အကြမ်းဖက်မှု အနိဋ္ဌာရုံများ၊ ဖရုသဝါစာစကားများကို ကြားသိနေရ

တရားစောင့်သူကို တရားက ပြန်လည်စောင့်ရှောက်မည်ဟု သမ္မတပြော

ယခုတစ်လောတွင် အကြမ်းဖက်မှုအနိဋ္ဌာရုံများ၊ ဖရုသဝါ စာစကားများကို တွေ့မြင်ကြားသိနေရသောကြောင့် များစွာ စိတ်မချမ်းမသာဖြစ်ရကြောင်း နိုင်ငံတော်သမ္မတ ဦးဝင်းမြင့်က အောက်တိုဘာ ၂၇ရက်တွင် လူမှုကွန်ရက်၌ ပြောကြားသည်။

မဲဆန္ဒရှင် မိဘပြည်သူများခင်ဗျား၊ ကျွန်တော်တို့ရဲ့လမ်းစဉ်ဟာ အကြမ်းမဖက်ရေးပါ။ ကျွန်တော်တို့ဟာ နှလုံးရည်သမားတွေပါ။ ယခုတစ်လော အကြမ်းဖက်မှု အနိဋ္ဌာရုံတွေ၊ ဖရုသဝါစာ စကားတွေကို တွေ့မြင်ကြားသိနေရတာ များစွာ စိတ်မချမ်းမသာ ဖြစ်ရပါတယ်။ ဒါပေမဲ့ ရန်ကို ရန်ချင်း မတုံ့နှင်းကြပါနဲ့။ ရန်ကို ရန်ဖြင့်တုံ့ပြန်ခြင်းဟာ မည်သည့်အခါမျှ ရန်ငြိမ်းအေးမည် မဟုတ်ပါ’ဟု နိုင်ငံတော်သမ္မတ ဦးဝင်းမြင့်က ပြောကြားလိုက်သည်။

တရားစောင့်သူကို တရားက ပြန်လည်စောင့်ရှောက်ကြောင်း၊ ထို့ကြောင့် ဓမ္မပေါ်၌ မတွေမဝေ မယိမ်းမယိုင်ဘဲ ရပ်တည်ပေးကြရန်၊ အဓမ္မ ဟာ ဓမ္မကို နိုင်ရိုးထုံးစံမရှိကြောင်း၊ စိတ်ရှည်သည်းခံဇွဲ သန်ပြီး အထွေထွေရွေးကောက်ပွဲကြီးတွင် NLD ကို မပျက်မကွက် ထောက်ခံမဲပေးကြခြင်းဖြင့် အနိုင်ယူပြ ကြရန်သာလိုအပ်ကြောင်း နိုင်ငံတော်သမ္မတက ပြောသည်။

‘ယခုပြုလုပ်မယ့် ရွေးကောက်ပွဲဟာ လူတစ်ဦး တစ်ယောက်၊ တစ်စုတစ်ဖွဲ့ရဲ့ ပစ္စုပ္ပန်ကာလတဒင်္ဂအကျိုး အတွက် မဟုတ်ပါ။ နောင်သားစဉ်မြေးဆက်တိုင်အောင် ပြည်သူလူထု ကြီးတစ်ရပ်လုံးရဲ့ အကျိုးစီးပွားကို ဖြည့် ဆည်းဖော်ဆောင်ရမယ့် ဒီမိုကရေစီအသွင်ကူးပြောင်း ရေးလုပ်ငန်းစဉ်ကြီး ဖြစ်ပါတယ်။ ဒီမိုကရေစီဖက်ဒရယ် ပြည်ထောင်စုနိုင်ငံတော်သစ် တည်ဆောက်ရေးဆိုတာ ပြည်သူအားကိုးယုံကြည်တဲ့၊ ပြည်သူ့အကျိုးရှေးရှုတဲ့ ပြည်သူ့အစိုးရက ဆောင်ရွက်မှသာ အောင်မြင်မှုရမှာ ဖြစ်ပါတယ်။ ဒါကြောင့် NLD ကို အင်ပြည့်အားပြည့်နဲ့ မဲပေးကြရန် တစ်ယောက်ကစ တစ်ရာဆိုသလို ထပ်ဆင့် တိုက်တွန်းကြပါခင်ဗျာ’ဟု အောက်တိုဘာ ၂၆ ရက်တွင် နိုင်ငံတော်သမ္မတဦးဝင်းမြင့်က ပြောကြားထားသည်။

သတင်း – တေဇာဘုန်းမြင့်

စံတော်ချိန်သတင်းဌာနက တင်ဆက်လျက်ရှိသော သတင်း၊ သတင်းဆောင်းပါး၊ တွေ့ဆုံမေးမြန်းခန်းနှင့် ရုပ်သံအစီအစဉ်များအား ပူးတွဲဖော်ပြပါ Link (Viber) တွင်လည်း ဝင်ရောက်ဖတ်ရှုနိုင်ပါသည်။
https://tinyurl.com/y5vtkrh7

စံတော်ချိန်ယူကျု့-https://www.youtube.com/c/TheStandardTimeTVFreeToAir