ပုံမှန်မဟုတ်သည့် မဲစာရင်းတစ်သန်းကျော်ထွက်ပေါ်လာကြောင်း ပြည်ခိုင်ဖြိုးပါတီဥက္ကဋ္ဌ ဦးသန်းဌေး ပြော

တိုင်းဒေသကြီးနှစ်ခုမှ မြို့နယ်အချို့အား ကွန်ပျူတာပညာရှင်များနှင့် ပြန်လည်စစ်ဆေးရာတွင် ပုံမှန်မဟုတ်သည့် မဲစာရင်းတစ်သန်းကျော်ထွက်ပေါ်လာကြောင်း ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP) ဥက္ကဋ္ဌ ဦးသန်းဌေး က လူမှုကွန်ရက်၌ ရေးသားထားသည်။

“ယခင်က စစ်ဆေးချိန်မရခဲ့တဲ့ စာရင်းဇယားများကို ကွန်ပျူတာပညာရှင်များနဲ့ ပြန်လည်စစ်ဆေးလိုက်တဲ့အခါမှာတော့ တိုင်းဒေသကြီးနှစ်ခုက လက်တစ်ဆုပ်စာမြို့နယ်တွေပဲ စစ်နိုင်သေးတယ်။ ပုံမှန်မဟုတ်တဲ့ မဲစာရင်းတစ်သန်းကျော်ထွက်လာပါပြီ” ဟု ဦးသန်းဌေး က လူမှုကွန်ရက်တွင် ရေးသားထားခြင်းဖြစ်သည်။

ထို့အပြင် ၎င်းက ၂၀၂၀ အထွေထွေရွေးကောက်ပွဲနှင့်ပတ်သက်၍ စစ်မှန်သည့်ပြည်သူအများစု၏ ဆန္ဒဖြစ်ပါက လက်ခံရန်အသင့်ရှိကြောင်း တင်ပြခဲ့ပြီးဖြစ်ပြီး ပြည်သူ့ဆန္ဒအမှန်မဟုတ်သည့် တရားမဲ့ရယူထားသည့် ရလဒ်များဖြစ်ပါက ဆန့်ကျင်ဘက်အဓိပ္ပာယ်ထွက်မည်ဖြစ်ကြောင်း ရေးသားထားသည်။

သက်သေခံမဲစာရင်းပုံစံများ၊ မဲစာရင်းစာအုပ်များနှင့် မဲလက်မှတ်များမှာ မပျောက်မပျက် လုံလုံခြုံခြုံရှိနေရန် လိုအပ်ကြောင်းလည်း ဦးသန်းဌေး က လူမှုကွန်ရက်တွင် အသိပေးထားသည်။

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီသည် ပြည်ထောင်စုရွေးကောက်ပွဲကော်မရှင်(UEC) ၏ ဆောင်ရွက်ချက်များနှင့်ပတ်သက်၍ ပြည်ထောင်စုတရားလွှတ်တော်ချုပ်သို့ တိုင်ကြားထားပြီး တိုင်ကြားမှုနှင့်ပတ်သက်၍ အဆိုပါရုံးက လက်ခံထားကြောင်း သိရသည်။

သတင်း – စွမ်းရည်တိုး / စံတော်ချိန်
ဓာတ်ပုံ – U Than Htay FB