ကရင်ပြည်နယ်၏ ရေရှည်တည်တံ့သည့်ငြိမ်းချမ်းရေး၊တန်းတူညီမျှမှုနှင့်တရားမျှတမှုတို့ကို အလေးထားဖော်ဆောင်ရန်ကရင်ပြည်သူများ၏ ပူးပေါင်းဆောင်ရွက်မှုအပေါ်အထူးတည်မီနေဟုဒေါ်အောင်ဆန်းစုကြည်ဆို

ကရင်ပြည်နယ်၏ ရေရှည်တည်တံ့ခိုင်မြဲသည့် ငြိမ်းချမ်းရေးနှင့်အတူဒွန်တွဲလျက် ပြည်ထောင်စုအတွင်း တရားဥပဒေစိုးမိုးမှု ၊ လွတ်လပ်မှု ၊ တန်းတူညီမျှမှုနှင့် တရားမျှတမှုတို့ကို အလေးထား ဖော်ဆောင်သွားနိုင်ရန်မှာ ကရင်ပြည်နယ်သူ၊ ပြည်နယ်သားများ၏ ပူးပေါင်းပါဝင် ဆောင်ရွက်မှုအပေါ်တွင် အထူးတည်မီနေကြောင်းနိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကပြောကြားလိုက်သည်။

ယနေ့(ဇန်နဝါရီ ၁၃ ရက်)၌ကျရောက်သည့်ကရင်နှစ်သစ်ကူးနေ့အတွက်ပေးပို့သော သဝဏ်လွှာတွင် ၎င်းကအထက်ပါအတိုင်းတိုက်တွန်းပြောကြားလိုက်ခြင်းဖြစ်သည်။ ကရင်ပြည်နယ်သည် နယ်စပ်ဒေသဖြစ်သည်နှင့်အညီ ဒေသတွင်း သဘာဝပတ်ဝန်းကျင်နှင့် ဒေသခံ ပြည်သူများ၏ လူမှု-စီးပွားကို မထိခိုက်စေဘဲ တိုးတက်မှုများကို စနစ်တကျ ဖော်ဆောင်နိုင်ရန် အထူးအရေးကြီးကြောင်း၊ စီးပွားရေး အခွင့်အလမ်းများနှင့် ဒေသ ဖွံ့ဖြိုးရေးကို ဖော်ဆောင်ရာတွင် ရေရှည်တည်တံ့မှု ၊ စနစ်တကျရှိမှု၊ ဒေသနှင့် ဒေသခံ ပြည်သူများအတွက် စစ်မှန်သည့် တိုးတက်မှုစသည်ဖြင့် အထူးလိုအပ်ကြောင်း ဒေါ်အောင်ဆန်းစုကြည်ကဆိုသည်။

လာမည့် ၂၀၃၀ ပြည့်နှစ်တွင် ကရင်ပြည်နယ်ကို ရေရှည်တည်တံ့ခိုင်မြဲသည့် ငြိမ်းချမ်းရေးရရှိပြီး ခရီးသွားလုပ်ငန်း ဗဟိုချက်တစ်ခု ၊ ခေတ်မီ နယ်စပ်ကုန်သွယ်ရေးဇုန်ကြီးတစ်ခု ၊ အထူးစိုက်ပျိုးရေးဇုန်၊ အထူးစက်မှုဇုန်ကြီးများနှင့် အထူးစီးပွားရေးဇုန်ကြီးများ ဖြစ်ထွန်းပေါ်ပေါက်ရန်ရှိပြီး ၎င်းပြည်နယ်ကို နည်းပညာအခြေခံ ကရင်လူ့အဖွဲ့အစည်းက မိမိတို့၏ ကျွမ်းကျင်မှုဖြင့် ညီညီညွတ်ညွတ် တည်ဆောက်နေကြသည်ကို မြင်လို၊ တွေ့လို၊ လက်တွေ့ ဖြစ်ပေါ် လာစေလိုကြောင်း၎င်းကတိုက်တွန်းပြောကြားသည်။

ကရင်ပြည်နယ်အတွက် ပညာနှင့်ယှဉ်တွဲသော သတ္တိရှိခြင်း၊ မိမိတို့ မျိုးဆက်သစ်များ အတွက် မေတ္တာနှင့်ယှဉ်တွဲသော ရဲရင့်ခြင်းသည် မွန်မြတ်သော စိတ်ဓာတ်၊ ထားအပ်သည့် ခံယူချက်၊ မြင့်မြတ်သည့် တာဝန်များ ဖြစ်သည်ဟု ရှုမြင်လျက် ပိုမို ငြိမ်းချမ်း၊ ပိုမိုတိုးတက် ပိုမိုကောင်းမွန်သော နှစ်သစ်ကို လက်တွဲ ပူးပေါင်းဖော်ဆောင်ကြရန် ဒေါ်အောင်ဆန်းစုကြည်က ပြောဆိုသည်။

ထို့ပြင် ကရင်အမျိုးသားနှစ်သစ်ကူးနေ့မှအစပြု၍ ပြည်ထောင်စုငြိမ်းချမ်းရေးကို စံနမူနာကောင်း များဖြင့် ဆက်လက်ဖော်ဆောင်ပေးနိုင်ကြစေရန်၊ကရင်တိုင်းရင်းသားများ၏ မေတ္တာတရား ပေါင်းစည်း ညီညွတ်မှုစွမ်းအားဖြင့် ကရင်ပြည်နယ်ကြီး အရှိန်အဟုန်နှင့် ဆက်လက် ဖွံ့ဖြိုးတိုးတက်အောင် ဆောင်ရွက်နိုင်ကြစေရန်နှင့် ကရင်တိုင်းရင်းသားများ၏ ရိုးရာယဉ်ကျေးမှု ဓလေ့ထုံးစံ အမွေအနှစ်များကို ထိန်းသိမ်းစောင့်ရှောက်နိုင်ကြစေရန် ဒေါ်အောင်ဆန်းစုကြည်က သဝဏ်လွှာမှတစ်ဆင့်ဆုမွန်ကောင်းတောင်းပေးခဲ့သည်။

သတင်း-မိုးသိမ့်နိုင်

ဓာတ်ပုံ – ကိုဘိုဘို