မြန်မာအပေါ် ထောက်ခံမှုတိုးမြှင့်မည်ဟု တရုတ်နိုင်ငံခြားရေးဝန်ကြီးဝမ်ယီ ဆို

မြန်မာနိုင်ငံတွင် ဖြစ်ပွားနေသော ပြည်တွင်းရေး အခြေအနေများက တရုတ် နိုင်ငံ၏ မြန်မာနိုင်ငံဆိုင်ရာမူဝါဒကို ထိခိုက်မည်မဟုတ်ဘဲ အမေရိကန်နှင့် အနောက် နိုင်ငံများမှ အရေးယူပိတ်ဆို့မှုများနှင့် ရင်ဆိုင်နေရသော မြန်မာနိုင်ငံကို ထောက်ခံမှုများ တိုးမြှင့်သွားမည်ဖြစ်ကြောင်း တရုတ်နိုင်ငံခြားရေးဝန်ကြီး ဝမ်ယီက ထုတ်ဖော်ပြောဆို လိုက်သည်။

ဝမ်ယီသည် မြန်မာနိုင်ငံ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးဝဏ္ဏ မောင်လွင်နှင့် တရုတ်နိုင်ငံ ချုံချုင့်မြို့တွင် ဇွန် ၈ ရက်က တွေ့ဆုံစဉ် ယင်းသို့ပြောဆိုခဲ့ ခြင်းဖြစ်ပြီး နှစ်နိုင်ငံပူးတွဲစီမံကိန်းများကိုလည်း ဆက်လက်အကောင်အထည်ဖော်သွားမည်ဟု နိုင်ငံပိုင်ရုပ်သံမီဒီယာများကလည်း ထုတ်လွှင့်ခဲ့သည်။

မြန်မာနိုင်ငံအပေါ်ထားရှိသည့် တရုတ်နိုင်ငံ၏ ရင်းနှီးဖော်ရွေသည့် မူဝါဒသည် မြန်မာ့ပြည်တွင်းရေးနှင့် ပြည်ပအခြေအနေများကြောင့် ထိခိုက်ပြောင်းလဲသွားမည်မဟုတ်ဘဲ မြန်မာပြည်သူများ အပေါ်တွင်သာ ရှေးရှုနေဆဲဖြစ်ကြောင်း ဝမ်ယီကပြောဆိုခဲ့ကြောင်း တရုတ်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

အတိတ်၊ ပစ္စုပ္ပန်နှင့် အနာဂတ်တွင် တရုတ်နိုင်ငံသည် မြန်မာနိုင်ငံ၏ အမျိုးသားရေး အခြေအနေနှင့်ကိုက်ညီသော ဖွံ့ဖြိုးတိုးတက်မှုလမ်းကြောင်းကို လွတ်လပ်စွာရွေးချယ်နိုင်ရန် ထောက်ခံအားပေးကြောင်း ၎င်းကပြောဆိုသည်။

တရုတ်နိုင်ငံက လက်ခံကျင်းပသည့် အာဆီယံနိုင်ငံခြားရေးဝန်ကြီးများနှင့်တွေ့ဆုံပွဲတွင် မြန်မာအရေးနှင့်ပတ်သက်၍ ဖြေရှင်းမှုများလုပ်ဆောင်ရာ၌ တိုးတက်ဖြစ်ထွန်းမှုနှေးကွေးကြောင်း မလေးရှားနှင့် စင်ကာပူနိုင်ငံတို့က ဝေဖန်မှုပြုပြီးနောက် နောက်တစ်နေ့တွင် တရုတ်နိုင်ငံခြားရေးဝန်ကြီးဝမ်ယီနှင့် ဦးဝဏ္ဏမောင်လွင်တို့ တွေ့ဆုံခဲ့ခြင်းဖြစ်သည်။

သတင်း – သန့်မျိုး