ဆုဂ ကို ဝန်ကြီးချုပ်သစ်အဖြစ် ဂျပန်လွှတ်တော် ရွေးချယ်တင်မြှောက်

တနင်္လာနေ့က လစ်ဘရယ်ဒီမိုကရက်တီပါတီ(LDP) ကနေ ခေါင်းဆောင်အဖြစ် ရွေးချယ်တင်မြှောက်လိုက်တဲ့ ယိုရှီဟီဒဲဆုဂကို စက်တင်ဘာလ ၁၆ ရက်၊ ဒီနေ့မှာ ဂျပန်လွှတ်တော်နှစ်ရပ်စလုံးက ဝန်ကြီးချုပ်သစ်အဖြစ် တရားဝင် ရွေးချယ်လိုက်ပြီ ဖြစ်ပါတယ်။

တနင်္လာနေ့က LDP ရွေးကောက်ပွဲမှာ ဆုဂဟာ ဆန္ဒမဲ ၇၀ ရာခိုင်နှုန်းနီးပါးအထိရခဲ့ပေမယ့် ဂျပန်လွှတ်တော် (ဒိုင်းယက်)ရဲ့ အတည်ပြုချက် လိုအပ်သေးတာကြောင့် လွှတ်တော်ရွေးကောက်ပွဲတစ်ရပ်ကျင်းပခဲ့တာဖြစ်ပြီး အောက်လွှတ်တော်အမတ် ၄၆၅ ဦးမှာ ၃၁၄ မဲက ဆုဂကို ဝန်ကြီးချုပ်အဖြစ် ရွေးချယ်ခဲ့ပါတယ်။ အထက်လွှတ်တော်မှာလည်း အမတ် ၂၄၀ ထဲမှာ ၁၄၂ မဲအထိ ဆုဂ ထောက်ခံမဲရခဲ့ပါတယ်။

အသက် ၇၁နှစ်အရွယ်ရှိပြီဖြစ်တဲ့ ဆုဂဟာ ရှင်ဇိုအာဘေးရဲ့ ဝန်ကြီးချုပ်သက်တမ်းကုန်ဆုံးမယ့် ၂၀၂၁ ခုနှစ်၊ စက်တင်ဘာလအထိ ဂျပန်ဝန်ကြီးချုပ်အဖြစ် တာဝန်ယူသွားရမှာဖြစ်ပြီး ဂျပန်ဧကရာဇ် နာရူဟီတိုရဲ့ရှေ့မှောက်မှာ ကျမ်းကျိန်သစ္စာမဆိုခင် အစိုးရအဖွဲ့သစ်တစ်ရပ်ကို ဦးဆောင်ဖွဲ့စည်းသွားရမှာဖြစ်ကြောင်း CNN သတင်းအရ သိရပါတယ်။

သတင်း – မောင်ဇေယျ
ကိုးကား – CNN