မိုးတစ္ဆေ

တိမ်တိုက်တွေ

ညို့လာပြန်ပြီကောအမေ

အမောဖောက်ရာသီမှာ

ကာရန်မညီတဲ့မိုးပေါက်တွေ

ကျွန်တော့်ရင်ကို

ထိုးဖောက်ကြလိမ့်ဦးမယ်ထင်ရဲ့။

ခေါင်ကစမလုံခဲ့တဲ့အမိုးမို့

တံစက်မြိတ်အောက်မှာတွယ်ကပ်ရင်း

စက်စက်ကျစိုရွှဲခဲ့ရတဲ့

တစ်ခါကဘဝ

ပြန်မရချင်တော့ဘူးအမေ။

ထုသားပေသားကျနေတဲ့ဘဝမှာ

လောကဓံကိုအရစ်ကျပန်ဆင်ရင်း

ဟင်းလင်းပြင်အိပ်ရာထက်ကနေ

ကြယ်ရှုခင်းတွေငေးရတာလည်း

မောတယ်အမေ။

အမေ…..

အတိတ်မြေက

မပြည့်စုံခြင်းစိတ်တစ္ဆေဟာ

စံပယ်ရာသီမှာ

ပြာရီရီညို့ဆိုင်းလာတိုင်း

စိတ်မှာလှိုင်းထနေရဆဲပါအမေ။ ။

ဒီမိုစိုးသူ(ကောလင်း)