သရုပ်ဆောင်ဒေါင်းနှင့် တွေ့ဆုံခြင်း

“ဘ၀ဆန်တဲ့ လူတိုင်းရဲ့ဘ၀တွေကို ထင်ဟပ်စေတဲ့ ကာရိုက်တာမျိုး ကျွန်တော်ရိုက်ချင်တယ်”

7 Sense ရုပ်ရှင်ထုတ်လုပ်ရေးအတွက် လူငယ်ဒါရိုက်တာ ဝင်းလွင်ထက်ရိုက်ကူးပြီးသရုပ်ဆောင်ရဲတိုက်၊ ဒေါင်း၊ တေးသံရှင်ရွှေထူး၊ ဝတ်မှုန်ရွှေရည်တို့ပါဝင်သည့် “ဒဏ္ဍာရီမိုး”ရုပ်ရှင် ဇာတ်ကားကို ရန်ကုန်မြို့ ဗိုလ်အောင်ကျော်လမ်းရှိ Envoy စားသောက်ဆိုင်မှာ ရိုက်ကူးလျက်ရှိပါတယ်။ ဒီဇာတ်ကားမှာ ပါဝင်သရုပ်ဆောင်နေတဲ့ သရုပ်ဆောင်ဒေါင်းနဲ့တွေ့ဆုံပြီး ဒီဇာတ်ကား အတွက် ကြိုတင်ပြင်ဆင်မှု၊ ရိုက်ကူးရေးအတွေ့အကြုံနဲ့ သူဖန်တီးပုံဖော်ချင်တဲ့ အနုပညာစိတ်ကူးတွေအကြောင်းကို မေးမြန်းဖြစ်ခဲ့ပါတယ်-

မေး – ဒီဇာတ်ကားက မင်းသားသုံးယောက်အပြိုင်သရုပ်ဆောင်ရ တဲ့ လေးပွင့်ဆိုင်ဇာတ်ကားဆိုတော့ ဒေါင်းအတွက် အတွေ့အကြုံနဲ့ စိတ်ခံစားမှုတွေက ဘယ်လိုရှိလဲ။

-Ads-
-Ads-

ဖြေ – အတွေ့အကြုံကတော့ နဂိုကတည်းက ဇာတ်လမ်းရိုက်ရပြီ၊ ဒိုင်ယာလော့ခ်ရွတ်ရပြီဆိုရင် ဖီလင်ကိုလာတာ။ ဒီဇာတ်ကားမှာ တော့ အဲဒီဖီလင်ကိုကြိုက်တယ်။ အဲဒီခံစားမှုက ကျွန်တော့်အတွက် အတွေ့အကြုံပါပဲ။

မေး- ဒီဇာတ်ကားအတွက် ပြင်ဆင်မှုအပိုင်း တွေအနေနဲ့ ဘယ်အပိုင်းတွေကို အဓိကပြင်ဆင်ဖြစ်ခဲ့လဲ။

ဖြေ – ကျွန်တော် ဘုန်းကြီးမဝတ်ခင်ကတည်းက ဒီဇာတ်လမ်းကို ကိုဝင်းလွင်ထက် ပြောပြထားတဲ့အတွက် ကျွန်တော်လုပ်ရမယ့် ကာရိုက်တာကို စိတ်ဝင်စားတယ်။ စိတ်ဝင်စားတဲ့နောက်ကွယ်မှာ အဲဒီဇာတ်ကောင်နဲ့ပတ်သက်ပြီး စိတ်ကူးယဉ်ကမ္ဘာထဲကို သွားကြည့်လိုက်တယ်။ အဲဒီဇာတ်ကောင်နေရာမှာ ကိုယ်ဆိုရင် ဘာတွေဆက်လုပ်မှာလဲ သူ့နေရာကနေဝင်ကြည့်တယ်။ ပြီးတော့ ဒီဇာတ်ကောင်ကို ငါဘယ်လိုဖန်တီးပြီးထုတ်မှာလဲဆိုတဲ့အရာကိုနောက်တစ်ဆင့်ထပ်တွေးတယ်။ အရင်တုန်းကအဲဒီလိုကာရိုက်တာ မျိုး ခပ်ဆင်ဆင် ဝါရင့်သရုပ်ဆောင်ကြီးတွေ ဘယ်လိုသရုပ် ဆောင်ခဲ့ လဲဆိုတာ လေ့လာတယ်။ လေ့လာဖြစ်တာကကိုယ်လို အပ်တာကိုဖြည့်မယ်၊ မလိုတာကိုဖယ်မယ်။ ကိုယ်ဘယ်လိုအသစ် တစ်ခု ပြန်ဖန်တီးမလဲဆိုတဲ့ အရာလေးကိုတွေးတယ်။ အဲဒီအတိုင်းပဲ ဒီဇာတ်ကောင်လေး၊ ဒီခံစားချက်လေးကိုကြိုတင်ပြင်ဆင်ပြီးတော့ ရိုက်ဖြစ်တာပါ။

မေး – ကိုရွှေထူးတို့၊ ကစ်ကစ် (ဝတ်မှုန်ရွှေရည်) တို့နဲ့ဆုံတဲ့ အခန်းတွေရော ရိုက်ပြီးပြီလား။

ဖြေ – ကိုရွှေထူးနဲ့တော့ မဆုံသေးဘူး။ ဒီဇာတ်ကားထဲမှာတော့ ဆုံဖြစ်ပါ့မလားမသိဘူး။ ဆုံဖြစ်ရင်လည်း တစ်ယောက်နဲ့ တစ်ယောက် အပေးအယူ မျှအောင်လုပ်မှာပါ။ မကစ်နဲ့ အရင်ဆုံတယ်။ မကစ်နဲ့ကတော့ ဒုတိယအကြိမ်ပေါ့။ အပေးအယူမျှပါ တယ်။ တစ်ယောက်ကိုတစ်ယောက်တိုင်ပင်တဲ့နေရာမှာ စိတ်လွတ်၊ လက်လွတ်ပဲ။ မောင်နှမတွေလို တစ်ယောက်နဲ့တစ်ယောက် တိုင်ပင်ပြီးတော့မှ စနစ်တကျကို အကောင်းဆုံးဖြစ်အောင်၊အပေးအယူမျှအောင်လုပ်မယ်ဆိုတဲ့စိတ်သူ့ရဲ့နှလုံးသားထဲမှာရှိသလိုကျွန်တော့်ရဲ့ နှလုံးသားထဲမှာလည်း ရှိတယ်။

မေး – ကိုရဲတိုက်နဲ့ဆုံတဲ့အခန်းက အရင်ဆုံးရိုက်ဖြစ်တာလား။ သူနဲ့နောက်ထပ် အတူတွဲရိုက်ဖို့လက်ခံထားတဲ့ ဇာတ်ကားတွေ ရောရှိလား။

ဖြေ – အခုရိုက်ကွင်းမှာတော့ ကိုရဲတိုက်နဲ့မတွေ့သေးဘူး။ ကိုရဲတိုက်နဲ့နောက်ထပ်ဆုံဖို့ကတော့သူနဲ့ကျွန်တော့်ရဲ့ဆန္ဒအပေါ် မူတည်သလို ပရိုဂျူဆာတွေရဲ့ဆန္ဒအပေါ်မှာလည်း မူတည်ပါတယ်။

မေး – သူနဲ့အတူတူရိုက်ကူးဖြစ်မယ်ဆိုရင် ဘယ်လိုဇာတ်လမ်း ပုံစံရိုက်ချင်လဲ။

ဖြေ – ဘယ်လိုပုံစံတွေ၊ စိတ်ကူးတွေဆိုတာထက် အခုချိန်မှာ ပြောလို့ရတာတော့ အနုပညာရသမြောက်တဲ့စိတ်ခံစားချက်ကို ဦးစားပေးပြီး ကာရိုက်တာကို ဦးစားပေးတဲ့၊ လူသားဆန်တဲ့၊ ကျွန်တော်တို့နိုင်ငံရဲ့ဘ၀ဆန်တဲ့လူတိုင်းရဲ့ဘ၀တွေကိုထင်ဟပ်စေတဲ့ ကာရိုက်တာမျိုးကျွန်တော်ရိုက်ချင်တယ်။

မေး – “လိပ်ပြာစံအိမ်”မှာလည်း ဒေါင်းပါတယ်နော်။ အဲဒီ ဇာတ်ကားက ဒေါင်းအတွက် ထူးခြားမယ်ထင်တယ်။

ဖြေ – ဒီဇာတ်ကားက သရဲကားပါ။ အဲဒီဇာတ်ကားမှာ ကျွန်တော်၊ ကိုနိုင်းနိုင်း၊ ဝတ်မှုန်ရွှေရည်နဲ့ကလေးသရုပ်ဆောင်နှစ်ယောက်က အဓိကပေါ့နော်။ ကျွန်တော်က ဓာတ်ပုံတွေကိုစိတ်ဝင်စားတဲ့ ဓာတ်ပုံဆရာနေရာကပါ။ ဒီဇာတ်ရုပ်က ကျွန်တော့်ဘ၀မှာ နောက်ထပ်မလုပ်ချင်တော့တဲ့ ဇာတ်ရုပ်မျိုးပါ။

မေး – ဘယ်လိုကြောင့် များလဲ၊ အဲဒီဇာတ်ကောင်အတွက် ဘယ်လောက်အထိစိတ်ခံစားချက် တွေထည့်ခဲ့ရလို့လဲ။

ဖြေ – ဒီဇာတ်ကားကိုရိုက်ဖို့ ကျွန်တော့်ကို ကမ်းလှမ်းခဲ့ကတည်းက ဇာတ်လမ်းကို ကျွန်တော်စိတ်ဝင်စားခဲ့တယ်။ ကျွန်တော်လုပ်ရမယ့် ဇာတ်ရုပ်နေရာကိုလည်း စိတ်ဝင်စားတယ်။ ဒီဇာတ်ရုပ်အတွက် ခံစားမှုတွေ တော်တော်လေးနက်တယ်။ ကျွန်တော် စိတ်ပိုင်းဆိုင်ရာတော်တော်လေး နစ်ဝင်ခဲ့ရတဲ့ဇာတ်ကား တစ်ကားပါ။

မေး – ဒေါင်းကိုအားပေးနေကြတဲ့ ပရိသတ်တွေကို ပြောပြချင် တာတွေရှိ ရင်လည်း ပြောပြပေးပါဦး။

ဖြေ – ကျွန်တော့်ကို အားပေးနေကြတဲ့ ပရိသတ်အားလုံးကို ကျေးဇူးတင်ပါတယ်။ ကျွန်တော့်ဘက်က အကောင်းဆုံးကြိုးစား သွားမှာပါလို့ ပြောချင်ပါတယ်။

-Ads-
-Ads-