ပြည်ခိုင်ဖြိုးနှင့်တပ်မတော်တောင်းဆိုသည့် ပြည်ထောင်စုလွှတ်တော် အထူးအစည်းအဝေးခေါ်ယူရန် မရှိကြောင်း ထုတ်ပြန်

ပြည်ခိုင်ဖြိုးပါတီနှင့်တပ်မတော်တို့မှ ကိုယ်စားလှယ်များအပါအ၀င် ရွေးကောက်ခံပြည်သူ့လွှတ်တော် ကိုယ်စားလှယ် ၃၃ ဦး၊ ရွေးကောက်ခံအမျိုးသားလွှတ်တော် ကိုယ်စားလှယ် ၁၀ ဦးနှင့် တပ်မတော်သားလွှတ်တော်ကိုယ်စားလှယ် ၁၆၀ ဦး၊ စုစုပေါင်း ပြည်ထောင်စုလွှတ်တော်ကိုယ်စားလှယ် ၂၀၃ ဦး တောင်းဆိုထားသည့် ပြည်ထောင်စုလွှတ်တော် အထူးအစည်းအဝေးခေါ်ယူရန် မရှိကြောင်း ပြည်ထောင်စုလွှတ်တော်က ယနေ့(ဇန်နဝါရီ ၁၂ ရက်) တွင် ထုတ်ပြန်ကြေညာသည်။

ထုတ်ပြန်ချက်တွင် အထက်ပါ ပြည်ထောင်စုလွှတ်တော်ကိုယ်စားလှယ် ၂၀၃ ဦး သည် ဖွဲ့စည်းပုံအခြေခံဥပဒေပုဒ်မ ၈၄ နှင့် ပြည်ထောင်စုလွှတ်တော်ဆိုင်ရာ ဥပဒေပုဒ်မ ၁၂ အား ရည်ညွှန်း၍ အထူးအစည်းအဝေးခေါ်ယူရန် တောင်းဆိုထားကြောင်း၊ တင်ပြစာပါ အထူးအစည်းအဝေးအတွက် အဓိကအကြောင်းပြချက်အား စိစစ်ရာတွင် ၂၀၂၀ ရွေးကောက်ပွဲဆိုင်ရာ တိုင်ကြား၊ ကန့်ကွက်မှုများအတွက် ပြည်သူ့ကိုယ်စားလှယ်များနှင့် စုပေါင်းအဖြေရှာ ဆုံးဖြတ်နိုင်ရန်ဟု တွေ့ရှိရပြီး လက်ရှိလွှတ်တော်သက်တမ်းကို မှန်ကန်စွာ ပိတ်သိမ်း၍ သက်တမ်းအသစ်တစ်ခုကို ဥပဒေနှင့်အညီ ကူးပြောင်းနိုင်ရန် တင်ပြထားကြောင်း ပါရှိသည်။

သို့ရာတွင် အထူးအစည်းအဝေးခေါ်ယူကျင်းပရန် တင်ပြတောင်းဆိုထားသည့် အကြောင်းပြချက်များမှာ ဖွဲ့စည်းပုံအခြေခံဥပဒေပုဒ်မ ၈၁ ပါ ပြဋ္ဌာန်းချက်များအရ (၁) ပြည်ထောင်စုလွှတ်တော်၏ ဆုံးဖြတ်ချက်၊ သဘောတူညီချက်၊ အတည်ပြုချက် ရယူရမည့်ကိစ္စရပ်မဟုတ်ခြင်း၊ (၂) ရွေးကောက်ပွဲဆိုင်ရာ ကိစ္စများနှင့် စပ်လျဉ်း၍ ဖွဲ့စည်းပုံအခြေခံဥပဒေ ပုဒ်မ ၄၀၂ နှင့် ပြည်ထောင်စုရွေးကောက်ပွဲကော်မရှင် ဥပဒေပုဒ်မ ၁၁ တို့တွင် ပြည်ထောင်စုရွေးကောက်ပွဲကော်မရှင်၏ ဆုံးဖြတ်ချက်နှင့်ဆောင်ရွက်ချက်များသည် အပြီးအပြတ်အတည်ဖြစ်စေရမည်ဟု ပြဋ္ဌာန်းထားသည့်အတွက် ပြည်ထောင်စုလွှတ်တော်အစည်းအဝေး၌ စုပေါင်းတိုင်ပင် အဖြေရှာဆုံးဖြတ်ရမည့် ကိစ္စမဟုတ်ခြင်း၊ (၃) ရွေးကောက်ပွဲအဆင့်ဆင့်သို့ တိုင်ကြားကန့်ကွက်ခြင်းများအတွက် ပြည်ထောင်စုရွေးကောက်ပွဲကော်မရှင်က သက်ဆိုင်ရာ ဥပဒေ၊ နည်းဥပဒေများနှင့်အညီ ဆက်လက်ဆောင်ရွက်ရမည့်ကိစ္စများဖြစ်ခြင်း စသည့်အချက် ၃ ချက်ဖြင့် ပြည်ထောင်စုလွှတ်တော် အထူးအစည်းအဝေးခေါ်ယူကျင်းပပေးရန် မလိုအပ်ကြောင်း ပြည်ထောင်စုလွှတ်တော်က ထုတ်ပြန်ကြေညာလိုက်သည်။

သတင်း – စွမ်းရည်တိုး