ဘိုင်ဒင်၏ အနိုင်နှင့် တရုတ်-အမေရိကန် ဆက်ဆံရေး

ရင်တမမ စောင့်ကြည့်ခဲ့ကြရသော အမေရိကန်သမ္မတ ရွေးကောက်ပွဲ၌ ဒီမိုကရက်တစ်ပါတီကိုယ်စားပြု သမ္မတလောင်း ဂျိုးဘိုင်ဒင် အနိုင်ရပြီးချိန်တွင် ဒေါ်နယ်ထရန့် အာဏာရရှိထားစဉ်ကာလအတွင်း တစ်စတစ်စ ယိုယွင်းခဲ့ရသည့် တရုတ်-အမေရိကန် နှစ်နိုင်ငံဆက်ဆံရေးပြန်လည် တိုးတက်လာနိုင်ကြောင်း စိတ်ကူးသက်သက်အားဖြင့် မျှော်လင့်မိကြပါလိမ့်မည်။

သို့ရာတွင် အမေရိကန်သမ္မတရွေးကောက်ပွဲ တစ်ပွဲသည် အမေရိကန်နိုင်ငံရေးအတွက် အရေးကြီးလှသည့်တိုင် ယင်းရွေးကောက်ပွဲရလဒ်သည် ဒီမိုကရက်တစ်နှင့်ရီပတ်ဘလီ ကန်ပါတီနှစ်ခုစလုံး၏ ဘုံသဘောထားဖြစ်သည့် တရုတ်သည် အမေရိကန်ပြည်ထောင်စု၏ မဟာဗျူဟာပြိုင်ဘက် သို့မဟုတ် ရန်ဘက်ဖြစ်သည်ဆိုသောအမြင်ကို ချေဖျက်နိုင်မည်မဟုတ်ပေ။ ယင်းအပြင် သမ္မတသစ်အနေဖြင့် မူဝါဒရေးဆွဲချမှတ်ရာတွင် နိုင်ငံရေးအရ သွေးစည်းမှုနှင့် သဟဇာတရှိမှုတို့ကို ပေါင်းစပ်ပေးရလိမ့်မည်ဖြစ်ပြီး တစ်ချိန်တည်းမှာပင် အမေရိကန်အစိုးရ၏ တရုတ်ရေးရာမူဝါဒလမ်းစဉ်ကို မဟာမိတ်များ၏ မူဝါဒလမ်းစဉ်နှင့် ညှိနှိုင်းပေါင်းစပ်ရမည်ဖြစ်ရာ ဂျိုးဘိုင်ဒင် ဦးဆောင်မည့် အမေရိကန်အစိုးရလက်ထက်တွင် တရုတ်နိုင်ငံအပေါ် ဆက်လက်ဖိအားပေးနေနိုင်ဖွယ်ရှိသည်။

သို့ရာတွင် ထိုအချက်ကြောင့် တရုတ်နှင့် အမေရိကန် နှစ်နိုင်ငံဆက်ဆံရေး အထိန်းအကွပ်မဲ့ ဆက်လက်ကျဆင်းနေလိမ့်မည်မဟုတ်ပါ။ ဂျိုးဘိုင်ဒင် ဦးဆောင်သည့် အမေရိကန် အစိုးရအဖွဲ့သည် နိုင်ငံတကာရှုထောင့်မှတစ်ဆင့် တရုတ်-အမေရိကန် နှစ်နိုင်ငံဆက်ဆံရေး တည်ငြိမ်မှုကို ဆက်ထိန်းထားနိုင်သည့် အဖိုးတန်အခွင့်အလမ်းတစ်ရပ်ကို တရုတ်အစိုးရအတွက် ဖန်တီးပေးနိုင်ပါလိမ့်မည်။ ဂျိုးဘိုင်ဒင်အစိုးရအဖွဲ့အနေဖြင့် နိုင်ငံခြားရေးမူဝါဒနှင့် ပတ်သက်ပါက ပထမဆုံး ဦးစားပေး ဆောင်ရွက်မှုအလုပ်မှာ ထရန့်ဝါဒ၊ ထရန့် အမြင်များကို အခြေခံထားသော မူဝါဒဟောင်းများအား ဖယ်ထုတ်ရေးဖြစ်သည်။ သို့ဖြစ်ရာ ဂျိုးဘိုင်ဒင် ဦးဆောင်မည့် အစိုးရအဖွဲ့၏ လက်ထက်တွင် ရာသီဥတုပြောင်းလဲမှု၊ နျူကလီးယားလက်နက်မပြန့်ပွားရေး၊ ကိုရိုနာဗိုင်းရပ်စ်ကူးစက်မှု ကပ်ဘေးထိန်းချုပ်ရေး၊ နိုင်ငံတကာကုန်သွယ်ရေးနှင့် ဘဏ္ဍာရေးတည်ငြိမ်မှုစသည့် နယ်ပယ်များ၌ အမေရိကန်ပြည်ထောင်စု၏ မူဝါဒများ အခြေခံကျကျ ပြောင်းလဲလာနိုင်စရာ ရှိသည်။

ထိုနည်းတူ ဂျိုးဘိုင်ဒင် ဦးဆောင်မည့် အစိုးရသစ် လက်ထက်တွင် အမေရိကန်ပြည်ထောင်စုအနေဖြင့် ရာသီဥတုပြောင်းလဲမှုဆိုင်ရာ ပါရီသဘောတူညီချက်၊ ၂၀၁၅ အီရန် နျူကလီးယား သဘောတူညီချက်တို့ကို ပြန်လည်အသိအမှတ်ပြုမည်လားဆိုလျှင်၊ ယင်းသဘောတူညီချက်မူဘောင်များ အတွင်း ပြန်လည်ဝင်ရောက်မည်ဆိုလျှင်၊ ကမ္ဘာ့ကျန်းမာရေး အဖွဲ့၊ ကမ္ဘာ့ကုန်သွယ်ရေးအဖွဲ့တို့နှင့် အမေရိကန်ပြည်ထောင်စုတို့အကြား ဆက်ဆံရေးကို ပြန်လည်ထိန်းညှိ ပြင်ဆင်လာမည်ဆိုလျှင် အံ့ဩစရာ မရှိတော့ပါ။ အလားတူ ဂျိုးဘိုင်ဒင်အစိုးရ အဖွဲ့သစ်သည် ဥရောပစီးပွားရေးအင်အားကြီးနိုင်ငံများနှင့် တက်တက်ကြွကြွ အဆက်အဆံ ပြန်လုပ်လာနိုင်ပြီး ဂျပန်နိုင်ငံနှင့်လည်း ကုန်သွယ်ရေးနှင့် ရင်းနှီးမြှုပ်နှံရေး မူဘောင်သစ် များကို ပြန်လည်ညှိနှိုင်း ဆွေးနွေးလာနိုင်ဖွယ်ရှိသည်။ အထက်ပါ နယ်ပယ်များတွင် တရုတ်နိုင်ငံအနေဖြင့် အမေရိကန်ပြည်ထောင်စုနှင့် ခိုင်မာသော ဘုံသဘောတူညီချက်တစ်ရပ် ရယူနိုင်သလို ရလည်းရယူရန်သင့်သည်။

ဂျိုးဘိုင်ဒင်အစိုးရအဖွဲ့သစ်အနေဖြင့် ငါတကော အမေရိကဝါဒကို ဆက်လက်ကျင့်သုံးမည့် အလားအလာမျိုး မရှိပေ။ ရီပတ်ဘလီကန်သမ္မတ ဒေါ်နယ်ထရန့်လက်ထက် ကျင့်သုံးခဲ့သည့် ငါတကော အမေရိကဝါဒကြောင့် အမေရိကန်ပြည်ထောင်စု၏ ကမ္ဘာ့ခေါင်းဆောင်ပုံရိပ် ထိခိုက်ပျက်စီးခဲ့ရသည်။ သို့ဖြစ်ရာ ဂျိုးဘိုင်ဒင်အစိုးရသစ်အနေဖြင့် အမေရိ ကန် ဦးဆောင်မှုအောက်၌ ခိုင်မာသည့် မဟာမိတ်စနစ်တစ်ရပ် ကို ဆက်ထိန်းထားမည်ဆိုလျှင် နိုင်ငံစုံပူးပေါင်းဆောင်ရွက် နိုင်ရေးမှာ မရှိမဖြစ် အရေးကြီးလာပါလိမ့်မည်။

“ရီပတ်ဘလီကန်သမ္မတ ဒေါ်နယ်ထရန့်လက်ထက် ကျင့်သုံးခဲ့သည့် ငါတကော အမေရိကဝါဒကြောင့် အမေရိကန်ပြည်ထောင်စု၏ ကမ္ဘာ့ခေါင်းဆောင်ပုံရိပ် ထိခိုက်ပျက်စီးခဲ့ရသည်။ သို့ဖြစ်ရာ ဂျိုးဘိုင်ဒင်အစိုးရသစ်အနေဖြင့် အမေရိကန် ဦးဆောင်မှုအောက်၌ ခိုင်မာသည့် မဟာမိတ်စနစ်တစ်ရပ်ကို ဆက်ထိန်းထားမည်ဆိုလျှင် နိုင်ငံစုံပူးပေါင်းဆောင်ရွက်နိုင်ရေးမှာ မရှိမဖြစ် အရေးကြီးလာပါလိမ့်မည်။”

ဒေါ်နယ်ထရန့်ခေတ်တစ်လျှောက်လုံးတွင် တရုတ်ခေါင်းဆောင်များသည် နိုင်ငံတကာ အရေးကိစ္စများ၌ နိုင်ငံစုံ ပူးပေါင်းဆောင်ရွက်ရေး သဘောတရားကို လက်ခံ ကြောင်း အကြိမ်ကြိမ် ပြောခဲ့ကြသည်။ သို့ဖြစ်ရာ တရုတ်အစိုးရလိုလားသည့် နိုင်ငံစုံပူးပေါင်းဆောင်ရွက်ရေး သဘော တရားမှာ အပြောသက်သက်လား သို့တည်းမဟုတ် နိုင်ငံစုံ ပူးပေါင်းဆောင်ရွက်ရေးကိုပင် အားပေးမည့် အမေရိကန် အစိုးရသစ်နှင့် ပတ်သက်၍ မူဝါဒလမ်းစဉ်သစ် အစပျိုးပေးနိုင် မည့် လက်တွေ့သဘောတရားလားဆိုသည်ကိုစောင့်ကြည့် ရန် အချိန်အခါသင့်ပြီဖြစ်သည်။ တရုတ်နှင့် အမေရိကန်ပြည် ထောင်စုတို့သည် မဟာဗျူဟာပြိုင်ဘက်များအဖြစ် ရပ်တည် နေသည့်တိုင် တစ်နိုင်ငံနှင့်တစ်နိုင်ငံ ခွဲထုတ်ရန်လည်း မလွယ်ကူအောင် အပြန်အလှန် ချိတ်ဆက်ဆက်နွှယ်နေကြသော နိုင်ငံများဖြစ်ကြသည်။ သို့ဖြစ်ရာ နိုင်ငံတကာ အရေးအရာများကို နိုင်ငံစုံ ပူးပေါင်းဆောင်ရွက်ရေး သဘောတရားဖြင့် ဖြေရှင်းရေးမူဝါဒကြောင့် နိုင်ငံတကာကိစ္စများတွင် တရုတ်နှင့် အမေရိကန်ပြည်ထောင်စုအကြား အပြုသဘောဆောင် သည့် အဆက်အဆံများ ပေါ်ထွက်လာနိုင်ပါသည်။

ကိုရိုနာဗိုင်းရပ်စ်ကူးစက်မှု ကပ်ဘေးကာလအတွင်း စီးပွားရေးအရ ပြိုလဲမှုကို ကာကွယ်ရန် စီးပွားရေး အင်အားကြီး နိုင်ငံများအနေဖြင့် ဈေးကွက်များအတွင်းသို့ အမေရိကန် ဒေါ်လာ ဘီလီယံပေါင်းများစွာ အားဖြည့်ပေးခဲ့ရခြင်းကြောင့် ကမ္ဘာ့စီးပွားရေးမှာ ဘဏ္ဍာရေးကပ်ဆိုက်မည့်အခြေအနေနှင့် ရင်ဆိုင်နေရသည်။ ထိုသို့သောအခြေအနေမျိုးတွင် တရုတ်နှင့် အမေရိကန်ပြည်ထောင်စုတို့အနေဖြင့် ကမ္ဘာ့ဘဏ္ဍာရေး တည်ငြိမ်မှုကို ထိန်းထားရေးအတွက် ခိုင်မာသည့် ဘုံသဘော တူညီချက်မျိုး ရယူနိုင်သည်။ တရုတ်နိုင်ငံသည် ကမ္ဘာပေါ်၌ အရန်နိုင်ငံခြားငွေပမာဏ အများဆုံးကိုင်ထားနိုင်သော နိုင်ငံဖြစ်သလို အမေရိကန်ငွေတိုက်စာချုပ်များကိုလည်း ဒုတိယ အများဆုံး ပိုင်ဆိုင်ထားသော နိုင်ငံဖြစ်သည်။ ကမ္ဘာ့ဘဏ္ဍာရေး ကပ်ဆိုက်မှုသည် ကမ္ဘာ့အကြီးဆုံးကုန်သွယ်ရေးနိုင်ငံဖြစ် သည့် တရုတ်နိုင်ငံအတွက်ရော စီးပွားရေးဖွံ့ဖြိုးမှုအတွက် ဘဏ္ဍာ ရေးစနစ် တည်ငြိမ်မှုရှိရန်လိုသည့် အမေရိကန်ပြည်ထောင်စု အတွက်ပါ ဘုံပြဿနာတစ်ရပ်ဖြစ်သည်။

တစ်ချိန်တည်းမှာပင် တရုတ်နှင့် အမေရိကန်ပြည် ထောင်စုတို့အကြား တင်းမာမှုများ အန္တရာယ်ကြီးမားသော ပဋိပက္ခအဖြစ် ပြောင်းလဲမသွားစေရေးအတွက် တောင်တရုတ် ပင်လယ်နှင့် ထိုင်ဝမ်ရေလက်ကြားကဲ့သို့သော ပြဿနာများကို ဖြေရှင်းနိုင်ရန် သင့်လျော်သည့် ပဋိပက္ခစီမံခန့်ခွဲမှု ယန္တရား စနစ်တစ်ခု နှစ်နိုင်ငံအကြား တည်ဆောက်ထားရေးမှာ အရေးကြီးလှသည်။

နောက်ဆုံး အရေးကြီးသည့်အချက်မှာ ၂၀၂၂ ခုနှစ် ကြားဖြတ်ရွေးကောက်ပွဲမတိုင်မီ တရုတ်နိုင်ငံနှင့် ပတ်သက်၍ ပြတ်သားရှင်းလင်းသည့် မူဝါဒရေးဆွဲရမည့် ဂျိုးဘိုင်ဒင်အစိုးရ သစ်ထံမှ ဘာကိုမျှ အလွန်အကျွံ မမျှော်လင့်ရေး ဖြစ်သည်။ ဂျိုးဘိုင်ဒင်အစိုးရအဖွဲ့ကလည်း ဦးစားပေးရမည့် အလုပ်များ စာရင်းတွင် အမေရိကန်ပြည်သူများအကြား အကြီးအကျယ် သွေးကွဲခဲ့ရသည့် ရွေးကောက်ပွဲအလွန်ကာလ၌ အမျိုးသား ပြန်လည်ရင်ကြားစေ့ရေး၊ ကိုရိုနာဗိုင်းရပ်စ် ကူးစက်မှုကို ထိန်းချုပ်နိုင်ရေး၊ ကိုရိုနာဗိုင်းရပ်စ် ကူးစက်မှု၏ အကျိုးဆက်ကို ခံစားနေရဆဲဖြစ်သော အမေရိကန်စီးပွားရေးကို စေ့ဆော် အားပေးရေး၊ ၂၀၂၂ ခုနှစ် ကြားဖြတ်ရွေးကောက်ပွဲ၌ ထပ်မံ အောင်ပွဲခံရေးအတွက် ဒီမိုကရက်တစ်ပါတီ၏ နိုင်ငံရေးဩဇာ ပိုမိုခိုင်မာလာရေးတို့ ပါဝင်သည်။

တစ်ချိန်တည်းမှာ ဂျိုးဘိုင်ဒင် အစိုးရသစ်သည် ဒေါ်နယ်ထရန့်၏ ငါတကော ကောမှုကြောင့် ပျက်စီးခဲ့ရသည့် မဟာမိတ်များအကြား အမေရိကန်ပြည်ထောင်စု၏ ဦးဆောင် မှု အခန်းကဏ္ဍကို ပြန်လည်ပြင်ဆင်ထိန်းသိမ်းရန် ဦးစားပေး ဆောင်ရွက်ရဦးမည်ဖြစ်သည်။ အမေရိကန်၏ ခွန်အားသည် စစ်အင်အားအပေါ်တွင်သာမက ဒုတိယကမ္ဘာစစ် ပြီးဆုံးပြီးနောက်ပိုင်း ပေါ်ထွက်လာသည့် အမေရိကန်ဦးဆောင်သော မဟာမိတ်စနစ်အပေါ်တွင်လည်း အခြေပြုကြောင်း ဂျိုးဘိုင် ဒင်နှင့် ဒီမိုကရက်တစ်ဘက်သားများက နားလည်ထားပြီး ဖြစ်သည်။ အမေရိကန်နှင့် တရုတ်ဆက်ဆံရေးတည်ငြိမ်မှု သည် တရုတ်အမျိုးသား အကျိုးစီးပွားအတွက် အရေးကြီးကြောင်း တရုတ်အစိုးရက အမှန်တကယ် လက်ခံထားပါက အမေရိကန်ပြည်ထောင်စုနှင့်ပတ်သက်၍ မူဝါဒရေးရာ အပြောင်းအလဲများကို ပြသရန် တရုတ်ခေါင်းဆောင်ပိုင်း အတွက် အချိန်အခါနှင့် အခွင့်အလမ်း ရှိလာပါလိမ့်မည်။ ပြုပြင်ပြောင်းလဲရေးနှင့် ရိုးရှင်းပွင့်လင်းရေးတို့ကို လက်ခံ မည့် တရုတ်အစိုးရ၏ဆုံးဖြတ်ချက်နှင့် နိုင်ငံတကာအရေးအရာများ၌ ရှိရင်းစွဲ စည်းကမ်းများ၊ မူဝါဒများနှင့် စည်းမျဉ်းများအပေါ် တရုတ်အစိုးရက လေးစားမှုတို့ကို မူဝါဒအပြောင်းအလဲများဖြင့် သက်သေတည်နိုင်ခဲ့လျှင် တရုတ်နှင့်အမေရိကန်ဆက်ဆံရေး လည်း ပြောင်းလဲသွားနိုင်ပါသည်။

ဂျိုးဘိုင်ဒင်အစိုးရသစ်လက်ထက်တွင် တရုတ်နှင့် အမေရိကန်တို့၏ ပြိုင်ဆိုင်မှုသည် ထိန်းထိန်းဆဆရှိသည့် ပြိုင်ဆိုင်မှု ဖြစ်လာနိုင်စရာအကြောင်းရှိသည်။ စင်စစ်အားဖြင့် ကမ္ဘာ့ငြိမ်းချမ်းရေးနှင့် တရုတ်-အမေရိကန် ဆက်ဆံရေး အနာဂတ်ကို ဘေးသင့်စေမည့် အန္တရာယ်အစစ်အမှန်မှာ နှစ်နိုင်ငံအကြား မဟာဗျူဟာအားပြိုင်မှုမဟုတ်ပါ။ ခေတ်အဆက် ဆက်တန်ဖိုးထားခဲ့ကြသော ကစားပွဲစည်းမျဉ်းများကို နှစ် နိုင်ငံစလုံးက မလိုက်နာဘဲ အမြင်ကျဉ်းမြောင်းစွာ အဓိပ္ပာယ် ဖွင့်ဆိုထားသော ကိုယ်ပိုင်အကျိုးစီးပွားများကိုသာ အခြေ တည်ကစားသည့် အားပြိုင်ပွဲမှ ထွက်ပေါ်လာမည့် မရေမရာ ရလဒ်များကြောင့်သာ ကမ္ဘာ့ငြိမ်းချမ်းရေးနှင့် တရုတ်-အမေ ရိကန် နှစ်နိုင်ငံ ဆက်ဆံရေးအနာဂတ် ထိခိုက်သွားနိုင်ပါသည်။

(Nikkei Asia သတင်းစာပါ What a Biden victory means for china ကို ပြန်ဆိုသည်)

ရေးသူ – ဗျည်းနွဲ့