မီနော့တ် (Me Not)

မူးယစ်ဆေးဝါး ရဲ့ ဆိုးကျိုးတွေကို ခေတ်အဆက်ဆက်က မီဒီယာတွေမှာ ဖေါ်ပြခဲ့ကြပြီးပြီ ။ သတင်းစာ ၊ ဂျာနယ်တွေနဲ့ တယ်လီဗွီးရှင်း တွေမှာရော ” ရှောင်လေဝေးဝေး မူးယစ်ဆေး ” ဆိုတဲ့ ကြေညာချက်တွေ လူတိုင်း အလွတ်ရနေကြပြီ.။ တကယ်ရော မူးယစ် ကင်စင်တဲ့ နိုင်ငံ ဖြစ်နေပြီလား ။ ဝေးစွခြောက်ပါးလို့ ပြောရမှာပဲ ။

ဟိုတစ်ခေတ်က အနုပညာရှင်တွေနဲ့ ပိုက်ဆံရှိ သားသမီးတွေပဲ သုံးစွဲနိုင်တဲ့ မူးယစ်ဆေးဝါး တွေဟာ အခုအချိန်မှာ ကျွန်တော်တို့ရဲ့ လက်တစ်ကမ်း အနီး ပတ်ဝန်းကျင်ကို ရောက်ရှိလို့ နေပါပြီ ။ ဒါဟာ ရှောင်လွှဲလို့မရတဲ့ အမှန်တရား ပါ ။ ပေါပေါပဲပဲ ဝယ်လို့လည်း ရနေတဲ့ အဲဒီ မူးယစ်ဆေးဝါး က WY ပါ တဲ့ ။

လူ့လောကကို ကောင်းစေချင်တဲ့ စေတနာအပြည့် ရှိတဲ့ စာရေးဆရာ တွေဟာ ကလောင်လက်နက်ကို အသုံးချပြီး စာဖတ်တဲ့ ပြည်သူလူထုကို မူးယစ်ဆေးဝါး အန္တရယ်အကြောင်း အသိပေးကြပါတယ် ။

ဒီဝတ္ထု ဇာတ်ကြောင်းဟာလည်း မူးယစ်ဆေးဝါး အမျိုးအစား တစ်ခုဖြစ်တဲ့ WY အကြောင်း ကျယ်ကျယ်ပြန့် ပြန့်  ရှင်းပြထားပြီး မိသားစုတစ်စု ရဲ့ ချစ်ခြင်းမေတ္တာ နဲ့ သရုပ်ဖေါ် ဖွဲ့နွဲ့ထားပါတယ် ။

ပခုက္ကူ မြို့က တရားသူကြီး မိသားစု မှာ ကိုကိုစော ၊ ညီညီစော နဲ့ မောင်မောင်စော ဆိုတဲ့ ညီအစ်ကို သုံးယောက် ရှိတယ် ။ တင်းနစ်ရိုက်တာ ဝါသနာပါတဲ့ အစ်ကိုကြီး ကိုကိုစော ၊ စာကြိုးစားတဲ့ အလတ်ကောင် ညီညီစော ၊ ဆယ်တန်းကျထားတဲ့ ၊ အသစ်အဆန်းဆို မြည်းစမ်းချင်တဲ့ အငယ်ဆုံးလေး မောင်မောင်စော ။

သူတို့ ဘဝထဲကို အမှတ်မထင် ဝင်ရောက်လာတဲ့ မိကဲ ။ မိကဲ က ရန်ကုန်သူ ၊ ခပ်ချောချော ၊ လုံးကြီးပေါက်လှ သူငယ်မ ။ ကိုးတန်းကျောင်းသူ ။ အမေသေဆုံးသွားပြီး စိတ် ကယောက်ကယက် ဖြစ်နေလို့ ရွာသာကြီး ကို ရောက်ခဲ့တယ် ။ ရွာသာကြီးကနေ ပခုက္ကူ က တရားသူကြီး အိမ်ကို ရောက်လာသူ.။ မိကဲ ရောက်လာခြင်းဟာ တရားသူကြီး မိသားစုအဖို့ မုန်တိုင်းဝင်လာသလိုပဲ ။

ယာဘ ခေါ် WY ကို လူငယ်လေးတွေ လက်တည့်စမ်းချင်အောင် အားကစားကွင်းတွေမှာ လိုက်စည်းရုံးနေတဲ့ ရော်နယ် ။ ပိုက်ဆံ ပိုသုံးနိုင်တဲ့ ချာတိတ်တွေကို ကျတော့ ICE သုံးချင်လာအောင် ဆွယ်တရား ဟောတတ်တဲ့ ရော်နယ် ။

ပခုက္ကူ သင်္ချိင်းကုန်းက တစ်ဦးတည်းသော စဏ္ဍာလ အမျိုးသမီး မေကြည် ။

စတဲ့ဇာတ်ကောင်တွေနဲ့ WY ဇာတ်လမ်းတွေကို ရက်ယှယ်ထားတဲ့ Me Not စာအုပ်ဟာ ဆရာမ ဝင့်ပြုံးမြင့် ရဲ့ ဒုတိယမြောက် ပင်ကိုရေး လုံးချင်း ဝတ္ထုသစ်တစ်ပုဒ် ဖြစ်ပါတယ် ။ ဘာသာပြန်တွေ အရေးများတဲ့ ဆရာမ ဝင့်ပြုံးမြင့် ရဲ့ ပင်ကိုရေး ဝတ္ထု ကောင်းတစ်အုပ် ဖြစ်ပါတယ် ။