ပြည်တွင်းဆေးဝါးထုတ်လုပ်မှုကို မြှင့်တင်ပါ

ကမ္ဘာတစ်ဝန်းတွင် လတ်တလောဖြစ်ပွားနေသည့် COVID-19 ရောဂါ၏ ဂယက်နှင့်အတူ အများပြည်သူတို့အကြား ရောဂါက mကွယ်ရေးအတွက် အခက်အခဲဖြစ်လာသည့်ကိစ္စတစ်ရပ်မှာ ဗိုင်းရပ်စ်ပိုးများကာကွယ်ရာ၌ အရေးကြီးဆေးပစ္စည်းများဖြစ်သော နှာခေါင်းစည်း(Surgical Mask)နှင့် လက်သန့်ဆေးရည် (Hand Sanitizer)များ ဈေးနှုန်းအဆမတန် မြင့်တက်လာခြင်း ဖြစ်သည်။ ထို့ပြင် လူသုံးများသည့် ပြည်ပသွင်းကုန်ဆေးဝါးအချို့လည်း ဈေးကွက်အတွင်း ပြတ်လပ်နိုင်သည့် အနေအထားမျိုးသို့ ရောက်ရှိလာနိုင်သည်ဖြစ်ရာ တာဝန်ရှိသူများအနေဖြင့် ဆေးနှင့် ဆေးပစ္စည်းများ ပြည်ပမှတင်သွင်းရာတွင် အခက်အခဲများ မဖြစ်ပေါ်စေရန် လုပ်ထုံးလုပ်နည်းများကို ဖြေလျှော့ပေးရေးနှင့် ပြည်တွင်းဆေးဝါးထုတ်လုပ်မှုကို ပိုမိုမြှင့်တင်နိုင်ရေးအတွက် မူဝါဒသစ်များ ချမှတ်ပေးရေးတို့မှာ အရေးကြီးသည့် အချက်ဖြစ်လာသည်။

မြန်မာနိုင်ငံသည် ဈေးကွက်စီးပွားရေးစနစ် ကျင့်သုံးခဲ့သည်မှာ နှစ်ပေါင်း ၃၀ ကျော် ကြာမြင့်နေပြီဖြစ်သော်လည်း ဆေးဝါးနှင့် ဆေးပစ္စည်းများ ထုတ်လုပ်မှုကဏ္ဍသို့ နိုင်ငံတကာ ရင်းနှီးမြှုပ်နှံမှုများ စီးဝင်လာမှုမှာ နှေးကွေးနေဆဲဖြစ်သည်။ လက်ရှိတွင် နိုင်ငံပိုင်နှင့် ပုဂ္ဂလိကပိုင် ဆေးဝါးစက်ရုံများ ရှိသော်လည်း ပြည်တွင် လိုအပ်ချက်၏ ၁၀ ရာခိုင်နှုန်းခန့်ကိုသာ ထုတ်လုပ်နိုင်သေးသဖြင့် လိုအပ်သည့် ဆေးနှင့်ဆေးပစ္စည်းအမျိုးမျိုးကို အမေရိကန်ဒေါ်လာသန်းပေါင်းများစွာသုံးစွဲ၍ ပြည်ပမှ နှစ်စဉ်တင်သွင်းနေရဆဲ ဖြစ်သည်။ သို့ရာတွင် ပြည်ပမှ တရားမဝင်တင်သွင်းနေသည့် ဆေးဝါးများမှာ တရားဝင်တင်သွင်းမှုထက် ပမာဏများစွာ ရှိနိုင်သဖြင့် ဤအချက်က မြန်မာနိုင်ငံ၏ ဆေးနှင့်ဆေးပစ္စည်း လိုအပ်ချက် မည်သည့်အတိုင်းအတာအထိ မြင့်မားနေသည်ကို ခန့်မှန်းနိုင်သည်။

လက်ရှိတွင် နိုင်ငံပိုင် ဘီပီအိုင်ဆေးဝါးစက်ရုံသည် သက်တမ်းရင့် စက်ရုံတစ်ရုံဖြစ်သော်လည်း ခေတ်နှင့်အညီ ဆေးဝါးထုတ်လုပ်မှုလိုင်းများကို တိုးချဲ့ဆောင်ရွက်လျက်ရှိသည်။ စက်ရုံစတင်ဖွင့်လှစ်ချိန်က ဆေးဝါးအမျိုးအစား ၄၇ မျိုးခန့်သာ ထုတ်လုပ်နိုင်ခဲ့သော်လည်း ယခုအခါ ဆေးဝါးထုတ်လုပ်မှုကို တိုးချဲ့ ခဲ့သဖြင့် ဆေးဝါးအမျိုးအစား စုစုပေါင်း ၂၀၀ ကျော် အထိ ထုတ်လုပ်လျက်ရှိသည်။ သို့ရာတွင် ပြည်တွင်း၌ သုံးစွဲမှု များပြားနေသည့် သွေးတိုး၊ နှလုံး၊ ဆီးချိုကဲ့သို့သော မကူးစက်တတ်သည့် ရောဂါများအတွက် ဆေးဝါးအားလုံးလိုလိုကို ပြည်တွင်း၌ မထုတ်လုပ်နိုင်သေးပေ။ ဝေဒနာရှင်များမှာ ပြည်ပမှ နည်းလမ်းမျိုးစုံဖြင့် တင်သွင်းလာသော ဆေးဝါးများကိုသာ အားကိုးနေကြရသဖြင့် ဒေါ်လာဈေးနှုန်းနှင့် ချိတ်ဆက်နေသည့် ဆေးဝါးဈေးနှုန်းများ မငြိမ်မသက်ဖြစ်မှုကို တိုက်ရိုက်ခံစားနေကြရသည်။

အထူးသဖြင့် လတ်တလောတွင် ကမ္ဘာ့ကပ်ရောဂါ ဖြစ်လာသော COVID-19 ရောဂါပိုးကာကွယ်ရေးနှင့် စပ်လျဉ်းသည့် ဆေးပစ္စည်းကိရိယာများကို နိုင်ငံပိုင်နှင့် ပုဂ္ဂလိကပိုင် ဆေးဝါးစက်ရုံများက လုံလောက်အောင် မထုတ်လုပ်နိုင်သေးသဖြင့် ဈေးကွက်အတွင်းရှိနေသည့် ဆေးပစ္စည်းများဈေးနှုန်းကြီးမြင့်ခြင်း ၊ ပစ္စည်းရှားပါးလာခြင်းတို့နှင့် ကြုံတွေ့လာရသည်။ ပြည်တွင်းသို့ ဆေးဝါးနှင့် ဆေးပစ္စည်းများ အဓိက တင်သွင်းနေသည့် တရုတ်နှင့်အိန္ဒိယနိုင်ငံတို့သည်လည်း ၎င်းတို့ကိုယ်တိုင် COVID-19 ကပ်ရောဂါကို ရင်ဆိုင်နေရသဖြင့် မိမိတို့နိုင်ငံ၏ အမျိုးသားအကျိုးစီးပွားကို ပိုမိုဦးစားပေးလာရခြင်း၊ ပြည်ပသို့ ဆေးဝါးတင်ပို့မှုအပေါ် ကန့်သတ်ခြင်းတို့ကြောင့် မြန်မာနိုင်ငံသို့ ဆေးဝါးနှင့်ဆေးပစ္စည်းများ စီးဝင်လာမှု နှေးကွေးလာသဖြင့် ရေရှည်တွင် အခက်အခဲ ဖြစ်နိုင်သည်။

အချုပ်အားဖြင့် ဆိုရလျှင် ပြည်သူလူထုအများစုသည် ကျန်းမာရေးကိစ္စနှင့် ပတ်သက်လာလျှင် မိမိခြေထောက်ပေါ် မိမိရပ်တည်နေရသည့်အခြေအနေအောက်မှာပင် ရှိနေသေးသည့်အတွက် အမျိုးသားကျန်းမာရေး အညွှန်းကိန်းများ မြင့်တက်လာရန်မှာ မရှိမဖြစ် ဆေးဝါးနှင့် ဆေးပစ္စည်းများအား ပြည်တွင်း၌ထုတ်လုပ်ခြင်းပင် ဖြစ်သည်။ ထို့ကြောင့် နိုင်ငံတော်အနေဖြင့် ပြည်တွင်းဆေးဝါးထုတ်လုပ်မှု ဖွံ့ဖြိုးရေးကို ဦးစားပေးလုပ်ဆောင်ရန် လိုအပ်သည်။ သို့မှသာ အများပြည်သူတို့ အနေဖြင့် ဈေးနှုန်းသက်သာစွာ ဝယ်ယူသုံးစွဲနိုင်ပြီး ဆေးဝါးအတုအန္တရာယ်မှ ကင်းဝေးနိုင်စေမည့်အပြင် ပြည်ပသို့ နိုင်ငံခြားသုံးငွေ စီးထွက်မှုကိုလည်း လျှော့ချနိုင်မည်ဟု စံတော်ချိန်ကရှုမြင်ပါသည်။

အယ်ဒီတာ
စံတော်ချိန်နေ့စဉ်