ပြည်နယ်နှင့်တိုင်းများရှိ အကူအညီများ အရေးတကြီးလိုအပ်နေသူအားလုံးထံ တိုက်ရိုက် သွားရောက် ပေးခွင့်ပြုရန် ကုလသမဂ္ဂတောင်းဆို

ကယားပြည်နယ်အပါအဝင် နိုင်ငံအတွင်း ရှိ အခြားပြည်နယ်နှင့် တိုင်းဒေသကြီးများရှိ လူသားချင်း စာနာမှုဆိုင်ရာ အကူအညီများ အရေးတကြီး လိုအပ်နေသူများ အားလုံးထံ အကူအညီများ တိုက်ရိုက် သွားရောက် ပေးခွင့်ပြုရန် ကုလသမဂ္ဂက တောင်းဆိုကြောင်း ဇွန် ၈ ရက်တွင် United Nations Myanmar က ထုတ်ပြန်သည်။

အဆိုပါ ထုတ်ပြန်ချက်တွင် “ကယားပြည်နယ်တွင် မကြာသေးမီက ဖြစ်ပွားလျက်ရှိသော အခြေအနေများကြောင့် ခန့်မှန်းခြေအားဖြင့် အမျိုး သား၊ အမျိုးသမီးနှင့် ကလေးငယ် စသည့်လူဦးရေ ၁၀၀၀၀၀ ခန့်သည် ပြည်တွင်းတွင် နေရပ်စွန့်ခွာ တိမ်းရှောင်နေရသည်။

မြန်မာနိုင်ငံ အရှေ့တောင်ပိုင်းရှိ ကယား ပြည်နယ်နှင့် အခြားဒေသများတွင် လျင်မြန်စွာ ဆိုးရွားလာသည့် လုံခြုံရေးနှင့် လူသားချင်း စာနာမှု ဆိုင်ရာ အခြေအနေများနှင့် စပ်လျဉ်း၍ မြန်မာနိုင်ငံ ရှိ ကုလသမဂ္ဂအဖွဲ့ကြီးက စိုးရိမ်လျက်ရှိသည်။

အိုးအိမ်စွန့်ခွာရသူ အများစုမှာ ကယား ပြည်နယ်နှင့် ယင်းနှင့်ထိစပ်ရာ ရှမ်းပြည်နယ်(တောင် ပိုင်း)ရှိ ဘေးကင်းလုံခြုံရာ နယ်ခံများနှင့် သစ်တောများထဲတွင် ခိုလှုံနေထိုင်လျက် ရှိကြသည်။ ဤအရေးကိစ္စသည် မြန်မာနိုင်ငံ၏ အခြားဒေသများတွင် တွေ့မြင်ရပြီးဖြစ်သကဲ့သို့ အိုးအိမ်စွန့်ခွာရသူများကို နယ်စပ်ဖြတ်ကျော် ထွက်ပြေးခိုလှုံရသည့် အခြေအနေသို့ တွန်းပို့နိုင်ပါသည်။

ပဋိပက္ခတွင် ပါဝင်ပတ်သက်သူ အားလုံးအနေဖြင့် အရပ်သားများ၊ အရပ်သားများနှင့် သက်ဆိုင်သော အခြေခံ အဆောက်အအုံများ၊ အထူးသဖြင့် ဆေးကုသရာနေရာများနှင့်ဆေးဝန်ထမ်းများ အစရှိသည့် အကာအကွယ်ပေးရမည့် အရာများကို အကာအကွယ်ပေးရန်အတွက် လိုအပ်သောအစီအမံနှင့် ကြိုတင်ကာကွယ်မှုများကိုအရေးတကြီးလုပ်ဆောင်ရန်နှင့် တိုက်ခိုက်သူနှင့် အရပ်သားများအကြား ပစ်မှတ်ခွဲခြားခြင်း၊ လိုအပ်မှသာပစ်ခတ်ခြင်း၊ အင်အားအလွန်အကျွံ အသုံးမပြုခြင်းနှင့် အရပ်သားများကို ကာကွယ်စောင့်ရှောက်ခြင်းအစရှိသည့်အခြေခံမူများကိုလိုက်နာရန် ကုလသမဂ္ဂက ထပ်လောင်းတောင်းဆိုတိုက်တွန်းအပ်ပါသည်။

ဖြစ်ပွားနေသော တိုက်ပွဲများကြောင့် အိုးအိမ်စွန့်ခွာထွက်ပြေးကြရသူများနှင့် တိုက်ပွဲဒဏ်ခံဒေသများတွင် ကျန်ရှိနေသူများသည် စားနပ်ရိက္ခာ၊ ရေ၊ နေစရာ၊ လောင်စာနှင့်ကျန်းမာရေးစောင့်ရှောက်မှုများ အရေးပေါ်လိုအပ်လျက်ရှိကြပါသည်။ ဒေသခံများသည် ကူညီတုံ့ပြန်မှုများကို ချက်ချင်းလက်ငင်း လုပ်ဆောင်နိုင်ကြသော်လည်း လိုအပ်ချက်အားလုံး အထူးသဖြင့် ဝေးလံသောနေရာတွင် ရောက်ရှိနေသူများထံသို့ ရောက်ရှိရေး လိုအပ်နေဆဲဖြစ်သည်။

ဒေသခံများ၏ ကူညီဆောင်ရွက်မှုများကို ပံ့ပိုးဖြည့်ဆည်းပေးရန်ကုလသမဂ္ဂနှင့် ယင်း၏ မိတ်ဖက်အဖွဲ့အစည်းများတွင် စားနပ်ရိက္ခာ၊ အိုးအိမ်ဆိုင်ရာပစ္စည်းများနှင့် အခြားအခြေခံကယ်ဆယ်ရေးပစ္စည်းများအပါအဝင် လူသားချင်းစာနာမှုဆိုင်ရာအကူအညီများအဆင်သင့်ရှိနေပါသည်။

ဆက်လက် ပေါ်ပေါက်နေသည့် လုံခြုံရေးအခြေအနေ၊ လုံခြုံရေးတပ်ဖွဲ့များက ချမှတ်ထားသည့် အသွားအလာ ကန့်သတ်ချက်များနှင့်လမ်းပန်းဆက်သွယ်ရေး ကောင်းမွန်မှုမရှိခြင်းများကြောင့် ဤအကူအညီများကို ပေးဝေရန် ကြန့်ကြာလျက်ရှိပါသည်။

လူသားချင်း စာနာမှုဆိုင်ရာ အကူအညီများနှင့် သွားရောက်ကူညီသူများကို ဘေးကင်းစွာ သွားလာခွင့်ပြုရန်နှင့် ကုလသမဂ္ဂနှင့်မိတ်ဖက်အဖွဲ့အစည်းများအား ကယားပြည်နယ်အပါအဝင် နိုင်ငံအတွင်းရှိ အခြားပြည်နယ်နှင့် တိုင်းဒေသကြီးများရှိ လူသားချင်းစာနာမှုဆိုင်ရာအကူအညီများ အရေးတကြီးလိုအပ်နေသူများအားလုံးထံ အကူအညီများတိုက်ရိုက်သွားရောက်ပေးခွင့်ပြုရန် လုံခြုံရေးတပ်ဖွဲ့များအား ကုလသမဂ္ဂအဖွဲ့က တောင်းဆိုပါသည်။

ကုလသမဂ္ဂအတွင်းရေးမှူးချုပ်၏ကမ္ဘာလုံးဆိုင်ရာ အပစ်အခတ်ရပ်ရေးတောင်းဆိုမှုနှင့် ပြန်လည်ဖြစ်ပွားလာသော ကိုဗစ်(၁၉)ရောဂါနှင့်အခြားသောလူသားချင်းစာနာမှုဆိုင်ရာနှင့်ကျန်းမာရေးဆိုင်ရာပြဿနာများကို ပူးပေါင်းရင်ဆိုင်ဖြေရှင်းကြရန် တောင်းဆိုမှုကို ကုလသမဂ္ဂက ထပ်လောင်းတိုက်တွန်းတောင်းဆိုအပ်ပါသည်”ဟုပါရှိသည်။

သတင်း – တောက်ထွန်းနီ