ဦးကျိုးအောင် ဦးချိုးခဲ့..၊ ဒါပေမယ့်

မိုးနှောင်းဆောင်းကူးရာသီတွင် မန္တလေးသည် အလှကြီးလှနေသည်။ နှောင်းမိုးပေမယ့် ဖြိုးဖြိုးသွန်းခဲ့သောကြောင့် မြင်မြင်သမျှ အစိမ်းရောင်လွှမ်းနေသည်။

မြို့စွန် မဟုတ်မူဘဲ မြို့နယ်နိမိတ်ထဲလုံးလုံးရောက်ရှိနေသော မန္တလေးတောင်တော်က စိမ်းနု၊ စိမ်းရင့် ဆံကေသာတို့ဖြင့် သျှောင်ထုံးရန် ပြင်ဆင်နေချေပြီ။ သူ့ဆံကေသာမှာ မွေတော်ဓာတ်တော် ဆံထိုးရွှေရောင်၊ ဆံထိုးငွေရောင်တို့ အနှံ့အပြားထိုးစိုက်ထားချေ၏။

သည်တောင်သည် မန္တလေးကိုအရှေ့မြောက်အရပ်မှ အုပ်ဆီးငုံ့ကြည့်နေသလို ရတနာပုံ မန္တလေးဟူသော မြို့ပြ၏ မိခင်သဖွယ်လည်း ဖြစ်ချေ၏။ ထို့ကြောင့် မန္တလအမည်ရှိ မန္တလေးတောင်တော်သည် မြို့ပြ၏ အအုပ်အစီးအဖြစ် ပြဒါးတိုင်ကြီးပမာတည်ရှိခဲ့သည်။ တောင်တော် သာယာဝပြောလျှင် မန္တလေး သာယာဝပြောသည်။

တောင်တော်မှာ အလှူဒါနများပြားလျှင် မန္တလေး ရောင်းပန်းဝယ်ပန်းသာသည်။ တောင်တော် စိမ်းစိုလျှင် မန္တလေးစိမ်းစိုသည်။ တောင်တော် ကျန်းမာလျှင် မန္တလေးကျန်းမာသည်။ ဒါက မြို့ဦး မြို့ဖျားကအနီးဆုံးအလှ…။ မန္တလေးဟူသော ဆံကေသာထက်က အလှဆုံးပန်းတစ်ပွင့်..။

မန္တလေး၏ ဦးဖျားဦးထိပ် မန်းတောင်ခြေရင်ခွင်မှာ မန်းလူထုမန်းပြည်သူမန်းပရိသတ်အတွက် မန်းရာပြည့်ဟူသော လူထုရင်ပြင် လူထုကွင်းကြီးရှိခဲ့ဖူးသည်။ မန္တလေးနန်မြို့တော် မန္တလေးတောင်နှင့် မန်းရာပြည့်ကွင်းလိုက်ဖက်ညီပါပေ့။

မန္တလေးပတ်ဝန်းကျင်က လွမ်းစရာ့ အကောင်းဆုံးနေရာကို ပြပါဆိုလျှင် သခင်မတောင်တော်ကိုပင် ညွှန်းဆိုရပေမည်။ တချို့ကလည်း မယ်ဥတောင်ဟုခေါ်ဆိုကြ၏။ မန္တလေးမြောက်ဘက် ရှစ်မိုင်အကွာ ကြာနီကန်၏ အရှေ့ဘက်တွင် တည်ရှိသည်။ ရေမြေကလည်း အလွမ်းရေမြေ . . .။ ပုဂံခေတ်၏ ကိုရင်မောင် မရွှေဥအလွမ်းဇာတ်သန္ဓေတည်ရှိရာရေမြေ . . .’

ပတ်ဝန်းကျင် အနေအထားကလည်း ရိုးမရှိ၏။ လယ်တောရှိ၏။ ဗြိဇင်၊ တောသဇင်၊ တောစံပယ်ပန်းလေးများရှိ၏။ တန်ခူးကာလရောက်လျှင် ပင်လုံးကျွတ်မျှ ပွင့်တတ်သောသရဖီပင်ဝိုင်းရှိ၏။ မင်းလေး၏ စီးတော်ကျားတွင်းရှိ၏။ သစ်ရွက်ခြောက်လေးတွေသာ ရှပ်တိုက်ပြေးနေသော စောင်းတန်းအိုးလေးလည်းရှိ၏။

စောင်းတန်းအတက်စမှာ ဦးခန္တီကောင်းမှု အာရုံခံသံဇရပ်ကြီးကလူသူကင်းမဲ့ ငိုက်မျဉ်းနေတတ်ချေသေးသည်။ သို့သော် ဓားကိုယ်စီဖြင့် ရွေဖျဉ်းညီနောင်က ကျားကိုယ်စီစီးလျက် မာန်ဝံ့နေသေး၏။

လွန်ခဲ့သော နှစ်တစ်ရာကျော် ကာလများတော့ သည်နေရာမှာ အိမ်ရှေ့ကိုယ်တော်ကြီးရဲမက်တွေ မြင်းကိုယ်စီနှင့် ဟန်ရေးတပြပြ ဖြစ်နေမှာ မြင်ယောင်သည်။ ‘ယောက်ဖ၊ နှမပေး’ စသည်ဖြင့် ရင်းနှီးစွာစပြောင်ကြရင်း မြင်းရေးပြိုင်ကြမည်။ လက်လှဲအားစည်းကြမည်။ ဓားရေးပြကြမည်။ နပန်းပွဲ နွှဲကြမည်။ ငယ်ကျိုးငယ်နာဖော်ကာ နောက်ကြပြောင်ကြမည်။

ဪ . . . ထန်းရည်ကလေးကလည်း မူးနေကြပေသကိုး . .။

သခင်မတောင်တော်ဟုဆိုလျှင်ဖြင့် . . .၊ မန္တလေးသားတွေ ပြေးမြင်မိကြသည်မှာ . . . အိမ်ရှေ့မင်းထန်းတောပဲ ဖြစ်ပါသည်။ သခင်မတောင်ခြေအရှေ့ဘက်က ပိန်းပိတ်ညိုမှောင်နေသော ထန်းတောကြီးကား မန္တလေးအနီး ပတ်ဝန်းကျင်ရှိ ထန်းတောပေါင်းမြောက်မြားစွာအနက်၊ အကောင်းဆုံးထန်းရည်များထွက်ရာ ထန်းတောကြီးဖြစ်သည်။

ထိုထန်းတောကြီးမှာ နန်းတော်ရှေ့ ဆရာတင်လည်း ခြေရာထပ်မျှ နှံ့စပ်ခဲ့သည်။ သူ၏ နာမည်ကျော် ‘မင်းဂံဘုတ်’ သီချင်းကို အိမ်ရှေ့မင်းထန်းတောမှ မွေးဖွားခဲ့သည် မဟုတ်လား . . .။

ဤ၍ ဤမျှ သာယာခဲ့သော သခင်မတောင်တော်ကို နန်းတော်ရှေ့ ဆရာတင်ကပင် ဤသို့တေးဖွဲ့ခဲ့ဖူးသည်မဟုတ်လော . . .။

‘ပင်စုံမြိုင်နန်း၊ ပန်းကရမက်တွေက ဝေဝေလွင်လွင်၊ မစုံသူတွေ ရောက်ကြလျှင် ဝမ်းသာသလိုလို၊ ဝမ်းနည်းချင်သလိုလို ငိုချင်သလောက်ပင်၊ မုန်းချင်စိတ်နာပါတယ်။ လိပ်ပြတောင် ငယ်သေးပါတယ်။ အဝေးကမမြင်ချင်၊ ဪ . . . ဪ . . . ဗြိဇင်တောင်သဇင် တောစံပယ်ပန်းကလေးက ဘေးအကျ မွှေးလှတယ်ရှင်၊ ကျေးဇူးရှင် မေပျိုဥရဲ့ တောင်တော်အဝင် . . . ‘ တဲ့။

၁၉၈၈ ခုနှစ် ဒီမိုကရေစီအရေးတော်ပုံကြီးကို ပြည်လုံးကျွတ်ဆင်နွှဲကြချိန် ဩဂုတ်လ ၂၆ရက်နေ့တွင် မန္တလေးမြို့ပေါ်ရှိ ရဟန်းရှင်လူ ကျောင်းသားပြည်သူလူထုကြီးက မန္တလေးတောင်ခြေရှိမန်းရာ ပြည့်ကွင်းကြီးတွင် စုရုံးချီတက်ကာဒီမိုကရေစီအရေး တညီတညွတ်တည်း တောင်းဆိုခဲ့ကြသည်။

ထို့နောက် ၁၉၉ဝခုနှစ် မေလ ၂၇ရက်နေ့တွင် ပါတီစုံအထွေထွေရွေးကောက်ပွဲကြီး၌ သခင်မတောင်အဝင် လမ်းပေါ်ရှိကြာနီကန်မဲရုံတွင် အမျိုးသားဒီမိုကရေစီအဖွဲ့ချုပ်ပါတီက အပြတ်အသတ်အနိုင်ရကြောင်း အစောဆုံးကြေညာလိုက်သည်။

၁၉၈၉ခုနှစ်တွင် မန္တလေးတောင်မြေရှိ မန်းရာပြည့်ကွင်းကို ရတနာပုံတိရစ္ဆာန်ဥယျာဉ်အဖြစ် ပြောင်းလဲကာ ၁၉၉၀ကျော်တွင် မန္တလေးမြို့ပေါ်က သုသာန်အားလုံး ကြာနီကန်ရွာနှင့် သခင်မတောင်အကြား ပြောင်းရွေ့လိုက်တော့၏။

ဤကဲ့သို့ အနိုင်ကျင့် အာဏာရှင်စံနစ် အမှန်တကယ်ရှိခဲ့ပါ၏။ ထပ်မံလက်သင့်ခံကြဦးမည်လော။

ရေးသူ- ဆူးငှက်