သြဂုတ်လအတွက် ဖီဖာအဆင့်သတ်မှတ်ချက် အာဆီယံအသင်းများ အဆင့်အတက်အကျမရှိ

ရန်ကုန်၊ သြဂုတ်-၁၇

ကမ္ဘာ့ဘောလုံး အဖွဲ့ချုပ်ကထုတ်ပြန်သည့် ၂၀၁၈ ခုနှစ် သြဂုတ်လအတွက် ဖီဖာအဆင့်သတ်မှတ်ချက်တွင် မြန်မာအပါအ၀င် အာဆီယံနိုင်ငံများက ပြီးခဲ့သည့်လက အဆင့်အတိုင်းသာ ရပ်တည်ခဲ့ပြီး အဆင့်အတက်အကျမရှိခဲ့ကြောင်း သိရသည်။

သြဂုတ် ၁၆ ရက်တွင် ထုတ်ပြန်ခဲ့သော သြဂုတ်လအတွက် ကမ္ဘာ့ (ဖီဖာ) အဆင့်သတ်မှတ်ချက်တွင် မြန်မာ့လက်ရွေးစင် ဘောလုံးအသင်းသည် ရမှတ်၁၀၉၂ မှတ်ဖြင့် ကမ္ဘာ့အဆင့် (၁၃၈)၊ အာရှအဆင့် (၂၇)နှင့် အာဆီယံအဆင့် (၄)တွင် ရပ်တည်နေခြင်းဖြစ်သည်။ ကမ္ဘာ့ဘောလုံး အဖွဲ့ချုပ်သည် ပြီးခဲ့သည့်ကာလတွင် ကမ္ဘာ့ ဖလားပြိုင်ပွဲ ကာလဖြစ်သော ကြောင့် ကမ္ဘာ့ဖလားပြိုင်ပွဲဝင်အသင်းများကို အဆင့်အတက်အကျသတ်မှတ်ခဲ့ပြီး ပြိုင်ပွဲမရှိခဲ့သောအာဆီယံဒေသနိုင်ငံများကို အဆင့်အတက်အကျ မပြုလုပ်ခဲ့ဘဲ ပြီးခဲ့သည့် လကအတိုင်း ရပ်တည်စေ ခဲ့ခြင်းဖြစ်သည်။

-Ads-
-Ads-

ထို့ကြောင့် အာဆီယံဒေသအတွင်းတွင် အဆင့်(၁)၌ ဗီယက်နမ်၊ အဆင့်(၂)၌ ဖိလစ်ပိုင်၊ အဆင့်(၃)၌ ထိုင်း၊ အဆင့်(၄)၌ မြန်မာ၊ အဆင့်(၅)၌ အင်ဒိုနီးရှား၊ အဆင့်(၆)၌ ကမ္ဘောဒီးယား၊ အဆင့်(၇)၌ စင်ကာပူ၊ အဆင့်(၈)၌မလေးရှား၊ အဆင့်(၉)၌ လာအို၊ အဆင့်(၁၀) ၌ တီမောနှင့် အဆင့်(၁၁)၌ဘရူနိုင်းအသင်းတို့က ရပ်တည်နေသည်။

ကမ္ဘာ့အဆင့်ရပ်တည်မှုတွင် ကမ္ဘာ့ဖလားချန်ပီယံ ပြင်သစ်အသင်းကဦးဆောင်ထားပြီး အဆင့်(၂)တွင်ဘယ်လ်ဂျီယံ၊ အဆင့်(၃)တွင်ဘရာဇီး၊ အဆင့်(၄) တွင် ခရိုအေးရှား၊ အဆင့် (၅)တွင် ဥရုဂွေးတို့က ထိပ်ပိုင်းတွင် ရပ်တည် နေကာ အင်္ဂလန်အသင်းမှာ အဆင့်(၆)အထိ တက်ရောက်လာခဲ့ပြီး ပေါ်တူဂီမှာ အဆင့်(၇)၊ စပိန်မှာ အဆင့်(၉)နှင့် ဂျာမနီမှာ အဆင့်(၁၅) အထိ ကျသွားခဲ့သည်။

-Ads-
-Ads-