ရခိုင်အရေး နိုင်ငံတကာပါလီမန်များ ညီလာခံဆုံးဖြတ်ချက် ပြည်ထောင်စုလွှတ်တော်က ကန့်ကွက်ရန် အစီရင်ခံစာတင်သွင်း

နေပြည်တော်၊ မတ်-၁၂

ကျင်းပပြီးစီးခဲ့သည့် (၁၃၇)ကြိမ်မြောက် နိုင်ငံတကာ ပါလီမန်များညီလာခံတွင် ရခိုင်အရေးကိစ္စနှင့်ပတ်သက်ပြီး ဆွေးနွေးဆုံးဖြတ်ချက်များကို မြန်မာလွှတ်တော်က တရားဝင်ကန့်ကွက်ရန် မတ် ၁၂ ရက်ကကျင်းပသည့် ပြည်ထောင်စုလွှတ်တော်တွင် မြန်မာလွှတ်တော်ကိုယ်စားလှယ်အဖွဲ့ခေါင်းဆောင် ပြည်သူ့လွှတ်တော် ဒုတိယဥက္ကဋ္ဌ ဦးတီခွန်မြတ်က အစီရင်ခံစာတစ်စောင် တင်သွင်းခဲ့သည်။

‘(၁၃၇)ကြိမ်မြောက် နိုင်ငံတကာပါလီမန်များညီလာခံမှာ အရေးပေါ်ကိစ္စရပ် Emergency Item အဖြစ် တင်သွင်း ဆွေးနွေးဆုံးဖြတ်ခဲ့သည့် ရခိုင်ပြည်နယ်ကိစ္စ ဆုံးဖြတ်ချက်တို့ကို မြန်မာ့လွှတ်တော်ကိုယ်စားပြု မြန်မာကိုယ်စားလှယ်အဖွဲ့က ပြတ်သားစွာကန့်ကွက်ဆွေးနွေးမှုကို အတည်ပြုဖို့ ပြည်ထောင်စုလွှတ်တော်က ဆွေးနွေးဆုံးဖြတ်ပေးဖို့ အဆိုတင်သွင်းတာဖြစ်ပြီး ပြည်ထောင်စုလွှတ်တော် ကိုယ်စားလှယ်များကလည်း တင်သွင်းတဲ့အစီရင်ခံစာကို မှန်ကန်ပြတ်သားတဲ့ ဆွေးနွေးမှုများနဲ့အတူ ထောက်ခံအတည်ပြုပေးနိုင်ပါရန် လွှတ်တော်ကို တင်ပြအပ် ပါတယ်’ဟု ဦးတီခွန်မြတ်က ပြောဆိုသည်။

-Ads-
-Ads-

အဆိုပါညီလာခံတွင် မြန်မာနိုင်ငံ ရခိုင်ပြည်နယ်တွင် ဖြစ်ပွားခဲ့သည့်အခြေအနေအပေါ် Emergency Item အဖြစ် တင်သွင်းခဲ့ခြင်းနှင့် ရခိုင်ပြည်နယ်အရေးကိစ္စနှင့်
ပတ်သက်သည့် ဆုံးဖြတ်ချက်များအားလုံးကို မြန်မာကိုယ်စားလှယ်အဖွဲ့က ကန့်ကွက်ခဲ့သည့်အပြင် မျိုးနွယ်အစုလိုက်
သုတ်သင်ရှင်းလင်းခြင်း၊ စွပ်စွဲပြောဆိုချက်များနှင့်စပ်လျဉ်းပြီး မြန်မာနိုင်ငံအနေဖြင့် ဆောင်ရွက်ချက်များကို တုံ့ပြန်ပြောကြားခဲ့ကြောင်း ၎င်းက ပြောဆိုသည်။ နိုင်ငံတကာပါလီမန်များညီလာခံတွင် ဆွေးနွေးဆုံးဖြတ်ခဲ့သည့်ကိစ္စများအနက် ဆုံးဖြတ်ချက် နှစ်ချက်နှင့်ကြေညာချက်တို့မှာအရေးပါသည်။

အဆိုပါဆုံးဖြတ်ချက်များအနက် ကမ္ဘာ့ဒီမိုကရေစီ ကြေညာစာတမ်းပါ ဆုံးဖြတ်ချက်နှင့် စိန့်ပီတာစဘတ် ကြေညာချက်တို့ကို မြန်မာလွှတ်တော်ကိုယ်စားလှယ်အဖွဲ့က သဘောတူခဲ့ပြီး ရိုဟင်ဂျာအရေးနှင့်ပတ်သက်သည့် ဆုံးဖြတ်ချက်များကိုမူ ကန့်ကွက်ခဲ့ခြင်းဖြစ်သည်။

ယင်းညီလာခံတွင် ရခိုင်ပြည်နယ်အရေးကိစ္စနှင့်ပတ် သက်ပြီး Emergency Item ရှစ်ခုကို မော်ရိုကို၊ အင်ဒိုနီးရှား၊ အာရပ်စော်ဘွားများ ပြည်ထောင်စု ၊ ဘင်္ဂလားဒေ့ရှ်၊ အီရန် ၊ ဆူဒန် နှင့် တူရကီနိုင်ငံတို့မှ သီးခြားတင်သွင်းခဲ့ခြင်းဖြစ်သည်။

ထိုသို့တင်သွင်းရာတွင် ရခိုင်ပြည်နယ်အတွင်း ရိုဟင်ဂျာ များကို နိုင်ငံသားအခွင့်အရေးပေးရေး၊ လွတ်လပ်စွာ သွားလာခွင့်ပြုရေး၊ အလုပ်လုပ်ခွင့်၊ ပညာရေး၊ ကျန်းမာရေး၊ လူမှုရေးဝန်ဆောင်မှုအများကို တောင်းဆိုခဲ့သည့်အပြင် လူ့အခွင့်အရေးချိုးဖောက်ခြင်း၊ လူမျိုးတုံးသတ်ဖြတ်မှုများ၊ ပြန်လည်လက်ခံရေးကိစ္စရပ်များကို စွပ်စွဲပြောဆိုခဲ့ကြသည်။

(၁၃၇)ကြိမ်မြောက် နိုင်ငံတကာပါလီမန်များညီလာခံကို ၂၀၁၇ ခုနှစ် အောက်တိုဘာ ၁၄ရက်မှ ၁၈ ရက်အထိ ရုရှား
နိုင်ငံတွင် ကျင်းပခဲ့ပြီး ယင်းညီလာခံမှ ဆုံးဖြတ်ချက်နှင့် ဆွေးနွေးချက်များကို အဖွဲ့ဝင်နိုင်ငံများက သက်ဆိုင်ရာလွှတ်တော်သို့ အစီရင်ခံစာ တင်သွင်းရသည်။ နိုင်ငံတကာပါလီမန်များအဖွဲ့တွင် အဖွဲ့ဝင်နိုင်ငံပေါင်း ၁၇၈ နိုင်ငံ၊ မိတ်ဖက်အဖွဲ့ဝင်နိုင်ငံပေါင်း ၁၂နိုင်ငံတို့ဖြင့် ဖွဲ့စည်းထားသည်။

-Ads-
-Ads-