တပ်မတော်က စိစစ်ထုတ်ပြန်ထားသည့် မဲမသမာမှုများကို ဥပဒေနှင့်အညီ မဖြေရှင်းပေးခြင်းက နိုင်ငံရေးအကြပ်အတည်းဖြစ်ဟုဆို

၂၀၂၀ ပြည့်နှစ်အထွေထွေရွေးကောက်ပွဲတွင် တပ်မတော်သားများ ဆန္ဒမဲပေးခဲ့ကြသည့် နယ်မြေများမှ မဲမသမာမှု၊ မဲစာရင်းအမှားများကို သက်ဆိုင်ရာတာဝန်ရှိသူများက ဥပဒေနှင့်အညီ မဖြေရှင်းပေးခြင်းသည် နိုင်ငံရေးအကြပ်အတည်းဖြစ်ကြောင်း တပ်မတော်သတင်းမှန်ပြန်ကြားရေးအဖွဲ့မှ ဗိုလ်မှူးချုပ်ဇော်မင်းထွန်း က ပြောသည်။

ယနေ့(ဇန်နဝါရီ ၂၆ရက်)က နေပြည်တော်ရှိ တပ်မတော်စစ်သမိုင်းပြတိုက်တွင်ပြုလုပ်ခဲ့သည့် တပ်မတော်သတင်းစာရှင်းလင်းပွဲတွင် ၎င်းကအထက်ပါအတိုင်း ဖြေရှင်းပြောကြားခဲ့ခြင်းဖြစ်သည်။

“နိုင်ငံရေးအကျပ်အတည်းဆိုတာက ကျွန်တော်တို့ နိုင်ငံရဲ့ ရွေးကောက်ပွဲနဲ့ပတ်သက်ပြီး တိတိကျကျထုတ်ပြန်ပေးနေတယ်။ ဒါတွေကို ဥပဒေနဲ့အညီ ဖြေရှင်းပေးဖို့ တောင်းဆိုမှုပြုတယ်။ သဘောထားထုတ်ပြန်ချက်တွေ ထုတ်ပြန်တယ်။ တပ်မတော်အနေနဲ့ တစ်မျိုးသားလုံးနဲ့ဆိုင်တဲ့ အထွေထွေရွေးကောက်ပွဲဟာ လွတ်လပ်မှု၊ တရားမျှတမှု၊ ညီမျှမှု၊ ပွင့်လင်းမြင်သာမှု၊ မသမာမှု ရှိ၊ မရှိကို ဒီမိုကရေစီနိုင်ငံရေးယဉ်ကျေးမှုနဲ့အညီ ထောက်ပြပြောဆိုခြင်းဖြစ်တယ်။ တရားဝင်ပြောဆိုနေခြင်းဖြစ်တယ်။ ဒါကို ဥပဒေနဲ့အညီ ဖြေရှင်းမပေးခြင်းသည် နိုင်ငံရေးအကြပ်အတည်းဖြစ်တယ်လို့ ဆိုလိုပါတယ်” ဟု ၎င်းကပြောသည်။

ထို့အပြင် မဲစာရင်းများထုတ်ပြန်နေသည်မှာလည်း နိုင်ငံရေးယဉ်ကျေးမှုတစ်ရပ်ကို လုပ်ဆောင်နေခြင်းဖြစ်ကြောင်း၊ ဒီမိုကရေစီနိုင်ငံယဉ်ကျေးမှုအရ ဥပဒေနှင့်အညီ ဖြေရှင်းပေးရန် တောင်းဆိုနေခြင်းသာဖြစ်ကြောင်း ဗိုလ်မှူးချုပ်ဇော်မင်းထွန်း က ဆိုသည်။

“မဲစာရင်းတွေ ဘာလို့ထုတ်ပြန်နေတာလဲဆို နိုင်ငံရေးယဉ်ကျေးမှုတစ်ရပ်ကို ပြုလုပ်နေတာဖြစ်ပါတယ်။လုပ်ချင်လို့ လုပ်နေတာ မဟုတ်ပါဘူး။ Political culture တစ်ရပ်ကို လုပ်နေတာဖြစ်တယ်။ ဒီမိုကရေစီနိုင်ငံရေး ယဉ်ကျေးမှုအရ ဥပဒေနဲ့အညီဖြေရှင်းပေးဖို့ တောင်းဆိုနေတာဖြစ်တယ်”ဟု ၎င်းကပြောကြားသည်။

မဲစာရင်းကိစ္စများနှင့်ပတ်သက်၍ နိုင်ငံတော်အစိုးရ၊ ပြည်ထောင်စုလွှတ်တော်၊ ပြည်ထောင်စုရွေးကောက်ပွဲကော်မရှင်တို့ကို ဥပဒေနှင့်အညီ ဖြေရှင်းပေးရန် တောင်းဆိုထားကြောင်းနှင့် မဖြေရှင်းပါက တပ်မတော်သည် ဖွဲ့စည်းပုံအခြေခံဥပဒေကပြဌာန်းထားသည့် ဥပဒေများအတိုင်း လိုက်နာဆောင်ရွက်သွားမည်​ဖြစ်ကြောင်း ဗိုလ်မှူးချုပ်ဇော်မင်းထွန်း က ထပ်မံပြောကြားခဲ့သည်။

ထို့ကြောင့် တပ်မတော်အနေဖြင့် ရွေးကောက်ပွဲရလဒ်ကို လက်ခံ၊ မခံဆိုသည့်အချက်မှာ သက်ဆိုင်ရာတာဝန်ရှိသူများက အဆိုပါမဲစာရင်းမှားယွင်းမှုများအပေါ် ဖြေရှင်းပေးခြင်း၊ မပေးခြင်းအပေါ်တွင်သာမူတည်နေကြောင်း ပြောကြားခဲ့သည်။

သတင်း – မိုးသိမ့်နိုင်
ဓာတ်ပုံ – တပ်မတော်သတင်းမှန်ပြန်ကြားရေးအဖွဲ့