၂၀၂၁ ဖူဆယ်လိဂ်တွင် ပထမတန်း၊ ဒုတိယတန်းပြိုင်ပွဲများထားရှိ၍ ကျင်းပရန်စီစဉ်နေ

၂၀၂၁ ခုနှစ်တွင် ကျင်းပမည့် MFF ဖူဆယ်လိဂ်တွင် လက်ရှိကျင်းပနေသည့် ပထမတန်းပြိုင်ပွဲအပြင်ဒုတိယတန်းပြိုင်ပွဲပါထည့်သွင်းကျင်းပရန်စီစဉ်ဆောင်ရွက်လျက်ရှိကြောင်း မြန်မာနိုင်ငံဘောလုံးအဖွဲ့ချုပ် ဖူဆယ်နှင့်သဲသောင်ပြင်ဘောလုံးကော်မတီ အစည်းအဝေးမှသိရသည်။

ယင်းအစည်းအဝေးတွင် ကော်မတီဥက္ကဋ္ဌ ဒေါက်တာရဲမွန်ထွဋ်က လာမည့် ၂၀၂၁ ဖူဆယ်လိဂ်ပြိုင်ပွဲတွင် ပထမတန်း၊ ဒုတိယတန်းများ ခွဲခြား ၍ ကျင်းပသွားမည်ဖြစ်သည့်အတွက် ကြိုတင်ပြင်ဆင်သွားရမည်ဖြစ်ကြောင်း ဆွေးနွေးခဲ့ခြင်းဖြစ်သည်။

ဖူဆယ်လိဂ်တွင် ဒုတိယတန်းပြိုင်ပွဲထားရှိမည်ဆိုပါက တန်းတက်၊ တန်းဆင်းစနစ်များ ရှိလာမည်ဖြစ်ပြီး အသင်းအရေအတွက်များစွာထွက်ပေါ်လာရန်လိုကြောင်း၊ ထို့ကြောင့် အသင်းသစ်များ ဦးစွာထွက်ပေါ်လာရေးအတွက် လုပ်ဆောင်ရမည်ဖြစ်ကြောင်း ၎င်းကဆွေးနွေးခဲ့သည်။

မြန်မာနိုင်ငံ၌ ဖူဆယ်လိဂ်ပြိုင်ပွဲများကို ၂၀၀၅ ခုနှစ်မှစတင်ကျင်းပလာခဲ့ခြင်းဖြစ်ပြီး ပြီးခဲ့သည့် ၂၀၁၉-၂၀၂၀ ဖူဆယ်ပြိုင်ပွဲအထိ ပထမတန်းပြိုင်ပွဲများသာ ကျင်းပနိုင်ခဲ့သည်။ ယခုအချိန်တွင် ဒုတိယတန်းပြိုင်ပွဲများကို တိုးချဲ့ကျင်းပနိုင်ရန် စီစဉ်ဆောင်ရွက်နေကြခြင်းဖြစ်သည်။

ထို့အပြင် ကမ္ဘာ့ဘောလုံးအဖွဲ့ချုပ်မှ ၂၀၂၀-၂၀၂၁ ဘောလုံးရာသီအတွက် အသစ်ထုတ်ပြန်ထားသော ဖူဆယ်စည်းမျဉ်း ဥပဒေ (၁၀) ချက်ကိုလည်း ဒိုင်နှင့် ကစားသမားများ သိရှိနားလည်နိုင်ရေးဆောင်ရွက်သွားရန် ရှိကြောင်း၊ COVID-19 ကြောင့် ပြိုင်ပွဲများကျင်းပနိုင်ခြင်းမရှိသေးသော်လည်း ကြိုတင်ပြင်ဆင်မှုများ ပြုလုပ်ထားရမည်ဖြစ်ကြောင်း သိရသည်။

သတင်း – စွမ်းရည်တိုး / စံတော်ချိန်
ဓာတ်ပုံ – MFF