စနစ်အဟောင်းလက်ကျန် မူလတန်းကျောင်းအုပ် အတိုး/အပြောင်း အော်ဒါမထွက်ပေးဘဲ ချန်ထားသည့်အတွက် ဆရာ/ဆရာမများ နစ်နာဆုံးရှုံးမှုများရှိနေဟုဆို

၂၀၁၉-၂၀၂၀ ပညာသင်နှစ်အတွင်း အခြေခံပညာဦးစီးဌာနမှ မူလတန်းအဆင့်၊ အလယ်တန်းအဆင့်နှင့် အထက်တန်းအဆင့် ရာထူး အတိုး / အပြောင်းအရွှေ့များ အမိန့်ထွက်ခဲ့သည်မှာ ကြာမြင့်ပြီဖြစ်သော်လည်း ကျန်ရှိနေသော မူလတန်း ကျောင်းအုပ်ရာထူး အတိုး/ အပြောင်းအရွှေ့များကို ဖွဲ့စည်းပုံစနစ်အသစ်အရ ချန်ထားခံရသည့်အတွက် ဆရာ/ဆရာမများ အနေဖြင့် အခွင့်အရေး နစ်နာဆုံးရှုံးမှုများ ရှိနေကြောင်း မူလတန်းပြဆရာ/ဆရာမ များထံစုံစမ်းသိရှိရသည်။

၂၀၂၀ ခုနှစ်တွင် ရာထူးတိုးခေါ်ယူခဲ့သော မူလတန်းကျောင်းအုပ်များအား ရာထူးတိုး တန်းစီဇယားတွင် ယခင်ဖွဲ့စည်းပုံ မူလတန်းပြ လုပ်သက်(၂)နှစ် ပြည့်ပြီးသူများ မူလတန်းကျောင်းအုပ်ရာထူးတိုး လျှောက်ထားခွင့်ရှိသော်လည်း ယခုဖွဲ့စည်းပုံသစ်ရှိ မူလတန်းကျောင်းအုပ်မှာ လစာနှုန်းကျပ် (၂၁၆၀၀၀-၂၀၀၀ – ၂၂၆၀၀၀) ဖြစ်သဖြင့် ဖွဲ့စည်းပုံအဟောင်းရှိ မူလတန်းပြများသည် မူလတန်း ကျောင်းအုပ် ရာထူးတိုး လျှောက်ထားပါက လစာနှုန်းတစ်ဆင့်ကျော် လျှောက်ထားခြင်းဖြစ်သဖြင့် နိုင်ငံ့ဝန်ထမ်း နည်းဥပဒေအရ ဆောင်ရွက်၍ မရပါသောကြောင့် သတ်မှတ်မှုနှင့်အညီ ဆက်လက် ဆောင်ရွက်သွားမည်ဖြစ်ကြောင်း အခြေခံပညာဦးစီးဌာနမှ နိုဝင်ဘာ ၁၆ ရက်တွင် ထုတ်ပြန်ခဲ့ခြင်း ဖြစ်သည်။

“အရင်ဖွဲ့စည်းပုံ အဟောင်းအရ မူလုပ်သက် ၂ နှစ်ဆိုရင် အလပြ / မူအုပ် လျှောက်ခွင့်ရှိတယ်။ မူလယ်ပေါင်း ၅ နှစ်ဆိုရင်လည်း BEd ဖြေဆိုခွင့်ရကြတယ်။ ခု အသစ်ဖွဲ့စည်းလိုက်တဲ့ ဖွဲ့စည်းပုံအသစ်ကို လေ့လာရသလောက် လက်ထောက် မူ/လယ် ပြကနေ ဒု မူ/လယ်ပြ သို့ရောက်ဖို့ ၇ နှစ်စောင့်ရမယ်။ ဒု မူ/လယ် ပြနဲ့လည်း BEd ဖြေခွင့်မရသေးဘူး ထက်ပြစကေး လစာရတဲ့ မူပြ မူအုပ် လယ်ပြ အဆင့်ကို လုပ်သက် ၁၀ နှစ်ကျော်စောင့်ပြီးမှ ရမယ် ပြီးမှ BEd ဖြေခွင့်ရမယ်။ ပြောချင်တာက ဖွဲ့စည်းပုံအဟောင်းမှာ ၅ နှစ်နဲ့ BEd ဘွဲ့ရနိုင်တယ် ဖွဲ့စည်းပုံအသစ်မှာ ၁၀ နှစ်ကျော်မှ BEd ဘွဲ့ကို ရနိုင်မယ့် အခြေအနေရှိနေပြီ။ ရာထူးတိုးမှာ လစာတိုးမှာ မျှော်ကိုးလို့မဟုတ်ဘူး။ ပညာရေး ဝန်ထမ်းတစ်ယောက်အနေနဲ့ ပညာရေးဘွဲ့ BEd ကို မက်မောလို့ ပြောတာပါ”ဟု တနင်္သာရီတိုင်းဒေသကြီး ကော့သောင်း မြို့နယ် မူ/လွန်(ဂျလန်း)မှ မူလတန်းပြ ဦးဂင်ရှိန်က စံတော်ချိန်သို့ ပြောသည်။

မူအုပ်ပြောင်း/တိုးသူများ နစ်နာမှုများ ရှိနေသည့်အတွက် ယခုနှစ်လျောက်ထားသော ရာထူးအားလုံးခန့်ပြီးမှသာ စနစ်သစ်မူပြောင်းတိုးရန်နှင့် လက်ကျန်ရှိနေသော မူအုပ် တိုးပြောင်းရာထူးများ အမြန်ဆုံးထွက်ပေးရန် ပညာရေးဝန်ကြီးဌာနသို့ အသနားခံစာ ပေးပို့ထားကြောင်း သိရသည်။

“ဖွဲ့စည်းပုံအသစ်အရ မူ/အုပ်တိုးပြောင်းကို မတင်ဖို့ အစထဲက ပြောရင် မတင်ဘူးလေ။ အခုကျတော့ သူတို့ကိုယ်တိုင် ညွှန်ကြားလို့ အစအဆုံး တင်ပြီးလို့ တန်းစီဇယား ထွက်ပြီးမှ ဖွဲ့စည်းပုံအသစ်အရ Cancel လုပ်လိုက်တော့ မတရားဘူး ကျွန်တော်တို့အနေနဲ့ နစ်နာမှုရှိတဲ့အတွက် ပညာရေးဝန်ကြီးဌာနမှ ပြည်ထောင်စုဝန်ကြီးကို လိပ်မူပြီး ဆရာ/ဆရာမတွေ အသနားခံစာ ပေးပို့ထားပါတယ်”ဟု ကျိုင်းတုံမြို့နယ် အမက(လွိုင်မွေ) မှ မူလတန်းပြ ဆရာ ဦးသူရအောင်က ပြောသည်။

အဆိုပါ အသနားခံစာတွင်”မူလတန်းကျောင်းအုပ် ရာထူးအတိုးလျှောက်ထားသူများသည် ယခင်စနစ်ဟောင်း ဖွဲ့စည်းပုံကာလတွင် လျှောက်ထားသူများပင် ဖြစ်သောကြောင့် ယခုဖွဲ့စည်းပုံစနစ်အရ မူလတန်းကျောင်းအုပ် ရာထူး အတိုး/အပြောင်း အရွှေ့အမိန့်နှင့် လုံဝမသက်ဆိုင်သေးပါကြောင်းနှင့် ၂၀၁၉-၂၀၂၀ ခုနှစ် ဖွဲ့စည်းပုံ အဟောင်းအရ မူလတန်း ကျောင်းအုပ် ရာထူး/ အပြောင်းအရွှေ့များကို သတ်မှတ်ထားသော လစာနှုန်း (၁၉၈၀၀၀-၂၀၀၀-၂၀၈၀၀၀) အတိုင်းပေးပြီး ယခုဖွဲ့စည်းပုံ စနစ်သစ်အရ ပြန်လည်ကိုင်တွယ်ဖြေရှင်း၍ ၂၀၁၉-၂၀၂၀ ပညာသင်နှစ်အတွက် အမိန့်ထွက်ရှိရန် ကျန်ရှိနေသော မူလတန်းကျောင်းအုပ်ရာထူး အတိုး/ အပြောင်းအရွှေ့ များ အမြန်ဆုံး ထွက်ပေးပါရန် ဆရာ/ ဆရာမများအားလုံးကိုယ်စား လက်မှတ်ရေးထိုး၍ ရိုသေလေးစားစွာ အသနားခံ တင်ပြအပ်ပါသည်”ဟု ဖော်ပြထားသည်။

ပညာရေးဝန်ကြီးဌာနအနေဖြင့် ယင်းအသနားခံစာနှင့်ပတ်သက်ပြီး တစ်စုံတစ်ရာ အကြောင်းပြန်တုံ့ပြန်ဆောင်ရွက်ပေးခြင်းမရှိသေးကြောင်း သိရသည်။

အဆိုပါ ကိစ္စရပ်နှင့်ပတ်သက်၍ အခြေခံပညာဦးစီးဌာနသို့ စံတော်ချိန်သတင်းဌာနမှ အကြိမ်ကြိမ်ဆက်သွယ်ခဲ့သော်လည်း ဆက်သွယ်၍ မရခဲ့ပေ။

သတင်း – သီတာလွင်/ စံတော်ချိန်