ရပ်ကွက်အုပ်ချုပ်ရေးမှူးရုံး အချို့ရှိ ဈေးဆိုင်ခန်းများ ခွင့်ပြုထားခြင်းမရှိ

ရန်ကုန်၊ မတ်-၁၂

ရန်ကုန်တိုင်းဒေသကြီး၏ မြို့နယ်အချို့ရှိ ရပ်ကွက်အုပ်ချုပ်ရေးမှူးရုံး အချို့တွင် ဆိုင်ခန်းငှားရမ်းမှုများ ရှိနေသော်လည်း ထိုသို့ငှားရမ်း မှုများကို အထွေထွေအုပ်ချုပ်ရေးဦးစီးဌာနက ခွင့်ပြုထားခြင်းမရှိဟု ရန်ကုန်တိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးအောင်စိုးမိုးက ပြောဆိုသည်။

မတ် ၁၂ ရက်က ဒုတိယအကြိမ် ရန်ကုန်တိုင်းဒေသကြီးလွှတ်တော် ၁၂ ရက်မြောက် အစည်းအဝေးတွင် လသာမြို့နယ် မဲဆန္ဒနယ်အမှတ်(၂) တိုင်းဒေသကြီးလွှတ်တော်ကိုယ်စားလှယ် ဦးကျော်မင်းဟန်က ရန်ကုန်တိုင်းဒေသကြီး ရှိ ရပ်ကွက်အုပ်ချုပ်ရေးမှူးရုံးအချို့တွင် ရန်ပုံငွေအကြောင်းပြကာ ရုံးဧရိယာ အတွင်း ဆိုင်ခန်းငှားစားခြင်းများကို ခွင့်ပြုထားခြင်း ရှိ၊ မရှိနှင့် ခွင့်ပြုခြင်းရှိလျှင် လျင်မြန်စွာဖယ်ရှားရန် အစီအစဉ် ရှိ၊ မရှိ သိလိုကြောင်း မေးခွန်းအပေါ် ပြန်လည် ဖြေကြားရာတွင် ၀န်ကြီးက ထည့်သွင်းဖြေကြားခြင်းဖြစ်သည်။

-Ads-
-Ads-

အရှေ့ပိုင်းခရိုင်ရှိ ရပ်ကွက်အုပ်ချုပ်ရေးမှူးရုံး လေးခုတွင် ဆိုင်ခန်း ၁၇ ခန်း၊ တောင်ပိုင်းခရိုင်ရှိ ရုံးတစ်ရုံးတွင် သုံးခန်း၊ မြောက်ပိုင်းခရိုင်ရှိ ရုံးနှစ်ရုံးတွင် ခုနစ်ခန်း၊ အနောက်ပိုင်းခရိုင်တွင် ငှားရမ်းထားမှုမရှိသည့် အတွက် စုစုပေါင်း ရပ်ကွက်ရုံး ခုနစ် ခုတွင် ဆိုင်ခန်းစုစုပေါင်း ၂၇ ခန်းငှားရမ်းထားသည်ကို တွေ့ရသည်ဟု ၀န်ကြီး၏ဖြေကြားချက်အရ သိရသည်။

“ရန်ကုန်တိုင်းဒေသကြီး ခရိုင်၊ မြို့နယ်အထွေထွေအုပ်ချုပ်ရေး ဦးစီးဌာနတို့ရဲ့ ဒီဆိုင်ခန်းများဟာ ခွင့်ပြုထားခြင်း မရှိပါ။ ရပ်ကွက် အုပ်ချုပ်ရေးမှူးရုံးအနေနဲ့သာ ဆောင်ရွက်ခြင်းဖြစ်ပါတယ်″ဟု လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးအောင်စိုးမိုးက ဖြေဆိုသည်။

ဆိုင်ခန်းများငှားရမ်းထားသည့် ရပ်ကွက်အုပ်ချုပ်ရေးမှူးရုံးများ၏ အခြေအနေများကို စုံစမ်းစစ်ဆေးရေးအဖွဲ့ ဖွဲ့စည်း၍ အဆိုပါ စုံစမ်းစစ်ဆေးရေးအဖွဲ့၏ တွေ့ရှိချက် ကိုစိစစ်ပြီး ဆက်လက် ဆောင်ရွက်သွားမည်ဟု ၎င်းကပြောဆိုသည်။

ထိုရုံးများက အထွေထွေအုပ်ချုပ် ရေးဦးစီးဌာန၏ ဘတ်ဂျက်ဖြင့် ဆောက်လုပ်ထားခြင်းမဟုတ်ဘဲ ကန်ထရိုက်နှင့် အကျိုးတူ ဆောက်လုပ်ခြင်း၊ ရပ်ကွက် နေပြည်သူ လူထု၏ အလှူငွေနှင့် ဆောက်လုပ်ခဲ့သည်ကို တွေ့ရှိရကြောင်း ၎င်းကပြောဆိုသည်။

ရပ်ကွက်အတွင်း သာရေး၊ နာရေး ကိစ္စများအား ထောက်ပံ့ခြင်းများ ပြုလုပ် နိုင်ရေး၊ ဈေးဆိုင်ခန်းများက ရရှိသည့်ငွေကို ရပ်ကွက်အုပ်ချုပ် ရေးမှူးရုံး ဆောက်လုပ်ချိန်တွင် ကုန်ကျမှုတစ်စိတ်တစ်ပိုင်းအား သုံးစွဲနိုင်ရေးအတွက် ကန်ထရိုက်နှင့် သဘောတူကာ နှစ်ထပ် အဆောက်အအုံဆောက်လုပ်၍ အပေါ်ထပ်တွင် ရပ်ကွက်အုပ်ချုပ် ရေးမှူးရုံး အောက်ထပ်တွင် ကန်ထရိုက်က ဈေးဆိုင်ခန်းများ ငှားရမ်း အသုံးပြုနေခြင်းဖြစ်သည် ဟု ဗိုလ်မှူးကြီးအောင်စိုးမိုးက ပြောဆိုသည်။

အရှေ့ပိုင်းခရိုင်ရှိ မြောက်ဥက္ကလာပမြို့နယ် ဝေဘာဂီရပ်ကွက် အုပ်ချုပ်ရေးမှူးရုံးတွင် လက်ဖက်ရည်တစ်ဆိုင်၊ သာကေတ(၂) မြောက်ရပ်ကွက်အုပ်ချုပ်ရေးမှူးရုံးတွင် သုံးခန်း၊ (၄) မြောက်ရပ်ကွက် အုပ်ချုပ်ရေးမှူးရုံးတွင် ခြောက်ခန်း၊ (၆)အနောက် ရပ်ကွက် အုပ်ချုပ်ရေးမှူးရုံးတွင် ခုနစ်ခန်း၊ တောင်ပိုင်းခရိုင်တွင် ကွမ်းခြံကုန်း မြို့နယ် တောင်ပိုင်းရပ်ကွက် အုပ်ချုပ်ရေးမှူးရုံး အောက်ထပ်တွင် သုံးခန်း၊ မြောက်ပိုင်းခရိုင်တွင် အင်းစိန်မြို့နယ် ရွာမအလယ်ရပ်ကွက် အုပ်ချုပ်ရေးမှူးရုံးတွင် လေးခန်း ၊ တောင်ဆူးကုန်းရပ်ကွက်အုပ်ချုပ်ရေးမှူးရုံးတွင် သုံးခန်းတို့ဖြစ်သည်ဟု ၀န်ကြီး၏ဖြေကြား ချက်အရ သိရသည်။

-Ads-
-Ads-