ရခိုင်ပြည်နယ်မှ ကင်းချောင်းတံတား ကျပ်သန်း ၂၀၀၀ ဖြင့် တည်ဆောက်နေ

စစ်တွေ၊ ဇန်နဝါရီ-၂၆

ရခိုင်ပြည်နယ် လမ်းဦးစီးဌာနပိုင် ဇင်ချောင်း-ကင်းမြောက်လေးထောင့်လမ်းပေါ်မှ တံတားဖြစ်သည့် ကင်းချောင်းတံတားကို ဒေသခံပြည်သူများ၏ တောင်းဆိုချက်အရ ၂၀၁၇-၂၀၁၈ ဘဏ္ဍာနှစ်တွင် ပြည်ထောင်စုရန်ပုံငွေ ကျပ်သန်း ၂၀၀၀ ဖြင့် ဆောက်လုပ်ရေးဝန်ကြီးဌာန တံတားဦးစီးဌာန တံတားအထူးအဖွဲ့ (၈) က တာဝန်ယူတည်ဆောက်လျက်ရှိသည်။

တံတားအမျိုးအစားမှာ သံမဏိသံပေါင် (Europe) သံကူကွန်ကရစ်ကြမ်းခင်း၊ အောက်ထည်မှာ သံကူကွန်ကရစ်ဖြစ်ပြီး တံတားအရှည် ၁၂၅၆ ပေ ခုနစ်လက်မ၊ တံတားအကျယ် ၃၄ ပေ ခြောက်လက်မ၊ ယာဉ်သွားလမ်းအကျယ် ၂၄ ပေ ခြောက်လက်မ၊ လူသွားလမ်းအကျယ်တစ်ဖက်လျှင် ငါးပေ၊ရေလမ်းကင်းလွတ်အမြင့် ၁၉ ပေ ခြောက်လက်မ၊ ရေလမ်းကင်းလွတ် အကျယ် ပေ ၃၆၀ ဖြစ်သည်။

ယင်း တံတားစီမံကိန်းအတွက် ချဉ်းကပ်လမ်းအပါအဝင် ကျပ်သန်း ၆၇၃၀ ကုန်ကျမည်ဖြစ်သည်။ ကင်းချောင်းတံတားကို ၂၀၁၈-၂၀၁၉ ဘဏ္ဍာနှစ်ကုန်တွင် ပြီးစီးအောင် အကောင်အထည်ဖော်ဆောင်ရွက်သွားမည်ဖြစ်ကြောင်း သိရသည်။

အဆိုပါတံတားကြီး ပြီးစီးသွားပါက ရခိုင်ပြည်နယ် ရမ်းဗြဲမြို့နယ်မှ ကျောက်ဖြူမြို့သို့ ကုန်းလမ်းခရီးဖြင့် အချိန်တိုအတွင်း တိုက်ရိုက်ဆက်သွယ်သွားလာနိုင်တော့မည်ဖြစ်ကြောင်း သိရသည်။