ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) နာယကဗိုလ်မှူးကြီး ခွန်ဥက္ကာနှင့် တွေ့ဆုံခြင်း

“နိုင်ငံရေးဆွေးနွေးပွဲတွေကို အတိုင်းအတာတစ်ခုအထိ လုပ်နိုင်ပေမယ့်လည်း ထင်သလောက် ခရီးမပေါက်ဘူး”

၂၁ ရာစုပင်လုံကို အစိုးရက ဒီဇင်ဘာမှာလုပ်ချင်တယ်။ သူ့ရဲ့ ကတိအတိုင်းပေါ့။ တိုင်းရင်းသားတွေက ဖေဖော်ဝါရီ လမှာ လုပ်ချင်တယ်။ အဲဒီနှစ်ခုစလုံးကို ဘယ်သူကမှ အလိုလိုက်လို့မရဘူး။ အစိုးရကို အလိုလိုက်မယ်ဆိုရင် လုပ်ရကိုင်ရကျပ်တယ်။ တိုင်းရင်းသားကို အလိုလိုက်မယ်ဆိုရင်လည်း အစိုးရသိက္ခာရှိသေးတယ်။ အဲဒါကြောင့် ဇန်န၀ါရီလအလယ်မှာ ဖြစ်သွားတယ်။

မေး။ အရင်ဆုံးအနေနဲ့ ဆရာတို့တိုင်းရင်းသားလက်နက်ကိုင်အဖွဲ့ ရှစ်ဖွဲ့ NCAထိုးပြီးနောက် ငြိမ်းချမ်းရေးလုပ်ငန်းစဉ် တွေကို အကောင်အထည်ဖော်တဲ့အခါမှာ ဘယ်လိုအခက်အခဲမျိုးတွေ ကြုံရသလဲဆိုတာ ပြောပြပေးပါဦး။

-Ads-
-Ads-

ဖြေ။ အခက်အခဲကတော့ အစိုးရအပြောင်းအလဲပဲ။ လက်မှတ်ထိုးခဲ့တဲ့အစိုးရနဲ့ ဆက်သွားရင်တော့ ပိုလွယ်နိုင်တယ်။ အစိုးရပြောင်းလိုက်တဲ့အခါကျတော့ အစိုးရက သူ့ရဲ့ နိုင်ငံရေးလုပ်ဆောင်ချက်တွေ၊ လုပ်ပုံလုပ်နည်းတွေက မတူကြဘူး။ အဲဒီတော့ အစိုးရအသစ်အဟောင်း၊ အစိုးရတွေရဲ့ ဖြစ်ပေါ်လာပုံ၊ သူ့ရဲ့နောက်ခံသမိုင်းတွေက မတူကြတဲ့အခါကျတော့ အစိုးရအပြောင်းအလဲ လေး၊ ငါး၊ ခြောက်လမှာ နည်းနည်းကြန့်ကြာမှုတွေ ဖြစ်ပေါ်ခဲ့တယ်။ အထစ်အငေါ့ရယ် လို့တော့မဟုတ်ပါဘူး။ အချိန်စောင့်ရတာပေါ့။

အဲဒီကနေပြီးတော့ အစိုးရသစ်လက်ထက်မှာ ငြိမ်းချမ်း ရေးလုပ်ငန်းစဉ်တွေကို ဆက်သွားတဲ့အခါကျတော့ ငြိမ်းချမ်း ရေးလုပ်ငန်းစဉ်တွေရဲ့အသက်သွေးကြောက နိုင်ငံရေးဆွေးနွေးပွဲပဲ။ နိုင်ငံရေးဆွေးနွေးပွဲတွေ အောင်မြင်နေမှသာလျှင် ငြိမ်းချမ်းရေးလုပ်ငန်းစဉ် အောင်မြင်တယ်လို့ပြောနိုင်တယ်။ အဲဒီတော့ နိုင်ငံရေးဆွေးနွေးပွဲတွေကို အတိုင်းအတာ တစ်ခုအထိ လုပ်နိုင်ပေမယ့်လည်း ထင်သလောက်ခရီး မပေါက်ဘူးပေါ့ဗျာ။ အဲဒီလိုနိုင်ငံရေးဆွေးနွေးပွဲတွေကို
ချောချောမွေ့မွေ့မလုပ်နိုင်တာကလည်း အခက်အခဲတစ်ခုပဲ။

နောက်မမျှော်လင့်ဘဲနဲ့ တိုင်းပြည်ရဲ့တစ်ထောင့်တစ်နေရာမှာ ရခိုင်အရေးအခင်းတို့လို ဆူပူသောင်းကျန်းမှုတွေဖြစ်ပြီးတော့ နိုင်ငံတကာဖိအားတွေနဲ့ဒေသတွင်းဖိအားတွေကလည်း သွယ်ဝိုက်သောနည်းနဲ့ လာရိုက်ခတ်တာလည်းရှိပါတယ်။ ဒါကိုလည်း အခက်အခဲတွေထဲမှာ ထည့်သွင်းစဉ်းစားလို့ရပါတယ်။

မေး။ လက်ရှိအချိန်အထိ JICMအစည်းအဝေးကို အဆင်ပြေသလို ခေါ်နေတာပဲတွေ့ရတယ်။ အဲဒီတော့ JICM အစည်းအဝေးကို ဘယ်လိုခေါ်ပါဆိုပြီး ဆုံးဖြတ်ထားတာ မရှိဘူးလား။

ဖြေ။ မူလတုန်းက JICM (တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး)ရဲ့ လုပ်ထုံးလုပ်နည်းစာစောင်ရှိပါတယ်။ ToRလို့ခေါ် ပါတယ်။ JICMရဲ့ မူလ ToRမှာတော့ သုံးလလျှင် တစ်ကြိမ်ခေါ်ဖို့ သတ်မှတ်ပါတယ်။ အစိုးရဟောင်းလက်ထက်မှာတော့ ဒုတိယသမ္မတစိုင်းမောက်ခမ်း ဦးဆောင်ပြီးတော့ ကျွန်တော်တို့ JICMခေါ်ဖြစ်တာရှိပါတယ်။ သို့သော် သိပ်မကြာခင်မှာပဲ အစိုးရအပြောင်းအလဲဖြစ်တော့ ခဏရပ်တန့်သွားပါတယ်။ JICM ဖြစ်ပေါ်လာပုံကို ကျွန်တော် နည်းနည်းလေး မိတ်ဆက်ပေးချင်တယ်။ ဘာဖြစ်လို့လဲ ဆိုတော့ JICMကို လူတွေက သိပ်မသိကြဘူး။

ကျွန်တော်တို့ NCCTနဲ့ ဦးအောင်မင်း ဦးဆောင်တဲ့ UPWC တွေ့တုန်းက ဦးအောင်မင်းတို့ကတော့ လက်မှတ်ထိုးပြီးရင် နှစ်ဖွဲ့ပဲတွေ့မယ်။ တစ်ဖွဲ့ကတော့ စစ်ရေးဆိုင်ရာ JMC (ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ)နဲ့ နောက်တစ်ဖွဲ့ကတော့ နိုင်ငံရေးဆိုင်ရာ UPDJC(ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီ)ပေါ့။ နိုင်ငံရေးအလုပ်ကို နိုင်ငံရေးလုပ်၊ စစ်ရေးအလုပ်ကို စစ်ရေးလုပ် နှစ်ခုရှိရင်ရပြီပေါ့ဆိုတဲ့သဘောပေါ့။ ကျွန်တော်တို့က ကန့်ကွက်တယ်။ မရဘူး NCAရဲ့ မူရင်းပိုင်ရှင်တွေက NCAကို အကောင်အထည်ဖော်တဲ့နေရာမှာ မှန်သလား၊ မှားသလားစောင့်ကြည့်ဖို့နဲ့ အပြန်အလှန်ထိန်းကျောင်းဖို့လိုတယ်။

စစ်ရေးမှာ JMCပဲ လွှတ်ထားရင် ဘယ်သူက သူ့ကိုကွပ်ကဲမလဲ။ ကျွန်တော်တို့က နိုင်ငံရေး UPDJCကိုပဲ ကွပ်ကဲမှာ။ ဒါကြောင့် Ownership ကို ပြတဲ့အနေနဲ့ ကျွန်တော်တို့ တောင်းခဲ့တာက JICMမဟုတ်ဘူး။ JICCကို တောင်းခဲ့တာ။ သို့သော် အဲဒီတုန်းက ဦးအောင်မင်းဦးဆောင်တဲ့ UPCCဆို တာရှိနေဆဲကာလပေါ့။ အဲဒီ UPCCရှိနေတော့ ကျွန်တော် တို့က NCA အကောင်အထည်ဖော်ဖို့ JICCလို့ တောင်းလိုက်ရင် သွားပြီးတော့ ပွတ်တိုက်မှုဖြစ်မလားဆိုတာကို ဦးအောင်မင်းက စိုးရိမ်ပြီးတော့ သူက လုံးဝမဖွဲ့ချင်ဘူး။ ဒါပေမဲ့ ကျွန်တော်တို့ သိပ်တောင်းတဲ့အခါကျတော့ ဖွဲ့ပေးမယ်။

ဒါပေမဲ့ ကော်မတီတို့၊ ကောင်စီတို့အထိတော့ မလုပ်ပါနဲ့။ အစည်းအဝေးအဆင့်ပဲလုပ်ပါ။ ဒါကြောင့် Meeting ဖြစ်သွား တယ်။ JICMဆိုပြီး ဖြစ်သွားတယ်။ အစည်းအဝေး အဆင့်ပဲဖြစ်သွားတယ်။ လုပ်ပိုင်ခွင့်ကို လျှော့ချလိုက်တာပေါ့။ အစည်းအဝေးအရကတော့ NCA အကောင်အထည်ဖော်မှုကို ဆုံးဖြတ်ပိုင်ခွင့်ရှိတယ်။ ကြည့်ပေးလို့ရတာပေါ့။

သို့သော် JICMအစည်းအဝေးအဆင့်ဖြစ်တဲ့အတွက် အစည်းအဝေးကာလမှာ အစည်းအဝေးမှာထိုင်ပြီးတော့ ဆုံးဖြတ်ချက်ချရင် ဒီဆုံးဖြတ်ချက်က အာဏာသက်ရောက်မှုရှိတယ်။အစည်းအဝေးမရှိတဲ့အချိန်ဆိုရင် JICMအဖွဲ့ဝင် တွေက သူ့မှာဘာမှလုပ်ပိုင်ခွင့်မရှိဘူး။ အစည်းအဝေးရှိမှပဲ လုပ်ပိုင်ခွင့်ရှိတယ်။ အစည်းအဝေးမရှိရင် လုပ်ပိုင်ခွင့်မရှိဘူး။ အဲဒီပုံစံဖြစ်သွားတာပေါ့။

ကျွန်တော်တို့လည်း အတတ်နိုင်ဆုံးတောင်းဆိုခဲ့ပေမယ့် JICMပဲ ဖြစ်သွားတယ်ဆိုတော့ ဒီအစည်းအဝေးရှိရင် နိုင်ငံရေးဘက်က အားနည်းနေသလား။ ကျွန်တော်တို့ သုံးသပ်လို့ရတယ်။ JICM ဘက်မှာ အားနည်းနေတယ်ဆိုတာ ပြောလို့ရတယ်။ နောက်ပြီး တိုင်းပြည်တစ်ခုလုံးရဲ့ရှေ့ရေးဖြစ်တဲ့ NCA အကောင်အထည်ဖော်တဲ့ နေရာမှာ အားနည်း နေရင် သုံးသပ်လို့ရတယ်။ ဘာကြောင့်လဲဆိုတော့ JICMသာလျှင် အစိုးရ၊ တပ်မတော်နဲ့ တိုင်းရင်းသားလက်နက်ကိုင် အဖွဲ့တွေရဲ့ တရားဝင်အစည်းအဝေးဖြစ်တယ်။ ဒီအစည်းအဝေးမှာ နိုင်ငံရေးပါတီမပါဘူး။ NCAလက်မှတ်ထိုးထားတဲ့ ပိုင်ရှင်တွေပဲ ပါရမယ်လို့ ပြောထားတယ်။ ပိုပြီးတော့ လုပ်ပိုင်ခွင့်မြင့်တဲ့ အဖွဲ့ဖြစ်တာပေါ့။ အဲဒီတော့အစည်းအဝေး အနေနဲ့ပဲ ကျွန်တော်တို့ လက်ခံခဲ့ရတော့ ဒီအစည်းအဝေးကို ဆက်ထိန်းခဲ့ရာမှာ အစိုးရ သစ်လက်ထက်ရောက်တော့ JICMရဲ့ အရေးပါမှုကို သိပ် သဘောမပေါက်ဘူး။ လိုရဲ့လားပေါ့။

ကျွန်တော်တို့က အစိုးရသစ်လက်ထက်မှာလည်း JICMကို အဆင့်မြှင့်ချင်တယ်။ မြှင့်ချင်တဲ့အကြောင်းကိုလည်း အစိုးရသစ်လက်ထက်မှာ ပြန်ပြောကြည့်တယ်။ ဒါပေမဲ့ အစိုးရသစ်က JICMမူလအတိုင်းကိုပဲ သူ့ရဲ့အသုံးဝင်မှုကို သဘောမပေါက်ဘူး။ သဘောမပေါက်တော့ မကိုင်တွယ်နိုင်ဘူးပေါ့။

ဒါကြောင့် ကျွန်တော်တို့က တဖြည်းဖြည်းနဲ့ JICMဟာ အရေးကြီးတယ်။ JICMအစည်းအဝေးမှာပဲ နိုင်ငံရေး ဆုံချက်ရှိတယ်။ ဆွေးနွေးလို့ရတယ်။ ဒါကြောင့် JICMကို မဖြစ်မနေခေါ်ပါလို့ ကျွန်တော်တို့တောင်းတဲ့အခါကျမှ မနှစ်ကစပြီးတော့ JICM စခေါ်တယ်။ ဒီနှစ်ထဲမှာတော့ ကျွန်တော်တို့ ဖေဖော်ဝါရီလထဲမှာ တစ်ကြိမ်ခေါ်တယ်။ နောက်ဧပြီလထဲမှာ တစ်ကြိမ်ခေါ်တယ်။ နောက် မေ ၂၄ရက်မှာ ကျွန်တော်တို့ရဲ့ ညီလာခံဖြစ်သွားတယ်။ ပြီးတော့ အောက်တိုဘာထဲမှာ ကျွန်တော်တို့ရဲ့ နှစ်ပတ်လည်ဖြစ်သွားတယ်။ နောက်ပိုင်းမှာ JICMကို မခေါ်ဖြစ်ဘူး။

နောက်ဆုံးမှာ လွန်ခဲ့တဲ့ နိုဝင်ဘာလက JICMခေါ်တယ်။ JICMက အခရာကျတယ်ဆိုတာက အဲဒီမှာ တပ်မတော်က ပါတယ်။ တရားဝင်ကာကွယ်ရေးဦးစီးချုပ် သို့တည်းမဟုတ် ဒုကာကွယ်ရေးဦးစီးချုပ်အဆင့်ပါတယ်။ နောက်နိုင်ငံတော် အကြီးအကဲ ဒေါ်အောင်ဆန်းစုကြည်ကိုယ်တိုင်ပါတယ်။ နောက်ကျွန်တော်တို့ တိုင်းရင်းသားလက်နက်ကိုင်တွေ ဘက်ကလည်း အကြီးအကဲရှစ်ယောက်ပါတယ်။ အဲဒီလိုပါတဲ့အတွက် အဆုံးအဖြတ်တွေဟာ လိုက်နာဖို့လိုတာပေါ့။

ဒါကြောင့် နောက်ဆုံး JICMက ပြောတယ်။ ၂၁ ရာစုပင်လုံကို အစိုးရက ဒီဇင်ဘာမှာ လုပ်ချင်တယ်။ သူ့ရဲ့ကတိ အတိုင်းပေါ့။ တိုင်းရင်းသားတွေက ဖေဖော်ဝါရီလမှာ လုပ်ချင်တယ်။ အဲဒီနှစ်ခုစလုံးကို ဘယ်သူကမှ အလိုလိုက်လို့မရဘူး။ အစိုးရကို အလိုလိုက်မယ်ဆိုရင် လုပ်ရကိုင်ရကျပ်တယ်။ တိုင်းရင်းသားကို အလိုလိုက်မယ်ဆိုရင်လည်း အစိုးရသိက္ခာ ရှိသေးတယ်။ အဲဒါကြောင့် ဇန်န၀ါရီလအလယ်မှာ ဖြစ်သွား တယ်။ JICMအဆုံးအဖြတ်ဖြစ်တဲ့အပြင် စစ်တပ်ကလည်း ပါပြီးသားဖြစ်နေတော့ အားလုံးက လိုက်နာဖို့လိုသွားတာပေါ့။ ဒါဟာ JICMရဲ့ အရေးပါမှုဖြစ်တယ်။

ဒါကြောင့် ဒီတစ်ခေါက် JICMမှာ ကျွန်တော်တို့ ဆုံးဖြတ်လိုက်တာက မူလသတ်မှတ်ထားတဲ့အတိုင်း သုံးလလျှင် တစ်ကြိမ်တွေ့ဖို့ အစိုးရကလက်ခံလိုက်တယ်။ အရင်ကတော့ အစိုးရက နိုင်ငံရေးအရ လိုအပ်မှတွေ့တာ။ အခုတော့ သူတို့သဘောပေါက်သွားပြီ။ အဲဒီတော့ နိုဝင်ဘာ ၂၇ရက်မှာ ဒါကိုဆုံးဖြတ်လိုက်တဲ့အတွက် ဖေဖော်ဝါရီ ၂၇ ရက်မှာ သုံးလပြည့်မယ်။ ဒါကြောင့် ၂၇ရက်လို့တော့ မသတ်မှတ်ဘူး။ ဖေဖော်ဝါရီလ နောက်ဆုံးပတ်မှာ JICM ခေါ်မယ်။ နောက်ဆို သုံးလတစ်ကြိမ်ပုံမှန်ခေါ်မယ်။ ဟိုနားနည်းနည်း၊ ဒီနားနည်း နည်းဖြစ်နေတဲ့အဖြစ်အပျက်တွေကို စုပြီးတော့ အလွတ်ပြော နေကြမယ့်အစား တရားဝင်အစည်းအဝေးမှာ ပြဿနာကတော့ ဒီလိုဖြစ်နေပြီ။ ဒါတွေကို ဘယ်လိုရှင်းမလဲ။
ပြဿနာတွေကို တစ်၊ နှစ်၊ သုံး၊ လေးထိုးပြီး ပြောကြမှာပေါ့။ အဲဒီတော့ ဒီသုံးလတစ်ကြိမ်ကို အစိုးရက မူအားဖြင့် လက်ခံလိုက်ပြီ။ လက်တွေ့အကောင်အထည်ဖော်ဖို့ပဲလိုတယ်။ လူတွေက JICM ကို သိပ်မသိကြဘူး။ JICMဟာ NCAကို အကောင်အထည်ဖော်တဲ့နေရာမှာ ထိန်းကျောင်းတဲ့ အစုအဖွဲ့ဖြစ်တယ်။ (ဆက်လက်ဖော်ပြပါမည်)

-Ads-
-Ads-