းချက်ကို ထိန်း ထားနိုင်ရန်အနိုင်နိုင် ကြိုးစားနေရသော ဥရောပသမဂ္ဂအတွက် လည်း စိန်ခေါ်မှုကြီးတစ်ရပ်ဖြစ်လာသည်။ ကာတာလိုနီးယား အကျိုးသက်ရောက်မှုကြောင့် အသစ်အသစ်သော နိုင်ငံငယ် လေးများ ထပ်မံပေါ် ထွက်လာမည့်အရေးသည် နိုင်ငံရေး ဘီလူးစီးအိပ်မက်တစ်ခုသဖွယ် ဥရောပတိုက်ကိုလှန့်နှိုးလိုက်သည်။

သို့တိုင်အောင် ခွဲထွက်ရေးလှုပ်ရှားမှုကို တားဆီးရေးအတွက် စပိန်ဗဟိုအစိုးရက ကျင်းပပေးခဲ့သည့် ကာတာလိုနီးယားဒေသ ကြီးလွှတ်တော် ရွေးကောက်ပွဲများတွင် ခွဲထွက်ရေးလိုလား သည့်ပါတီများကသာ လွှတ်တော်အမတ်နေရာအများစုရယူနိုင် ခဲ့ရာ ကာတာလိုနီးယား ခွဲထွက်ရေး လှုပ်ရှားမှုမြောက်အိပ်မက် ကြောင့် ဥရောပတိုက်လည်း အကြိမ်ကြိမ်လန့်နိုးရပါဦးမည်။

-Ads-
-Ads-