မြန်မာ့ရေပိုင်နက်အတွင်း တရားမဝင်နိုင်ငံခြားသင်္ဘော အချို့ ဝင်ရောက်လုပ်ကိုင်နေမှုကြောင့် အလုပ်အကိုင် အခွင့်အလမ်းများ ဆုံးရှုံးနေရဟုဆို

မြန်မာနိုင်ငံရေပိုင်နက်အတွင်း နိုင်ငံခြားသားပိုင် နိုင်ငံခြား အလံလွှင့်ထူထားသည့် တရားမဝင်သင်္ဘောအချို့ ဝင်ရောက် လုပ်ကိုင်နေမှုကြောင့် နိုင်ငံသားရေယာဉ်လုပ်သားများ၏ အလုပ်အကိုင်အခွင့်အလမ်းများ ထိခိုက်ဆုံးရှုံးမှုများ ဖြစ်ပေါ်နေကြောင်း ကမ်းရိုးတန်းသွား သင်္ဘောပိုင်ရှင်များအသင်းမှ သိရသည်။

‘နိုင်ငံခြားသင်္ဘောတွေဟာ ဥပဒေအရ လာရောက်ပြီ ဆိုရင် နိုင်ငံတကာ စံချိန်စံညွှန်းနဲ့အညီ သင်္ဘောသား လက်မှတ်၊ ရေယာဉ်လက်မှတ်၊ သက်ဆိုင်ရာ နိုင်ငံတွေရဲ့လိုင်စင်တွေပါရမယ်။ ဒါပေမဲ့ မြန်မာနိုင်ငံမှာ ရောက်ရှိနေတဲ့ ရေယာဉ်တွေဟာ နိုင်ငံ တကာစံချိန်စံညွှန်းနဲ့မညီဘဲ လိုင်စင်မဲ့ရေယာဉ်တွေ ဖြစ်နေတာ တွေ့ရပါတယ်။ နိုင်ငံတကာ စီမံကိန်းဆိုတဲ့ ခေါင်းစဉ်အောက်မှာ ပြဋ္ဌာန်းထားတဲ့ ဥပဒေတွေကို လက်တစ်လုံးခြား လုပ်နေတာ တွေ့ရတယ်။ ဒါဟာ နိုင်ငံတော်ရဲ့ ရသင့်ရထိုက်တဲ့ အခွင့်အရေး ရော၊ နိုင်ငံသားတွေ ရသင့်တဲ့အခွင့် အရေးရော ထိခိုက်စေတယ်။ နိုင်ငံခြားသားတွေကတော့ တရားမဝင်သင်္ဘောတွေ၊ ပေါချောင် ကောင်းသင်္ဘောတွေနဲ့လာပြီး လုပ်ကိုင်တယ်။ ရေယာဉ်ဥပဒေအရ လိုင်စင်မဲ့ သင်္ဘောတွေနဲ့ လုပ်ခွင့်မရှိပါဘူး။ ဒါကို ဦးစီးဌာနအနေနဲ့ ယာယီလိုင်စင်ထုတ်ပေးတာ မဖြစ်သင့်ပါဘူး’ဟု ကမ်းရိုးတန်းသွား သင်္ဘောပိုင်ရှင်များအသင်းမှ တာဝန်ရှိသူတစ်ဦးက ပြောဆိုသည်။

နိုင်ငံခြားသားပိုင် နိုင်ငံခြားအလံ လွှင့်ထူထားသည့် တရားမဝင်သင်္ဘောများအနေဖြင့် နိုင်ငံတော်စီမံကိန်း ဖြစ်သည့် သောင်တူးခြင်း၊ မြစ်ကြောင်းများရှင်းလင်းခြင်းအား အကြောင်းပြ၍ ယာယီ လိုင်စင်သုံးလထုတ်ပေးထားပြီး အဆိုပါ သင်္ဘောများမှာ အချို့က လေးနှစ်မှ ကိုးနှစ်အထိ မြန်မာ့ရေပိုင်နက်ထဲတွင် ကြာမြင့် စွာလုပ်ကိုင်ခဲ့ပြီး သောင်တူးခြင်းကို အကြောင်းပြကာ သဲများထုတ်ယူပို့ဆောင်နေခဲ့ခြင်းဖြစ်ကြောင်း သိရသည်။

အဆိုပါ နိုင်ငံခြားအလံလွှင့်ထူထားသည့် သင်္ဘောများသည် ၁၂ စင်းရှိပြီး နိုင်ငံတကာစံချိန်စံညွှန်းနှင့်မညီသည့် လိုင်စင် မဲ့ ရေယာဉ်များဖြစ်နေသည်ကို လေ့လာတွေ့ရှိရကြောင်း၊ အချို့ သင်္ဘောများက မြန်မာ့ရေပိုင်နက်အတွင်းရောက်ရှိ နေသည်မှာ လေးနှစ်မှကိုးနှစ်ခန့်အထိ ကြာမြင့်နေပြီဖြစ်ပြီး သက်ဆိုင်ရာနိုင်ငံ
ပြန်၍သက်တမ်းတိုးခြင်းမရှိတော့သည့်လိုင်စင်မဲ့၊ လိုင်စင်ပျက် သင်္ဘောများ ဖြစ်နေကြောင်း၊ ယင်းကိစ္စကို လွှတ်တော်မှမေးမြန်း ရာ နိုင်ငံတော်စီမံကိန်းဖြစ်ရာ သုံးလသက်တမ်းယာယီလိုင်စင် ထုတ်ပေးထားခဲ့သည်ဟု ပို့ဆောင်ရေးနှင့်ဆက်သွယ်ရေး ဝန်ကြီးဌာနက ဖြေကြားထားခဲ့ကြောင်း သိရသည်။

မြန်မာ့ကမ်းရိုးတန်းနှင့် ပြည်တွင်း ရေကြောင်း သယ်ယူ ပို့ဆောင်ရေးလုပ်ငန်း လုပ်ကိုင်ခွင့်ဥပဒေကို၂၀၁၅ခုနှစ် မတ် ၃ ရက်တွင် ပြည်ထောင်စုလွှတ်တော်ဥပဒေအမှတ်(၁၀)ဖြင့် ပြဋ္ဌာန်းခဲ့ရာ ပုဒ်မ-၂၂ တွင် ‘မည်သူမျှလုပ်ငန်းလိုင်စင်မရှိဘဲ ရေကြောင်း သယ်ယူရေးလုပ်ငန်း လုပ်ကိုင်ခြင်း သို့မဟုတ် လုပ်ကိုင်စေခြင်း မပြုရ’ဟု ဖော်ပြထားသည်။

သတင်း – တိုးအောင်(မြန်မာ့မြေ)