အိပ်ခ်ျအိုင်ဗွီရောဂါပိုး ကူးစက်နိုင်ခြေရှိသူများအား ကာကွယ်ဆေး အခမဲ့ စတင်ပေး

HIV ရောဂါပိုးကူးစက်နိုင်ခြေမြင့်မားသော ဦးတည်အုပ်စုဝင်များအနေဖြင့် HIV ပိုးအသစ် ကူးစက်ခံရခြင်းမှ ကာကွယ်သော PrEP ဆေးကို ရန်ကုန် ပြည်သူ့ဆေးရုံ တိုးချဲ့ဝင်း လသာမြို့နယ် လသာ (NAP) ဆေးခန်းနှင့် တာမွေမြို့နယ် မေတ္တာညွန့်ရပ်ကွက် စက်မှု(၃)လမ်း အမှတ်(၂၁၅-အေ) TOP Center ၌ အခမဲ့ လာရောက်ထုတ်ယူနိုင်ကြောင်း သိရသည်။

ဇူလိုင် ၃၁ရက်တွင် မြန်မာနိုင်ငံ၌ ပထမဆုံး PrEP ဆေးခန်းဖွင့်ပွဲ အခမ်းအနားကို လသာဆေးခန်း၌ ကျင်းပပြီး အမျိုးသား ခုခံကျ/ကာလသားရောဂါ တိုက်ဖျက်ရေးစီမံချက်(National AIDS Program), USAID HIV/AIDS Flagship (UHF) စီမံကိန်း၊ UHF မိတ်ဖက်အဖွဲ့အစည်းဖြစ်သော PSI နှင့် စီမံကိန်းတွင် ပါဝင်သူများ တက်ရောက်ကြသည်။

အမျိုးသားခုခံကျ/ကာလသားရောဂါ တိုက်ဖျက်ရေး စီမံချက် (National AIDS Program), Global Fund စီမံကိန်းနှင့် USAID HIV/AIDS Flagship(UHF) စီမံကိန်းတို့ ပူးပေါင်း၍ အဆိုပါဆေးကို အမျိုးသား လိင်တူချစ်သူများနှင့် ဆန့်ကျင်ဘက်လိင်ကဲ့သို့ ဝတ်စားဆင်ယင်သူများအား PrEP ဆေးကို စတင်တိုက်ကျွေးကြောင်း သိရသည်။

HIV ရောဂါပိုးကူးစက်နိုင်ခြေ မြင့်မားသော ဦးတည်အုပ်စုဝင်များအနေဖြင့် PrEP ဆေးကို ဇူလိုင် ၃၁ ရက်မှစ၍ ထုတ်ယူ သောက်သုံးနိုင်မည်ဖြစ်ကြောင်း အမျိုးသားခုခံကျ/ ကာလသား ရောဂါတိုက်ဖျက်ရေးစီမံချက် ဒါရိုက်တာ ဒေါက်တာ ထွန်းညွန့်ဦးက ပြောကြားသည်။

အဆိုပါ ဦးတည်အုပ်စုများမှာ မူးယစ်ဆေးထိုးသွင်း သုံးစွဲသူများ၊ အမျိုးသားလိင်တူချစ်သူများ၊ ဆန့်ကျင်ဘက်လိင်ကဲ့သို့ ဝတ်စားဆင်ယင်သူများနှင့် လိင်လုပ်သားတို့ဖြစ်ကြောင်း သိရသည်။

PrEP ဆေးသည် HIV ရောဂါပိုး မရှိသူများအနေဖြင့် HIV ရောဂါပိုး ကူးစက်မှုအား ကာကွယ်နိုင်ရန်အတွက် နေ့စဉ် သောက်သုံးရသောဆေးဖြစ်ပြီး ဆေးကို မှန်မှန်ကန်ကန်ဖြင့် ပုံမှန် သောက်သုံးပါက HIV ရောဂါပိုးကူးစက်ခံရမှုကို လျှော့ချစေနိုင်ကြောင်း သိရသည်။

ကမ္ဘာ့ကျန်းမာရေးအဖွဲ့(WHO) မှ HIV ပိုးအသစ် ကူးစက်ခံရမှုကို ကာကွယ်သည့်လုပ်ဆောင်ချက်များတွင် ကွန်ဒုံး သုံးစွဲခြင်း၊ တစ်ခါသုံးဆေးထိုးအပ်နှင့် ဆေးထိုးပြွန်များသုံးစွဲခြင်း၊ အခြား အန္တရာယ်လျှော့ချရေးဝန်ဆောင်မှုများ၊ အထောက်အပံ့များနှင့်အတူ PrEP ဆေးတိုက်ကျွေးရန် အကြံပြုထားကြောင်း သိရသည်။

ကမ္ဘာပေါ်တွင် HIV ရောဂါပိုး အသစ်ကူးစက်ခံနေရသူ ၉၀ ရာခိုင်နှုန်းအထိ မြင့်တက်နေသော နိုင်ငံ ၃၅ နိုင်ငံတွင် မြန်မာနိုင်ငံလည်း တစ်နိုင်ငံအပါအဝင် ဖြစ်ပြီး လူဦးရေ ၂၄၀၀၀၀ ခန့်သည် HIV ရောဂါပိုးကူးစက်ခြင်းကို ခံနေရကြောင်း သိရသည်။

သတင်း – အေးမြတ်မွန်(ယုဇန)
ဓာတ်ပုံ – Fabien Daudier