မျက်မှောက်ခေတ် နိုင်ငံခေါင်းဆောင်တို့အတွက် စီစာရိုပေးသည့် သင်ခန်းစာ

စတေးအက်ဟုမ်းကာလအတွင်းဖတ်ဖြစ်သည့်စာအုပ်များထဲမှ ရောမနိုင်ငံရေးခေါင်းဆောင် မားကပ်စ်တူလီးယပ်စ် စီစာရိုရေးသားသော How to Run a Country ဟူသောစာအုပ်ထဲမှ စီစာရို၏ အတွေးအမြင်သဘောတရားများက မိမိကိုများစွာညှို့ယူဖမ်းစားနိုင်ခဲ့ပါသည်။

စီစာရို၏စာအုပ်ကိုအင်္ဂလိပ်ဘာသာသို့ ပြန်ဆိုရေးသားခဲ့သည့် စာရေးဆရာဖီးလစ်ဖရီးမင်းကလည်းစီစာရို၏ How to Run a Country စာအုပ်ထဲတွင် ယနေ့ခေတ်ကာလနိုင်ငံခေါင်းဆောင်များလေ့လာသင်ယူနိုင်မည့် အရေးပါသောသင်ခန်းစာများ ရှိနေသည်ဟုရေးသားခဲ့သည်။ စီစာရို၏ စာအုပ်ထဲမှ ဖရီးမင်းထုတ်နှုတ်ဖော်ပြခဲ့သောသင်ခန်းစာအချို့ကို လေ့လာဆန်းစစ်ကြည့်မည်ဆိုလျှင် –

၁။ သဘာဝဥပဒေကလူသားတို့၏ပြုမူဆောင်ရွက်မှုများကိုထိန်းကွပ်ပေးခြင်း ။

လူတိုင်း၏ အခြေခံလွတ်လပ်ခွင့်ကိုအာမခံပေးသည့် သဘာဝဥပဒေရှိသည်ကိုစီစာရိုကအခိုင်အမာယုံကြည်သည်။ အစိုးရတို့အနေနှင့် နိုင်ငံသားတို့၏ အခြေခံလွတ်လပ်ခွင့်ကိုအာမခံပေးသည့် ဥပဒေအတိုင်းစီမံအုပ်ချုပ်သင့်သည်ဟုဆိုသည်။ စီစာရို၏ နည်းနာကိုလက်ခံကျင့်သုံးခဲ့သည့် အမေရိကန်ပြည်ထောင်စုကိုတည်ထောင်ခဲ့သည့် ခေါင်းဆောင်တို့ကလည်းသူတို့၏ လွတ်လပ်ရေးကြေညာစာတမ်းတွင် ဤသို့ဆိုခဲ့သည်။

“နိုင်ငံသားအားလုံးတန်းတူညီမျှရှိရမည်ဟူသောအမှန်တရားကို ကျွန်ုပ်တို့ကလက်ကိုင်ထားသည်နှင့်အညီနိုင်ငံသားတို့၏ ဘဝ၊ လွတ်လပ်ခွင့်နှင့် ပျော်ရွှင်ချမ်းမြေ့မှုတည်းဟူသောရပိုင်ခွင့်များပြည့်စုံကုံလုံရေးကို ကျွန်ုပ်တို့ကမပျက်မကွယ် နှင်းအပ်ပေးပါမည်”ဟုဆိုခဲ့ခြင်းဖြစ်သည်။

၂။ အကောင်းဆုံးအစိုးရဖွဲ့စည်းမှုပုံစံကိုလက်ခံယုံကြည်ခြင်း ။

မြင့်မြတ်သောမင်းဧကရာဇ်တို့ပင်လျှင် အထိန်းအကွပ် အဟန့်အတားမရှိလျှင် အာဏာရှင်ဖြစ်လာတတ်သကဲ့သို့ အာဏာကိုထိန်းကျောင်းဟန့်တားမှုမရှိသည့် ဒီမိုကရေစီအစိုးရသည်လည်းလူဆိုးလူရမ်းကားတို့ စိုးမိုးအုပ်ချုပ်မှုဆီသို့ အဆင့်လျှောကျသွားတတ်ကြောင်း၊ အပြန်အလှန် ထိန်းကျောင်းတည့်မတ်ပေးသည့်စနစ်ရှိခြင်းကသာအကောင်းဆုံး အစိုးရတစ်ရပ်ကို ပေါ်ပေါက်လာစေမှာဖြစ်ကြောင်းစီစာရိုကလက်ခံယုံကြည်ခဲ့သည်။

၃။ ထူးချွန်ထက်မြက်၍ ဖြောင့်မတ်တည်ကြည်သောခေါင်းဆောင်များဖြစ်ခြင်း ။

နိုင်ငံတစ်နိုင်ငံကိုဦးဆောင်မည့်ခေါင်းဆောင်တို့သည် သတ္တိဗျတ္တိနှင့် ပြည့်စုံရမည်။ ထူးချွန်ထက်မြက်၍ ပြဿနာများကိုတည်ငြိမ်စွာဖြေရှင်းနိုင်ရမည်။ ခေါင်းဆောင်တို့သည် မိမိတို့၏ ကိုယ်ကျိုးစီးပွားထက် မိမိတို့နိုင်ငံ၏ အကျိုးစီးပွားကိုဦးထိပ်ထားရမည်ဟုဆိုသည်။

၎။ မိတ်ဆွေများကိုအလေးထားခြင်း ။

မိမိတို့၏ မိတ်ဆွေများနှင့် ထောက်ခံအားပေးသူတို့ကိုအလေးထားဂရုစိုက်သော ခေါင်းဆောင်များသာ အောင်မြင်မှုကိုဆုပ်ကိုင်ထားနိုင်မည်ဟုဆိုသည်။ အလားတူပင် ခေါင်းဆောင်တစ်ဦးသည် သူ့ကိုထောက်ခံအားပေးနေသူ တို့အားလျစ်လျူရှုပစ်ပယ်ခြင်းမပြုအပ်သကဲ့သို့ သူ၏ရန်သူတို့ ဘာတွေလုပ်ဆောင်နေသည်ကိုလည်းမျက်ခြေမပြတ် ဂရုပြုသင့်သည်ဟုဆိုသည်။

၅။ အသိဉာဏ်ပညာနှင့်ယှဉ်၍ ကြောင်းကျိုးဆီလျော်စွာပြုမူပြောဆိုခြင်း ။

ခေါင်းဆောင်တို့သည် သမ္ဖပ္ပလာပဝါစာ (ပေါ့တန်သောစကားကို) ပြောဆိုခြင်းမှရှောင်ကြဉ်သင့်သကဲ့သို့ အများပြည်သူတို့အတွက် အန္တရာယ် ဘေးသင့်စေမည့် မှားယွင်းသောဆုံးဖြတ်လုပ်ကိုင်မှုများမှာရှောင်ရှားသင့်သည်ဟုဆိုသည်။

၆။ စေ့စပ်ညှိနှိုင်းခြင်းသည် အရာရာပြီးမြောက် အောင်မြင်ရေး၏ အချက်အချာဖြစ်ခြင်း။

နိုင်ငံရေးတွင် ဖြစ်ပေါ်ပြောင်းလဲနေသောအခြေအနေများအပေါ်တွင် ရပ်တည်ချက်မှန်မှန်ဖြင့် စေ့စပ်ညှိနှိုင်းခြင်းကသာအရာရာကိုပြီးမြောက် အောင်မြင်စေနိုင်မည်ဟုစီစာရိုကလက်ခံယုံကြည်ခဲ့သည်။

၇။ မလိုအပ်ဘဲအခွန်အခများတိုးမြှင့်စည်းကြပ်ခြင်းမှ ရှောင်ကြဉ်ခြင်း ။

နိုင်ငံတစ်နိုင်ငံ၏ ပုံမှန်လည်ပတ်ရေးတွင် ဝင်ငွေရရှိရေးလိုအပ်သည်ဟုဆိုသော်လည်းနိုင်ငံသားတို့၏ ပိုင်ဆိုင်မှုအာမခံချက်ရှိရေးသည် အစိုးရတို့၏ နဂိုမူလရည်ရွယ်ချက်ဖြစ်သည်ဟုဆိုသည်။

၈။ ရွေ့ပြောင်းအခြေချသူများသည် နိုင်ငံ၏အင်အားဖြစ်ခြင်း။

ရောမနိုင်ငံတော်သည် ဇနပုဒ်အဆင့်မှ အင်အားကြီးမားသောနိုင်ငံအဖြစ် ရပ်တည်နိုင်ခြင်းမှာ နိုင်ငံသားအသစ်များကိုလက်ခံကြိုဆိုခဲ့သောကြောင့်ဖြစ်သည်ဟုဆိုသည်။

၉။ မတရားသောစစ်ပွဲကိုမည်သည့်အခါမျှ စတင်မှုမပြုခြင်း။

မိမိနိုင်ငံ၏ဂုဏ်သိက္ခာကိုထိပါးလာသည့် ကျူးကျော်စစ်ကိုခုခံကာကွယ်ရန်မှလွဲ၍ မတရားသောစစ်ကို စတင်ခြင်းမပြုသင့်ကြောင်းစီစာရိုကလက်ခံယုံကြည်ခဲ့သည်။

၁၀။ အကျင့်ပျက်ခြစားမှုကနိုင်ငံကိုပျက်စီးစေခြင်း။

အလိုလောဘကြီးမှု၊ လာဘ်ပေးလာဘ်ယူပြုမှုနှင့် မမှန်မကန်ပြမူမှုတို့သည် ကိုယ်ကျင့်တရားပျက်ပြားသော အပြုအမူများ ဖြစ်ပြီးထိုသို့သောစာရိတ္တပျက်ပြားမှုအလေ့အထကြီးစိုးလာပါကနိုင်ငံသားတို့ကိုစိတ်ပျက်လက်ပျက်ဖြစ်လာစေမည်ဖြစ်သကဲ့သို့ အကျင့်ပျက်ခြစားမှုအပေါ် မခံမရပ်နိုင်မှုများတိုးပွားလာပါကဆန့်ကျင်အာမခံမှုများ ပေါ်ပေါက်ကာနိုင်ငံကိုပျက်စီးရာ ပျက်စီးကြောင်းဆီဦးတည်စေနိုင်ကြောင်းစီစာရိုကသုံးသပ်ဆင်ခြင်ခဲ့သည်။

အဆိုပါ စီစာရို၏ တွေးဆဆင်ခြင်မှုများသည် မျက်မှောက်ခေတ် နိုင်ငံခေါင်းဆောင်တို့အတွက် များစွာအလေးထား ဆင်ခြင်အပ်သည့် သင်ခန်းစာများအဖြစ် တွေ့ရှိနိုင်မည်ဖြစ်သည်ဟုယုံကြည်မိပါကြောင်းသုံးသပ်တင်ပြလိုက်ရပါသည်။

ရေးသူ- မြင့်နောင်မိုး