ပြည်ထောင်စုဝန်ကြီးဟောင်း ဦးသောင်းထွန်းကို အဂတိအမှုဖြင့် နစကအမှုဖွင့်

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးဟောင်း ဦးသောင်းထွန်းကို အဂတိလိုက်စားမှုတိုက်ဖျက်ရေးဥပဒေဖြင့် အမှုဖွင့်လှစ်အရေးယူရန်ဆောင်ရွက်လျက်ရှိကြောင်း ယနေ့(နိုဝင်ဘာ ၂၄ ရက်) ထုတ် နိုင်ငံပိုင်သတင်းစာများတွင်ဖော်ပြထားသည်။

စုံစမ်းစစ်ဆေးရေးအဖွဲ့၏ စစ်ဆေးချက်အရ ပြည်ထောင်စုဝန်ကြီးဟောင်း ဦးသောင်းထွန်းသည် တာဝန်ထမ်းဆောင်စဉ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာနပိုင် မင်္ဂလာတောင်ညွန့်မြို့နယ်၊ အထက်ပုဇွန်တောင်လမ်းမပေါ်ရှိ မြေဧက ၉ ဒသမ ၂၂၀ ပေါ်ရှိ မြေနေရာအား ပုဂ္ဂလိကကုမ္ပဏီတစ်ခုသို့ နှစ် ၃၀ ငှားရမ်းရာတွင် နိုင်ငံတော်သမ္မတရုံး၏ ၃/၂၀၁၈ စာပိုဒ်ခွဲ(ဆ)ပါ ငှားရမ်းခ သတ်မှတ်ထားသည့် နိုင်ငံပိုင်မြေ၊ အဆောက်အအုံများတည်ရှိရာဒေသ၏ ကာလပေါက်ဈေးအတိုင်း သတ်မှတ်ရမည်ဟူသော ပြဋ္ဌာန်းချက်ကိုလိုက်နာခြင်းမရှိခဲ့ကြောင်း ဖော်ပြထားသည်။

ထို့ပြင် ၁/၂၀၁၇ တင်ဒါလုပ်ထုံးလုပ်ထုံးလုပ်နည်းများနှင့်အညီ လိုက်နာဆောင်ရွက်မှုမရှိကြောင်း၊ ရန်ကုန်မြို့၌ စားသုံးသူရေးရာဦးစီးဌာနပိုင်မြေနေရာသည် ကာလပေါက်ဈေးအရ တစ်စတုရန်းမီတာလျှင် အမေရိကန်ဒေါ်လာ ၁၀ နှင့် ၁၅ ဒေါ်လာကြားရှိသော်လည်း ပုဂ္ဂလိကကုမ္ပဏီတစ်ခုနှင့် စာချုပ်ချုပ်ဆို ငှားရမ်းရာတွင် တစ်စတုရန်းမီတာလျှင် အမေရိကန် ဒေါ်လာ ၆ ဒသမ ၅ ဒေါ်လာနှုန်းဖြင့် တစ်နှစ်စာ မြေငှားရမ်းခ အမေရိကန်ဒေါ်လာ ၂ ဒသမ ၄ သိန်းကျော်ကိုသာ ပေးသွင်းစေခဲ့သဖြင့် တစ်နှစ်အတွက် မြေငှားရမ်းခ အမေရိကန် ၁ ဒသမ ၃ သိန်းကျော် နစ်နာဆုံးရှုံးခဲ့ကြောင်း ထုတ်ပြန်ထားသည်။

ရန်ကုန်မြို့၌ မြေငှားရမ်းမှုများတွင် ငှားရမ်းသည့်ကုမ္ပဏီများမှ မြေအသုံးချမှု ပရီမီယံကြေး တစ်ဧကလျှင် အနိမ့်ဆုံးနှုန်းထား အမေရိကန်ဒေါ်လာ ၁ သန်းရှိသော်လည်း ပုဂ္ဂလိကကုမ္ပဏီတစ်ခုအား စီးပွားရေးနှင့် ကူးသန်းရောင်းဝယ်ရေးဌာနပိုင် မြေ ၉ ဒသမ ၂၂ ဧကကို ငှားရမ်းရာတွင် အမေရိကန်ဒေါ်လာ ၉ ဒသမ ၂၂ သန်း အနည်းဆုံးရရှိရန်ဖြစ်သော်လည်း မြေအသုံးချမှု ပရီမီယံကြေး အမေရိကန်ဒေါ်လာ ၂ ဒသမ ၄ သိန်း ကျော်သာပေးသွင်းစေခဲ့ရာ အမေရိကန်ဒေါ်လာ ၈ ဒသမ ၉ သန်းကျော် နစ်နာဆုံးရှုံးခဲ့ကြောင်း ထုတ်ပြန်ချက်တွင်ဖော်ပြထားသည်။

ထို့ကြောင့် ပြည်ထောင်စုဝန်ကြီးဟောင်း ဦးသောင်းထွန်းအပေါ် အဂတိလိုက်စားမှုတိုက်ဖျက်ရေး ဥပဒေပုဒ်မ ၅၅ အရ နေပြည်တော်၊ ဘုရားကုန်းမြို့မရဲစခန်းတွင် ပထမသတင်းပေးတိုင်ကြားချက်ဖွင့်လှစ်၍ တရားစွဲဆိုအရေးယူနိုင်ရေး ဆောင်ရွက်လျက်ရှိကြောင်း ဖော်ပြထားသည်။

ပြည်ထောင်စုဝန်ကြီးဟောင်း ဦးသောင်းထွန်းသည် ဒေါ်အောင်ဆန်းစုကြည်၏အစိုးရလက်ထက်တွင် ပြည်ထောင်စုအစိုးရအဖွဲ့ရုံးဝန်ကြီး၊ နိုင်ငံတော်လုံခြုံရေးအကြံပေးပုဂ္ဂိုလ်၊ မြန်မာနိုင်ငံရင်းနှီးမြုပ်နှံမှုကော်မရှင် (MIC) ဥက္ကဋ္ဌတာဝန်များကို ပူးတွဲထမ်းဆောင်ခဲ့သူဖြစ်ပြီး အငြိမ်းစားသံမတ်ဟောင်း တစ်ဦးလည်းဖြစ်သည်။

သတင်း – စံတော်ချိန်ဒစ်ဂျစ်တယ်
ဓာတ်ပုံ – U Thaung Tun Fb